Read La Bible en Malgache Jeremia 2 Bible Online

Jeremia 2 - La Bible en Malgache bible

Jeremia 2

¹Ary tonga tamiko ny tenin’NY TOMPO hoe:

²Mandehana ka miantsoa eo anatrehan’i Jerosalema hoe: Izao no lazain’NY TOMPO: Tsaroako ny niraiketan’ny fonao Tamiko, fony ianao mbola tanora, sy ny fitiavanao, fony ianao vao nampakarina, dia ilay nanarahanao Ahy tany an-tany efitra, teny amin’ny tany tsy mbola namafazan-javatra;

³Masina ho an’NY TOMPO ny Israely sady santa-bokatra ho Azy; izay rehetra nihinana azy dia nohelohina ary loza no nanjo ireny, hoy NY TOMPO.

⁴Mihainoa ny tenin’NY TOMPO, ry taranak’i Jakoba, sy ianareo, ry fokony rehetra amin’ny taranak’Israely!

⁵Izao no lazain’NY TOMPO: Inona moa no tsy marina hitan’ny razanareo Tamiko, no dia nanalavitra Ahy izy sady nanaraka zava-poana ka nanjary zava-poana koa izy?

⁶Tsy mba nilaza izy hoe: Aiza NY TOMPO izay nitondra antsika niakatra avy tany amin’ny tany Ejipta sady nitarika antsika tany an-tany efitra, dia ilay tany foana sady be lavaka, tany karankaina sady aloky ny fahafatesana, tany izay tsy mba nalehan’olona akory na nonenan’olona?

⁷Nitondra anareo niditra tany amin’ny tany mahavokatra Aho mba hihinananareo ny vokatra sy ny zavatra tsara eo aminy; kanjo nony tafiditra ianareo dia nolotoinareo ny taniko sady nataonareo fahavetavetana ny lovako.

⁸Tsy mba niteny ny mpisorona hoe: Aiza NY TOMPO? Ary tsy nahalala Ahy ny mpitahiry ny lalàna; nanota Tamiko koa ny mpitondra, ary naminany tamin’ny anaran’ny Baala* ny mpaminany ka nanaraka ireny tsy nahavita na inona na inona ireny.

⁹Koa mbola hifandahatra aminareo Aho, hoy NY TOMPO, ary hiady amin’ny zafinareo koa.

¹⁰Fa mità ho any amin’ny moron-dranomasin’i Kitima ka zahao! Ary mandefasa iraka ho any Kedara ka diniho tsara, dia ho hitanareo raha mba efa nisy toy izao, na tsia:

¹¹Moa nisy firenena efa nanova ny andriamaniny va? Nefa ireny dia tsy andriamanitra akory. Fa ny oloko kosa dia efa nanakalo ny voninahiny tamin’ireny tsy mahasoa ireny.

¹²Talanjòna amin’izany, ry lanitra! Ary matahora ka mangorohoroa fatratra, ianareo! Hoy NY TOMPO;

¹³Fa zava-dratsy roa loha no nataon’ny oloko: Efa nahafoy Ahy, loharano velona, izy ka nihady lavaka famorian-drano ho an’ny tenany, nefa lavaka mitriatriatra tsy mahatan-drano.

¹⁴Moa mpanompo va Israely? Moa mpanompo teraka tao an-trano va izy? Koa nahoana izy no voababo?

¹⁵Hamely azy no mampierona ny liona tanora sy amoahany feo ka mahatonga ny taniny ho lao; nodorana ny tanànany ka tonga tsy nisy mponina.

¹⁶Ny mponina tao Nofa sy Tapanesa aza dia nampangadihady ny tampon-dohanao.

¹⁷Moa tsy ny nahafoizanao NY TOMPO Andriamanitrao tamin’ny andro nitondrany anao teny an-dalana va no nahatonga izany taminao?

¹⁸Koa inona no antony ankanesanao amin’ny lalana mankany Ejipta hisotro ny ranon’i Sihora? Ary inona no antony ankanesanao amin’ny lalana mankany Asiria hisotro ny rano amin’ny ony Eofrata?

¹⁹Ny haratsianao no anafaizana anao, ary ny fikomianao no ananarana anao; koa fantaro sy hevero fa ratsy sady mangidy ny nahafoizanao NY TOMPO Andriamanitrao sy ny tsy nisian’ny tahotrao Ahy, Hoy NY TOMPO, Andriamanitra Tompon’izao rehetra izao.

