Read La Bible en Malgache Jeremia 20 Bible Online

Jeremia 20 - La Bible en Malgache bible

Jeremia 20

¹Ary i Pasora, zanak’Imera, mpisorona sady mpiandraikitra ny tranon’NY TOMPO, raha nandre an’i Jeremia naminany izany zavatra izany,

²dia namely tehamaina an’i Jeremia mpaminany sady namatotra azy tamin’ny boloky hazo izay teo am-bavahadin’i Benjamina, dia ilay eo ambony, eo anilan’ny tranon’NY TOMPO.

³Nony ampitso dia nesorin’i Pasora tamin’ny boloky hazo i Jeremia. Dia hoy i Jeremia taminy: Tsy nataon’NY TOMPO hoe Pasora[4] ny anaranao, fa Magora-Misabiba[5].

⁴Fa izao no lazain’NY TOMPO: Indro, hataoko fampihorohoroana ho an’ny tenanao sy ny sakaizanao rehetra ianao, ary ho lavon’ny sabatry ny fahavalony ireo, dia ho hitan’ny masonao izany; ary hatolotro eo an-tanan’ny mpanjakan’i Babilona ny Joda rehetra, dia hoentiny ho babo any Babilona izy ka hovonoiny amin’ny sabatra.

⁵Ary ny harena rehetra amin’ity tanàna ity, ny vokatry ny fisasarany rehetra, ny zava-tsoany rehetra ary ny harenan’ny mpanjakan’ny Joda rehetra, dia samy hatolotro eo an-tanan’ny fahavalony ka hamabo sy haka azy ireny ary hitondra azy ho any Babilona.

⁶Ary ianao, ry Pasora, sy izay rehetra mitoetra ao an-tranonao, dia ho lasan-ko babo; ary ho tonga any Babilona ianao ka any no hahafatesanao, ary any koa no handevenana anao mbamin’ny sakaizanao rehetra izay efa naminanianao lainga.

⁷TOMPO ô, notaominao aho ka voataona; nosamborinao aho ka resinao; tonga fihomehezana mandritra ny andro aho; izy rehetra dia maneso ahy.

⁸Fa na oviana na oviana no itenenako dia tsy maintsy mitaraina aho, eny, miantso aho hoe: Loza sy fandravana! Fa ny tenin’NY TOMPO dia atao fanakorana sy fihomehezana ahy isanandro.

⁹Raha hoy aho: Tsy hanonona Azy intsony aho na hiteny amin’ny anarany intsony, dia tonga toy ny afo mirehitra ato am-poko izany, voahidy ato amin’ny taolako ary sasatra ny miaritra aho ka tsy mahazaka.

¹⁰Fa reko ny endrikendriky ny besinimaro, misy fampangorohoroana manodidina, torio, eny, hotorìntsika koa izy; izay rehetra tsara fihavanana amiko dia miandry izay hahalavoako ka miteny hoe: Angamba ho voataona izy, dia horesentsika sy hovalìntsika.

¹¹Kanefa NY TOMPO dia momba ahy toy ny lehilahy mahery mahatahotra; ary noho izany dia ho tafintohina ny mpanenjika ahy ka tsy haharesy; ho menatra indrindra izy satria tsy hambinina. Henatra mandrakizay tsy hohadinoina izany!

¹²Fa Ianao, Andriamanitra, Tompon’izao rehetra izao ô, dia mamantatra ny marina ka mizaha toetra ny voa sy ny fo. Ho hitako ny famalianao azy, fa Aminao no nanankinako ny adiko.

¹³Mihirà ho an’NY TOMPO, miderà NY TOMPO; fa mamonjy ny mahantra amin’ny tanan’ny mpanao ratsy Izy.

¹⁴Ho voaozona anie ny andro izay nahaterahako! Aoka tsy hotahìna anie ny andro izay niterahan’Ineny ahy!

¹⁵Ho voaozona anie ny olona izay nitondra teny mahafaly tamin’Ikaky hoe: Tera-dahy ianao! Ary nahafaly azy indrindra izany.

¹⁶Aoka ho toy ny tanàna izay noravan’NY TOMPO izany lehilahy izany ka tsy nanenenany; aoka handre fitarainana izy nony maraina ary akora lava nony mitataovovonana,

¹⁷satria tsy nahafaty ahy tany an-kibo izy mba hahatonga an’Ineny ho fasako ka hivesatra ahy mandrakariva ny kibony.

¹⁸Nahoana re aho no nivoaka avy tany an-kibo mba hahita fahoriana sy alahelo ka ho lany amin-kenatra ny androko?