Read La Bible en Malgache Jeremia 18 Bible Online

Jeremia 18 - La Bible en Malgache bible

Jeremia 18

¹Izao no teny tonga tamin’i Jeremia avy tamin’NY TOMPO:

²Mitsangàna ka midìna ho any amin’ny tranon’ny mpanefy tanimanga; any no hampandrenesako anao ny teniko.

³Dia nidina tany amin’ny tranon’ny mpanefy tanimanga aho ary indro, teo am-panaovana ny asany teo amin’ny milina fanodinana izy.

⁴Ary raha simba ny vilany amboariny, araka izay miseho matetika amin’ny tanimanga eny an-tanan’ny mpanefy, dia ataony vilany hafa indray, araka izay tian’izy mpanefy tanimanga hanaovana azy.

⁵Dia tonga tamiko ny tenin’NY TOMPO hoe:

⁶Moa tsy afaka manao aminareo toy ny ataon’ity mpanefy tanimanga ity va Aho, ry taranak’Israely? Hoy NY TOMPO. Indro, toy ny tanimanga eo an-tanan’ny mpanefy azy, dia toy izany ianareo eo an-tanako, ry taranak’Israely.

⁷Mbetika Aho dia milaza ny amin’ny firenena sy fanjakana iray fa hongotako sy hazerako ary horavako izy;

⁸kanefa raha miala amin’ny ratsy izany firenena noteneniko izany dia hanenenako kosa ny loza izay nokasaiko hamelezana azy.

⁹Ary mbetika kosa Aho dia milaza ny amin’ny firenena sy fanjakana iray fa haoriko sy hamboleko;

¹⁰nefa raha manao izay ratsy eo imasoko izy ka tsy mihaino ny feoko dia hanenenako kosa ny soa izay nolazaiko hanasoavana azy.

¹¹Koa amin’izany, lazao amin’ny Joda sy amin’ny mponina eto Jerosalema hoe: Izao no lazain’NY TOMPO: Indro, mamorona loza hihatra aminareo Aho ary mihevitra izay hamelezako anareo; koa samia miala amin’ny lalany ratsy avy ianareo ary ataovy tsara ny lalanareo sy ny ataonareo.

¹²Nefa hoy ireo: Tsy misy fanantenana ho anay! Fa mbola hanaraka ny hevitray ihany izahay; eny, samy hanao araka ny ditran’ny fo ratsinay avy izahay rehetra.

¹³Koa izao no lazain’NY TOMPO: Anontanio any amin’ny Jentilisa* hoe: Iza no nandre zavatra toy izany? Zavatra mahatsiravina indrindra no nataon’Israely virijiny.

¹⁴Hitsahatra tsy ho eo amin’ny vatolampy any an-tsaha va ny orampanalan’i Libanona, ary mety ho ritra va ny rano maria sady mangatsiaka avy amin’ny tany hafa?

¹⁵Fa efa nanadino Ahy ny oloko, koa ho an’ny sampy no nandoroany ditin-kazo manitra; ary nahatafintohina azy teo amin’ny lalany ireny, dia ny lalana efa hatramin’ny fahagola ka nandehanany amin’ny sakeli-dalana madinika, dia amin’ny lalana tsy voavoatra.

¹⁶Izany no nahatonga ny taniny ho figagana sy ho zavatra mampisitrisitra mandrakizay; izay rehetra mandalo azy dia gaga sy mihifikifi-doha.

¹⁷Toy ny fampielin’ny rivotra avy any atsinanana no hampielezako azy eo anoloan’ny fahavalony; hiamboho azy Aho fa tsy hanatrika azy, amin’ny andro hahitany loza.

¹⁸Hoy ny olona: Andeha isika hihevitra izay hamelezana an’i Jeremia; fa tsy ho tapaka tsy akory ny lalàna avy amin’ny mpisorona, na ny tolo-tsaina avy amin’ny hendry, na ny teny avy amin’ny mpaminany. Aoka hoenti-mamely azy ny lelantsika ary aoka tsy hohenointsika akory izay teniny.

¹⁹Mihainoa ahy, TOMPO ô; ary mihainoa ny tenin’izay miady amiko.

²⁰Ratsy va no havaly ny soa? Fa efa nihady lavaka hamandrihana ahy ireo. Tsarovy ny nitsanganako teo anatrehanao nitaraina ho azy hampiala ny fahatezeranao aminy.

²¹Koa aoka ho mosarena ny zanany, ary atolory ho amin’ny herin’ny sabatra izy ka ho foana anaka ny vadiny sady ho tonga mpitondratena; ary aoka haripaky ny aretina ny lehilahy lehibe ao aminy ary ho fatin-tsabatra amin’ny ady ny zatovony.

²²Aoka hisy fidradradradrana ho re avy ao an-tranony rehefa mitondra miaramila iray toko any aminy tampoka Ianao; fa efa nihady lavaka hamandrihana ahy izy sady nanafim-pandrika haningorana ny tongotro.

²³Fa Ianao, TOMPO ô, no mahalala ny fisainana rehetra ataony hamelezany ahy ho faty; aza avela ny helony; ary aza vonoina tsy ho eo imasonao ny fahotany, fa aoka ho solafaka eo anatrehanao izy; mameleza azy amin’ny andro fahatezeranao.