²⁰Fa hatramin’ny ela no efa nanapahanao ny zioga taminao sy namahanao ny fatoranao ka hoy ianao: Tsy hanompo intsony aho; nefa teny amin’ny tendrombohitra avo sy teny ambanin’ny hazo maitso rehetra no nandrianao sy nijangajanganao.

²¹Nefa Izaho namboly anao toy ny karazam-boaloboka tsara indrindra, dia rantsana tsara avokoa; koa nahoana no nanjary sampany ratsy ianao, ary tonga voaloboka hafa?

²²Fa na dia misasa amin’ny sirahazo aza ianao ka maka lavenona betsaka hanadiovana anao, ny helokao dia mbola voasoratra eo anatrehako ihany, hoy NY TOMPO Andriamanitra.

²³Ahoana no ilazanao hoe: Tsy nanao izay nahaloto ahy aho, tsy nanaraka ireo Baala* aho? Hevero ny nalehanao tany amin’ilay lohasaha, ekeo izay nataonao, ry rameva vavy haingam-pandeha mivezivezy amin’ny alehany,

²⁴sy ry borikidia vavy, tamana any an-tany efitra, izay manimbolo ny rivotra noho ny faniriany; koa iza no mahasakana ny fahamaimaizany? Izay rehetra mitady azy dia tsy ho sasa-poana; fa amin’ny volana fahamaimaizany no hahitany azy.

²⁵Mitandrema! Fa ho afaka amin’ny tongotrao ny kapanao, ary ho maina ny tendanao; nefa hoy ianao: Tsy manantena inona aho! Tsia! Fa ny vahiny no tiako ka hanaraka azy aho.

²⁶Toy ny fangaihaizan’ny mpangalatra raha azo dia toy izany no fangaihaizan’ny taranak’Israely, eny, izy, ny mpanjakany, ny lehibeny, ny mpisorony ary ny mpaminaniny,

²⁷dia izay miteny amin’ny tapa-kazo hoe: Ianao no raiko, ary amin’ny vato hoe: Ianao no niteraka ahy. Fa niamboho Ahy izy ka tsy nanatrika ny tavako; nefa amin’ny andro fahoriany dia hiteny indray izy hoe: Mitsangàna ka vonjeo izahay!

²⁸Fa aiza ireny andriamanitrao izay nataonao ho anao ireny? Aoka hitsangana ireny raha mahavonjy anao amin’ny andro fahorianao; fa araka ny isan’ny tanànanao, ry Joda, no isan’ny andriamanitrao.

²⁹Nahoana no mifandahatra Amiko ianareo? Fa samy efa nikomy Tamiko ianareo rehetra, hoy NY TOMPO.

³⁰Foana ny namelezako ny zanakareo, fa tsy zaka nanarina izy; ny sabatrareo no nandringana ny mpaminaninareo, toy ny liona mamiravira.

³¹Ry taranaka ankehitriny, dinihonareo ny tenin’NY TOMPO! Moa efa nanjary tany efitra ho an’ny Israely va Aho, na tany maizim-pito? Nahoana ny oloko no miteny hoe: Afaka mikarenjy izahay ka tsy hankany Aminao intsony?

³²Hanadino ny firavany va ny virijiny, na hanadino ny fehikibony misy haingony va ny ampakarina? Tsy hita isa anefa ny andro nanadinoan’ny oloko Ahy.

³³Kanto izany fandehanao hitady fitia izany ka na dia ny vehivavy ratsy fanahy aza dia ampianarinao ny fombanao.

³⁴Ary koa eo an-tsisin-dambanao no ahitana ny ran’ny mahantra tsy manan-tsiny, izay tsy tratranao namaky ny tranonao akory, nefa novonoinao ka voan’ny rany ianao.

³⁵Nefa hoy ianao: Tsy manan-tsiny aho ka ho afaka amiko ny fahatezerany. Indro, hifandahatra aminao Aho noho ny ilazanao hoe: Tsy nanota aho.

³⁶Nahoana ianao no maimaika hanova ny alehanao? Fa ho menatra noho ny amin’i Ejipta koa ianao, toy ny nahamenaranao noho ny amin’i Asiria.

³⁷Hiala amin’izany koa ianao ka hiloloha tanana; fa nolavin’NY TOMPO ny zavatra maro nitokisanao ka tsy hahomby miaraka amin’ireo ianao.