Read La Bible en Malgache Jeremia 37 Bible Online

Jeremia 37 - La Bible en Malgache bible

Jeremia 37

¹I Zedekia mpanjaka, zanak’i Josia, no nanjaka nandimby an’i Jekonia, zanak’i Joiakima, fa nampanjakain’i Nebokadnezara, mpanjakan’i Babilona, tao amin’ny tanin’ny Joda izy;

²nefa na izy, na ny mpanompony, na ny vahoaka dia samy tsy nihaino ny tenin’NY TOMPO, izay nampilazainy an’i Jeremia mpaminany.

³Ary i Zedekia mpanjaka dia naniraka an’i Jehokala, zanak’i Selemia, sy i Zefania, zanak’i Mahaseia, mpisorona, ho any amin’i Jeremia mpaminany hiteny hoe: Mba mivavaha re ho anay amin’NY TOMPO Andriamanitsika!

⁴Tamin’izany dia mbola afaka nivezivezy teo amin’ny olona ihany i Jeremia; fa tsy mbola nataony tao an-tranomaizina izy.

⁵Ary efa niainga avy tany Ejipta ny miaramilan’i Farao ka raha nahare izany ny Kaldeana izay nanao fahirano an’i Jerosalema, dia niala tao Jerosalema.

⁶Dia tonga tamin’i Jeremia mpaminany ny tenin’NY TOMPO hoe:

⁷Izao no lazain’NY TOMPO, Andriamanitry ny Israely: Izao no lazaonareo amin’ny mpanjakan’ny Joda, izay naniraka anareo hankaty Amiko mba hanontany Ahy: Indro, ny miaramilan’i Farao, izay efa niainga hamonjy anareo, dia hiverina ho any Ejipta taniny;

⁸fa ho avy indray ny Kaldeana dia hamely ity tanàna ity sady haka azy ary handoro azy amin’ny afo.

⁹Izao no lazain’NY TOMPO: Aza mamita-tena foana ianareo ka miteny hoe: Hiala amintsika tokoa ny Kaldeana; fa tsy hiala izy tsy akory.

¹⁰Fa na dia mamely ny miaramilan’ny Kaldeana rehetra izay miady aminareo aza ianareo ka izay voalefona no ho sisa velona dia samy hitsangana avy ao anaty tranolainy ireo ka handoro ity tanàna ity amin’ny afo.

¹¹Ary raha niala tany Jerosalema ny miaramilan’ny Kaldeana noho ny amin’ny miaramilan’i Farao

¹²dia nivoaka avy tao Jerosalema i Jeremia hankany amin’ny tanin’ny Benjamina mba handray izay anjara lovany eo amin’ny vahoaka.

¹³Nony tonga teo am-bavahadin’i Benjamina izy dia indro, ny lehiben’ny mpiambina, atao hoe Jiria, zanak’i Selemia, zanak’i Hanania, no teo; dia nisambotra an’i Jeremia mpaminany izy ka niteny hoe: Miray tetika amin’ny Kaldeana ianao.

¹⁴Fa hoy i Jeremia: Lainga izany. Tsy miray tetika amin’ny Kaldeana aho. Nefa tsy nino azy ireo ka nosamborin’i Jiria ihany i Jeremia ary noentiny ho ao amin’ny mpanapaka.

¹⁵Ary tezitra tamin’i Jeremia ny mpanapaka ka nikapoka azy, dia nandatsaka azy tao an-tranomaizina tao amin’ny tranon’i Jonatana mpitantsoratra; fa izany no nataony tranomaizina.

¹⁶Ary naiditra tao an-tranomaizina, tao amin’ny efitra iray, i Jeremia, ary efa nitoetra tao andro maro izy.

¹⁷Ary nandefa iraka haka azy i Zedekia mpanjaka; dia nanontany azy mangingina tao an-tranony ny mpanjaka hoe: Moa misy teny avy tamin’NY TOMPO tokoa va? Dia hoy i Jeremia: Eny, misy; ary hoy koa izy: Hatolotra eo an-tanan’ny mpanjakan’i Babilona ianao.

¹⁸Hoy koa i Jeremia tamin’i Zedekia mpanjaka: Inona no ratsy nataoko taminao, na tamin’ny mpanomponao, na tamin’ity firenena ity, no dia nataonareo an-tranomaizina aho?

¹⁹Aiza moa ireo mpaminaninareo izay naminany taminareo hoe: Tsy ho avy hiady aminareo na hamely ity tany ity ny mpanjakan’i Babilona?

²⁰Koa trara antitra ianao, ry tompokolahy mpanjaka, henoy kely ange! Miankohoka eto anatrehanao aho, raiso ny fiangaviako ka aza averina ho ao amin’ny tranon’i Jonatana mpitantsoratra aho, fandrao dia maty ao.

²¹Dia nasain’i Zedekia mpanjaka nataony teo amin’ny kianjan’ny trano fiambenana i Jeremia ka nasainy nomena mofo iray isanandro avy any amin’ny fitoeran’ny mpanao mofo izy, ambara-pahalanin’ny mofo rehetra tao an-tanàna. Toy izany no nitoeran’i Jeremia teo amin’ny kianjan’ny trano fiambenana.