Read La Bible en Malgache Jeremia 42 Bible Online

Jeremia 42 - La Bible en Malgache bible

Jeremia 42

¹Ary ny mpifehy ny miaramila rehetra sy i Johanana, zanak’i Karea, ary i Jazania, zanak’i Hosaia, mbamin’ny vahoaka rehetra, na kely na lehibe, dia nanatona

²ka niteny tamin’i Jeremia mpaminany hoe: Miangavy anao izahay, aoka hoborahina eto anatrehanao ny fifonanay, ary mba mivavaha re ho anay amin’NY TOMPO Andriamanitrao, dia ireto sisa rehetra ireto, fa vitsy izahay no sisa, na dia maro aza fahiny, dia araka izao hitan’ny masonao izao,

³mba hambaran’NY TOMPO Andriamanitrao anay izay lalana mety halehanay sy izay zavatra tokony hataonay.

⁴Dia hoy i Jeremia mpaminany taminy: Efa reko izany; koa indro, hivavaka amin’NY TOMPO Andriamanitrareo ary aho araka ny teninareo; ary ny teny rehetra izay havalin’NY TOMPO anareo dia hambarako anareo, fa tsy hisy hafeniko.

⁵Dia hoy izy tamin’i Jeremia: NY TOMPO no aoka ho vavolombelona marina sy mahatoky amintsika raha tsy manatanteraka araka ny teny rehetra izay anirahan’NY TOMPO Andriamanitrao anao aminay izahay.

⁶Na ho soa, na ho ratsy, dia hohenoinay ny feon’NY TOMPO Andriamanitray, izay nanirahanay anao, mba hahasoa anay, raha mihaino ny feon’NY TOMPO Andriamanitray izahay.

⁷Nony afaka hafoloana dia tonga tamin’i Jeremia ny tenin’NY TOMPO.

⁸Ary izy dia niantso an’i Johanana, zanak’i Karea, sy ny mpifehy ny miaramila rehetra izay teo aminy mbamin’ny olona rehetra, na kely na lehibe,

⁹ka niteny taminy hoe: Izao no lazain’NY TOMPO, Andriamanitry ny Israely, izay nanirahanareo ahy mba hanaborahako eo anatrehany ny fifonanareo:

¹⁰Raha mbola honina amin’ity tany ity ihany ianareo dia haoriko ianareo fa tsy horavako, ary hamboleko ianareo fa tsy hongotako; fa manenina Aho ny amin’ny loza namelezako anareo.

¹¹Aza matahotra ny mpanjakan’i Babilona izay atahoranareo; eny, aza matahotra azy, hoy NY TOMPO, fa momba anareo Aho ka hamonjy sy hanafaka anareo amin’ny tanany.

¹²Ary hataoko mahita famindrampo ianareo, dia hamindra fo aminareo izy ka hampody anareo ho any amin’ny taninareo.

¹³Fa raha hoy kosa ianareo: Tsy honina amin’ity tany ity izahay ka tsy hihaino ny feon’NY TOMPO Andriamanitrareo ianareo

¹⁴fa miteny hoe: Tsia; hankany amin’ny tany Ejipta izahay, fa any no tsy hahitanay ady, na handrenesanay ny feon’ny anjomara na hahitanay mosary, ka any no honenanay,

¹⁵dia mihainoa ny tenin’NY TOMPO ankehitriny ianareo izay sisa amin’ny Joda: Izao no lazain’Andriamanitra, Tompon’izao rehetra izao, Andriamanitry ny Israely: Raha mikiry hankany Ejipta ihany ianareo ka mandeha hivahiny any

¹⁶dia hahatratra anareo any amin’ny tany Ejipta ny sabatra izay atahoranareo, ary ny mosary izay ahinareo no hanjohy anareo any amin’ny tany Ejipta, ary any no hahafaty anareo.

¹⁷Ary ny olona rehetra izay mikiry hankany Ejipta hivahiny any dia ho fatin’ny sabatra sy ny mosary ary ny areti-mandringana any; ary tsy hisy sisa ho afa-mandositra ny loza izay hataoko mihatra aminy.

¹⁸Fa izao no lazain’Andriamanitra, Tompon’izao rehetra izao, Andriamanitry ny Israely: Toy ny nampidinana ny fahatezerako sy ny fahavinirako tamin’ny mponina any Jerosalema dia toy izany no hampidinana ny fahatezerako aminareo raha mankany Ejipta ianareo; ary ho fianianana sy ho figagana ary ho fanozonana sy ho fandatsa ianareo, sady tsy hahita ity tany ity intsony.

¹⁹NY TOMPO efa nilaza taminareo, ry sisa amin’ny Joda hoe: Aza mankany Ejipta ianareo; aoka ho fantatrareo tokoa fa efa nanariko ianareo androany.

²⁰Kanjo namita-tena ihany ianareo tamin’ny nanirahanareo ahy ho any amin’NY TOMPO Andriamanitrareo hiteny hoe: Mba mivavaha re ho anay amin’NY TOMPO Andriamanitsika, ary izay rehetra holazain’NY TOMPO Andriamanitsika dia ambarao aminay fa hataonay.

²¹Ary efa nambarako taminareo androany; nefa tsy nihaino ny feon’NY TOMPO Andriamanitrareo ianareo ny amin’izay zavatra nanirahany ahy ho aminareo.

²²Koa aoka ho fantatrareo marimarina fa ho fatin-tsabatra sy mosary ary areti-mandringana ianareo any amin’ny tany izay tianareo hivahiniana.