Read La Bible en Malgache Jeremia 44 Bible Online

Jeremia 44 - La Bible en Malgache bible

Jeremia 44

¹Ny teny izay tonga tamin’i Jeremia ho amin’ny Jiosy* rehetra izay nonina tany amin’ny tany Ejipta, dia izay nonina tao Migdola, tao Tapanesa, tao Nofa, ary tany amin’ny tany Patrosa.

²Izao no lazain’Andriamanitra, Tompon’izao rehetra izao, Andriamanitry ny Israely: Efa nahita ny loza rehetra izay nataoko nihatra tamin’i Jerosalema sy ny tanànan’ny Joda rehetra ianareo; ary indro, efa tany lao ireo ankehitriny ka tsy misy olona monina intsony ao aminy,

³noho ny ratsy nataony nampahatezitra Azy tamin’ny nandehanany nandoro ditin-kazo manitra sy nanompo andriamanitra hafa izay tsy fantany, na izy, na ianareo, na ny razanareo.

⁴Ary naniraka ny mpaminany mpanompoko rehetra taminareo Aho, eny, nifoha vao maraina Aho ka naniraka azy hiteny hoe: Miangavy anareo aho, aza manao izany fahavetavetana halako izany.

⁵Nefa tsy nihaino izy na nanongilana ny sofiny hialany amin’ny haratsiany tsy handoro ditin-kazo manitra ho an’ny andriamanitra hafa.

⁶Dia naidina ny fahavinirako sy ny fahatezerako, eny, nandoro ny tanànan’ny Joda sy ny teny amin’ny lalamben’i Jerosalema izany ka rava sy lao ireny tahaka ny amin’izao anio izao.

⁷Koa izao no lazain’NY TOMPO, Andriamanitra Tompon’izao rehetra izao, Andriamanitry ny Israely: Ahoana no anaovanareo izao ratsy lehibe maningotra ny ainareo izao, haharingana ny lehilahy sy ny vehivavy, ny ankizy madinika sy ny zaza minono ao amin’ny Joda ka tsy hisy miangana anareo?

⁸Mampahatezitra Ahy ianareo amin’ny asan’ny tananareo sy amin’ny andoroana ditin-kazo manitra ho an’ny andriamanitra hafa any amin’ny tany Ejipta izay alehanareo hivahiniana. Izany no haharingana anareo ka hahatonga anareo ho fanozonana sy ho fandatsa any amin’ny firenena rehetra ambonin’ny tany?

⁹Moa hadinonareo va ny ratsy nataon’ny razanareo sy ny mpanjakan’ny Joda sy ny vadiny ary ny tenanareo sy ny vadinareo, dia izay nataony tany amin’ny tanin’ny Joda sy teny amin’ny lalamben’i Jerosalema?

¹⁰Tsy mbola torotoro fo izy na dia mandraka androany aza, sady tsy natahotra na nandeha araka ny lalànako sy ny didiko, izay napetrako teo anoloanareo sy teo anoloan’ny razanareo.

¹¹Koa izao no lazain’Andriamanitra, Tompon’izao rehetra izao, Andriamanitry ny Israely: Indro, hanandrina anareo Aho hahatonga loza haharingana ny Joda rehetra.

¹²Ary halaiko ny sisa amin’ny Joda, izay nikiry hankany amin’ny tany Ejipta hivahiny any, ka ho lany ritra izy rehetra; any amin’ny tany Ejipta no hahalavoany, samy ho ringan’ny sabatra sy ny mosary, eny, izy rehetra na ny kely na ny lehibe dia samy ho fatin-tsabatra sy mosary ka ho tonga fianianana sy figagana sy fanozonana ary fandatsa.

¹³Fa hovaliko toy ny namaliako an’i Jerosalema, izay monina any amin’ny tany Ejipta, dia amin’ny sabatra sy ny mosary ary ny areti-mandringana.

¹⁴Ary ny sisa amin’ny Joda izay lasa nivahiny any Ejipta dia tsy hisy ho afa-mandositra ka ho tafaverina any amin’ny tanin’ny Joda, izay niriny hiverenana mba honenany indray, afa-tsy izay vitsy sendra afa-mandositra ihany.

¹⁵Ary ny lehilahy rehetra izay nahalala fa ny vadiny efa nandoro ditin-kazo manitra ho an’ny andriamanitra hafa, sy ny vehivavy rehetra izay nitsangana teo, dia vahoaka be dia be, ary ny olona rehetra izay nonina tany amin’ny tany Ejipta, tao Patrosa, dia namaly an’i Jeremia hoe:

¹⁶Raha ny amin’ilay teny voalazanao taminay tamin’ny anaran’NY TOMPO dia tsy hihaino anao izahay.

