Read La Bible en Malgache Jeremia 24 Bible Online

Jeremia 24 - La Bible en Malgache bible

Jeremia 24

¹Nasehon’NY TOMPO tamiko fa indreo, nisy aviavy roa sobika voapetraka teo anoloan’ny tempolin’NY TOMPO, taorianan’ny nitondran’i Nebokadnezara, mpanjakan’i Babilona, an’i Jekonia, zanak’i Joiakima, mpanjakan’ny Joda, sy ny mpanapaka ny Joda mbamin’ny mpahay taozavatra sy ny mpanefy vy izay tany Jerosalema, ho babo ho any Babilona.

²Ny sobika iray dia nisy aviavy tena tsara, dia toy ny aviavy voaloham-bokatra; ary ny sobika iray kosa dia nisy aviavy izay tena ratsy, izay tsy azo hanina noho ny haratsiny.

³Dia hoy NY TOMPO tamiko: Inona no hitanao, ry Jeremia? Ary hoy aho hoe: Aviavy. Ny tsara moa dia tsara tokoa, ary ny ratsy kosa dia ratsy tokoa ka tsy azo hanina noho ny haratsiny.

⁴Ary tonga tamiko indray ny tenin’NY TOMPO hoe:

⁵Izao no lazain’NY TOMPO, Andriamanitry ny Israely: Tahaka ireto aviavy tsara ireto no fijeriko ny Joda voababo mba hanasoavako azy, dia ireo noroahiko niala tamin’ity tany ity ho any amin’ny tanin’ny Kaldeana.

⁶Fa hotsinjovin’ny masoko izy mba hanasoavako azy ka hampodiko ho amin’ity tany ity; haoriko izy fa tsy horavako; hamboleko izy fa tsy hongotako.

⁷Ary homeko fo hahalalany Ahy ho NY TOMPO izy; dia ho oloko izy ary Izaho kosa ho Andriamaniny; fa hiverina Amiko amin’ny fony manontolo izy.

⁸Ary ny amin’ny aviavy ratsy izay tsy azo hanina kosa noho ny haratsiny, dia izao no lazain’NY TOMPO: Toy izany no hanolorako an’i Zedekia, mpanjakan’ny Joda, sy ny mpanapaka ary izay sisa any Jerosalema, dia izay mbola sisa amin’ity tany ity sy izay mitoetra any amin’ny tany Ejipta,

⁹eny, hatolotro ho fampangovitana sy ho loza any amin’ny fanjakana rehetra ambonin’ny tany izy, ho fandatsa sy oha-pitenenana ary ambentinteny sy fanozonana any amin’ny tany rehetra izay handroahako azy.

¹⁰Ary hampameleziko azy ny sabatra sy ny mosary ary ny areti-mandringana ambara-pahalany ritra azy tsy ho amin’ny tany izay nomeko azy sy ny razany.