Read La Bible en Malgache Jeremia 27 Bible Online

Jeremia 27 - La Bible en Malgache bible

Jeremia 27

¹Tamin’ny niandohan’ny nanjakan’i Joiakima, zanak’i Josia, mpanjakan’ny Joda, no nahatongavan’izao teny izao tamin’i Jeremia avy tamin’NY TOMPO hoe:

²Izao no nolazain’NY TOMPO tamiko: Manaova kofehy famatorana sy zioga maromaro ianao ka ataovy eo am-bozonao;

³ary ampanatero any amin’ny mpanjakan’i Edoma, any amin’ny mpanjakan’i Moaba, any amin’ny mpanjakan’ny taranak’i Amona, any amin’ny mpanjakan’i Tiro ary any amin’ny mpanjakan’i Sidona izany, hoentin’ireo iraka izay mankaty Jerosalema ho atỳ amin’i Zedekia, mpanjakan’ny Joda;

⁴ary asaivo lazainy amin’ny tompony avy hoe: Izao no lazain’Andriamanitra, Tompon’izao rehetra izao, Andriamanitry ny Israely: Izao no holazainareo amin’ny tomponareo:

⁵Izaho no nanao ny tany sy ny olona ary ny biby izay eo aminy tamin’ny heriko lehibe sy tamin’ny sandriko nitsotra; ary nomeko ho an’izay sitraky ny foko ny tany.

⁶Ary ankehitriny, Izaho no nanolotra ireto tany rehetra ireto ho eo an-tanan’i Nebokadnezara, mpanjakan’i Babilona, mpanompoko; eny, na dia ny bibidia aza dia efa nomeko hanompo azy koa.

⁷Ary ny firenena rehetra dia hanompo azy sy ny zanany ary ny zafiny ambara-pahatongan’ny fotoana hamaliana ny tanin’izy io kosa, dia hampanompoin’ny firenena maro sy ny mpanjaka lehibe izy.

⁸Izay firenena na fanjakana tsy mety manompo an’i Nebokadnezara, mpanjakan’i Babilona, ary tsy mety mampiditra ny vozony eo amin’ny ziogan’ny mpanjakan’i Babilona, dia hovaliko amin’ny sabatra sy ny mosary ary ny areti-mandringana izany firenena izany, hoy NY TOMPO, ambara-pandringako azy amin’ny tanany.

⁹Aza mihaino ny mpaminaninareo ianareo, na ny mpisikidinareo, na ny nofinareo, na ny mpanandronareo, na ny mpilalao odinareo, izay miteny aminareo hoe: Tsy hanompo ny mpanjakan’i Babilona ianareo.

¹⁰Fa lainga no nosaininy aminareo mba hamindrana anareo ho lavitra ny taninareo, dia horoahiko ianareo ka ho ringana.

¹¹Fa izay firenena mampiditra ny vozony eo amin’ny ziogan’ny mpanjakan’i Babilona kosa ka manompo azy dia havelako hitoetra amin’ny taniny ihany, hoy NY TOMPO, ka hiasa izany izy sady honina ao.

¹²Ary i Zedekia, mpanjakan’ny Joda, koa dia efa nilazako araka izany teny rehetra izany hoe: Ampidiro eo amin’ny ziogan’ny mpanjakan’i Babilona ny vozonareo ka manompoa azy sy ny vahoakany, dia ho velona ianareo.

¹³Nahoana no ho fatin’ny sabatra sy ny mosary ary ny areti-mandringana ianareo, dia ianao mbamin’ny vahoakanao, araka ny nolazain’NY TOMPO ny amin’ny firenena izay tsy mety manompo ny mpanjakan’i Babilona?

¹⁴Koa aza mihaino ny tenin’ny mpaminany izay miteny aminareo hoe: Tsy hanompo ny mpanjakan’i Babilona ianareo! Fa lainga no ambaran’ireo aminareo.

¹⁵Fa tsy naniraka azy Aho, hoy NY TOMPO, nefa misandoka ho mpaminany amin’ny anarako ihany izy, mba handroahako anareo sy hahalany ringana anareo, dia ianareo sy ny mpaminany izay maminany aminareo.

¹⁶Ary ny mpisorona sy ity firenena rehetra ity dia efa nilazako hoe: Izao no lazain’NY TOMPO: Aza mihaino ny tenin’ny mpaminaninareo izay maminany aminareo hoe: Efa hampodina haingana avy any Babilona izao ny fanaky ny tranon’NY TOMPO! Fa lainga no ambarany aminareo ho faminaniana.

¹⁷Aza mihaino azy, fa manompoa ny mpanjakan’i Babilona, dia ho velona ianareo; fa nahoana no ho rava ity tanàna ity?

¹⁸Fa raha mpaminany tokoa ireo, ary raha ao aminy tokoa ny tenin’NY TOMPO dia aoka hifona amin’Andriamanitra, Tompon’izao rehetra izao, Andriamanitry ny Israely, izy, mba tsy ho lasa ho any Babilona koa ny fanaka sisa ao amin’ny tranon’NY TOMPO sy ao an-tranon’ny mpanjakan’ny Joda sy ato Jerosalema.

¹⁹Fa izao no lazain’Andriamanitra, Tompon’izao rehetra izao, ny amin’ny andry sy ny koveta sy ny fitoerana koveta ary ny amin’ny fanaka hafa izay mbola sisa amin’ity tanàna ity,

²⁰dia izay tsy nalain’i Nebokadnezara, mpanjakan’i Babilona, fony izy nitondra an’i Jekonia, zanak’i Joiakima, mpanjakan’ny Joda, ho babo avy teto Jerosalema ho any Babilona, mbamin’ny manankaja rehetra amin’ny Joda sy Jerosalema,

²¹eny, izao no lazain’Andriamanitra, Tompon’izao rehetra izao, Andriamanitry ny Israely, ny amin’ny fanaka izay sisa ao amin’ny tranon’NY TOMPO sy ao an-tranon’ny mpanjakan’ny Joda sy ato Jerosalema:

²²Ho any Babilona no hitondrana ireo sady hitoetra any izy ambara-pahatongan’ny andro hamangiako azy, hoy NY TOMPO, avy eo vao hoentiko miakatra izy ka hampodiko amin’ity tanàna ity.