Read La Bible en Malgache Jeremia 39 Bible Online

Jeremia 39 - La Bible en Malgache bible

Jeremia 39

¹Tamin’ny volana fahafolo tamin’ny taona fahasivy nanjakan’i Zedekia, mpanjakan’ny Joda, no nahatongavan’i Nebokadnezara, mpanjakan’i Babilona, sy ny miaramilany rehetra, hamely an’i Jerosalema ka nanao fahirano azy.

²Tamin’ny andro fahasivy tamin’ny volana fahefatra, tamin’ny taona fahiraika amby folo nanjakan’i Zedekia dia nisy voabanga ny tanàna,

³dia niditra ny mpanapaky ny mpanjakan’i Babilona rehetra ka nipetraka teo amin’ny vavahady afovoany, dia i Nergala-Sarezera, i Samgara-Nebo, i Sara-Sekima, Raba-Sarisa, i Nergala-Sarezera, ary Raba-Magy, mbamin’ny sisa rehetra amin’ny mpanapaky ny mpanjakan’i Babilona.

⁴Ary rehefa nahita ireo i Zedekia, mpanjakan’ny Joda, sy ny miaramilany rehetra, dia nandositra ka lasa nandeha alina niala tao an-tanàna, nahazo ny lalana mankany amin’ny sahan’ny mpanjaka, tamin’ny vavahady eo anelanelan’ny manda roa; ary lasa nivoaka nankany amin’ny lalana mankeny amin’ny tany ngazana izy.

⁵Nanenjika azy anefa ny miaramilan’ny Kaldeana ka nahatratra an’i Zedekia teny amin’ny tany ngazana any Jeriko; ary nony azony izy dia noentiny niakatra ho any amin’i Nebokadnezara, mpanjakan’i Babilona, tao Ribla tao amin’ny tany Hamata; dia notsarainy tao izy.

⁶Ary ny zanakalahin’i Zedekia dia novonoin’ny mpanjakan’i Babilona tao Ribla teo imason’ny rainy; ny manankaja rehetra tamin’ny Joda koa dia novonoin’ny mpanjakan’i Babilona.

⁷Nopotsiriny ny mason’i Zedekia, dia nafatony tamin’ny gadra varahina izy hoentiny any Babilona.

⁸Nodoran’ny Kaldeana tamin’ny afo ny tranon’ny mpanjaka sy ny tranon’ny vahoaka, ary noravany ny mandan’i Jerosalema.

⁹Ary ny olona sisa tao an-tanàna sy izay efa nanatona azy ary ny vahoaka sisa koa dia noentin’i Nebozaradana, lehiben’ny mpiambina, ho babo tany Babilona.

¹⁰Na izany aza, ny olona mahantra sasantsasany izay tsy nanana na inona na inona kosa dia nisy ihany ny navelan’i Nebozaradana, lehiben’ny mpiambina, tao amin’ny tanin’ny Joda sady nomeny tanim-boaloboka sy tanimboly tamin’io andro io ihany.

¹¹Ary i Nebokadnezara, mpanjakan’i Babilona, dia nanome teny an’i Nebozaradana, lehiben’ny mpiambina, ny amin’i Jeremia hoe:

¹²Ento izy ka tandremo tsara, fa aza asian-dratsy; fa araka izay lazainy aminao no tanteraho aminy.

¹³Ary i Nebozaradana, lehiben’ny mpiambina, i Nebosazbana, i Raba-Sarisa, i Nergala-Sarezera, i Raba-Magy ary ny mpanapaky ny mpanjakan’i Babilona rehetra,

¹⁴dia nandefa iraka haka an’i Jeremia teo amin’ny kianjan’ny trano fiambenana ka nanolotra azy an’i Gedalia, zanak’i Ahikama, zanak’i Safana, mba hoentiny any an-trano; dia niara-nitoetra tamin’ny olona tamin’izay izy.

¹⁵Tonga tamin’i Jeremia ny tenin’NY TOMPO, fony izy mbola voatazona tao amin’ny kianjan’ny trano fiambenana ihany hoe:

¹⁶Mandehana ka lazao amin’i Ebeda-Meleka kosita hoe: Izao no lazain’Andriamanitra, Tompon’izao rehetra izao, Andriamanitry ny Israely: Indro, hotoviko amin’ity tanàna ity ny teniko hahatonga loza, fa tsy soa; ary ho tanteraka eo imasonao ireo amin’izany andro izany.

¹⁷Nefa hovonjeko ianao amin’izany andro izany, hoy NY TOMPO, fa tsy mba hatolotra eo an-tanan’ny olona izay atahoranao.

¹⁸Fa hovonjeko tokoa ianao ka tsy ho lavon-tsabatra; eny, ny ainao no ho babonao, satria natoky Ahy ianao, hoy NY TOMPO.