¹⁷Fa hotanterahinay tokoa ny teny rehetra izay naloaky ny vavanay, dia ny handoro ditin-kazo manitra ho an’ny mpanjakavavin’ny lanitra sy ny hanidina fanatitra aidina ho azy, toy ny efa nataonay sy ny razanay sy ny mpanjakanay ary ny mpanapaka anay tany amin’ny tanànan’ny Joda sy teny amin’ny lalamben’i Jerosalema; fa fahizany dia voky hanina izahay sady nambinina ary tsy nahita loza.

¹⁸Fa hatramin’izay nitsaharanay tsy nandoro ditin-kazo manitra ho an’ny mpanjakavavin’ny lanitra sy tsy nanidinana fanatitra aidina ho azy izay dia saika tsy nanana na inona na inona akory izahay sady ringan’ny sabatra sy ny mosary.

¹⁹Ary raha nandoro ditin-kazo manitra ho an’ny mpanjakavavin’ny lanitra izahay sy nanidina fanatitra aidina ho azy dia moa tsy fantatry ny vadinay va ny nanaovanay mofo hasiana ny sariny sy ny nanidinanay fanatitra aidina ho azy?

²⁰Ary hoy i Jeremia tamin’ny olona rehetra, na ny lehilahy na ny vehivavy, dia ny olona rehetra izay namaly azy:

²¹Ny nandoroanareo ditin-kazo manitra tany an-tanànan’ny Joda sy tany an-dalamben’i Jerosalema, dia ianareo sy ny razanareo sy ny mpanjakanareo sy ny mpanapaka anareo mbamin’ny vahoaka, moa tsy notsarovan’NY TOMPO va izany, ary tsy tao an-tsainy va?

²²Koa dia tsy nahalefitra intsony NY TOMPO noho ny ratsy nataonareo sy noho ny fahavetavetana nataonareo; koa izany no nanaovana ny taninareo ho lao sy ho figagana ary ho fanozonana ka tsy misy mponina, tahaka ny amin’izao anio izao.

²³Noho ny nandoroanareo ditin-kazo manitra sy ny nanotanareo tamin’NY TOMPO, fa tsy nihaino ny feon’NY TOMPO ianareo, na nandeha araka ny lalànany sy ny didiny ary ny teny vavolombelony, dia izany no nahatonga izao loza izao taminareo tahaka ny amin’izao anio izao.

²⁴Hoy koa i Jeremia tamin’ny olona rehetra sy tamin’ny vehivavy rehetra: Mihainoa ny tenin’NY TOMPO, ry Joda rehetra, izay atỳ amin’ny tany Ejipta:

²⁵Izao no lazain’Andriamanitra, Tompon’izao rehetra izao, Andriamanitry ny Israely: Samy niteny tamin’ny vavanareo ianareo sy ny vadinareo sady nanatanteraka tamin’ny tananareo ka niteny hoe: Hanefa tokoa izay efa nivoadianay izahay ka handoro ditin-kazo manitra ho an’ny mpanjakavavin’ny lanitra sy hanidina fanatitra aidina ho azy; eny, hefainareo tokoa ny voadinareo sady hataonareo tanteraka.

²⁶Koa henoinareo ny tenin’NY TOMPO, ry Joda rehetra, izay monina atỳ amin’ny tany Ejipta: Indro Aho efa nianiana tamin’ny anarako lehibe, hoy NY TOMPO, fa tsy hotononin’ny vavan’ny lehilahy amin’ny Joda manerana ny tany Ejipta intsony ny anarako ka hilazany hoe: Raha velona koa Andriamanitra Tompo.

²⁷Indro, miambina anareo Aho hahatonga loza fa tsy soa; ary ny lehilahy rehetra amin’ny Joda, izay atỳ amin’ny tany Ejipta, dia ho ringan’ny sabatra sy ny mosary mandra-pahalany ritra azy.

²⁸Ary izay afaka mandositra ny sabatra dia ho tafaverina avy atỳ amin’ny tany Ejipta ho any amin’ny tanin’ny Joda, ho vitsy foana anefa ireny; ary ny sisa amin’ny Joda rehetra izay mankany amin’ny tany Ejipta hivahiny any dia hahafantatra izay ho to teny, na ho Izaho, na ho izy.

²⁹Ary izao no famantarana ho anareo, hoy NY TOMPO, fa hovaliko eto amin’ity tany ity ianareo, mba hahafantaranareo fa to tokoa ny teniko hahatonga loza aminareo:

³⁰Izao no lazain’NY TOMPO: Indro, i Farao-Hofra, mpanjakan’i Ejipta, dia hatolotro eo an-tanan’ny fahavalony sy eo an-tanan’izay mitady ny ainy, toy ny efa nanolorako an’i Zedekia, mpanjakan’ny Joda, ho eo an-tanan’i Nebokadnezara, mpanjakan’i Babilona, izay fahavalony nitady ny ainy.