Read La Bible en Malgache Jeremia 46 Bible Online

Jeremia 46 - La Bible en Malgache bible

Jeremia 46

¹Ny tenin’NY TOMPO izay tonga tamin’i Jeremia mpaminany ny amin’ny Jentilisa*.

²Ny amin’i Ejipta. Ny amin’ny miaramilan’i Farao-Neko, mpanjakan’i Ejipta, izay teny amoron’ny ony Eofrata, tany Karkemisy, dia ilay resin’i Nebokadnezara, mpanjakan’i Babilona, tamin’ny taona fahefatra nanjakan’i Joiakima, zanak’i Josia, mpanjakan’ny Joda:

³Mivonòna amin’ny ampinga kely sy ny ampinga lehibe ka mandrosoa hiady;

⁴fehezo amin’ny kalesy fitondra miady ny soavaly ary itaingeno ny soavaly fitaingina; mijoroa tsara ianareo ka samia misatroka fiarovan-doha; fotsio ny lefona, miakanjoa ny akanjo fiarovan-tratra.

⁵Indrisy inona ity hitako! Raiki-tahotra sy miamboho izy, ary ny maheriny aza dia efa ripaka sady miezaka mandositra izy ka tsy miherika akory; fa misy fampangorohoroana manodidina, hoy NY TOMPO.

⁶Tsy ho afa-mandositra ny haingam-pandeha, na ho afaka ny mahery; any avaratra eo amoron’ny ony Eofrata no hahatafintohina sy hahalavo azy.

⁷Iza moa izato mizotra tahaka an’i Neily ary misamboaravoara toy ny renirano ny onjany?

⁸Ejipta dia mizotra tahaka an’i Neily sady misamboaravoara toy ny renirano ny onjany; ary hoy izy: Hizotra aho ka hanafotra ny tany; haringako ny tanàna sy ny mponina ao aminy.

⁹Miakara, ianareo soavaly, ary miriota toy ny adala, ianareo kalesy fitondra miady; ary aoka hiainga ny lehilahy mahery, dia ny Kosy sy ny Pota izay mitana ampinga, ary ny Loda izay mitana sy manenjana tsipìka.

¹⁰Fa izao andro izao dia an’NY TOMPO, Andriamanitra Tompon’izao rehetra izao, ho andro famaliana hamaliany ny fahavalony; dia hihinana ny sabatra ka ho voky ary ho mamon’ny ran’ireo; fa ny Tompo, dia NY TOMPO, Andriamanitra Tompon’izao rehetra izao, no mamono zavatra hatao fanatitra any amin’ny tany avaratra eo amoron’ny ony Eofrata.

¹¹Miakara any Gileada ka makà balisama, ry Ejipta zanakavavy virijiny; foana ny nanaovanao fanafody maro, fa tsy manana fanafody hanasitranana ny ferinao ianao.

¹²Efa ren’ny firenena ny henatrao ary ny fiantsoantsoanao dia nanenika ny tany; fa mifandona ny samy mahery ka miaraka lavo izy roa tonta.

¹³Ny teny izay nolazain’NY TOMPO tamin’i Jeremia mpaminany ny amin’ny hiavian’i Nebokadnezara, mpanjakan’i Babilona, hamely ny tany Ejipta.

¹⁴Ambaraonareo any Ejipta ary torio any Migdola, eny, torio any Nofa sy Tapanesa ka lazao hoe: Mijoroa tsara ianao ka miomàna; fa mandringana manodidina anao ny sabatra.

¹⁵Nahoana no voapaoka ny maherinao? Tsy nahafahatra izy satria NY TOMPO no nandroaka azy.

¹⁶Efa nahatafintohina ny maro Izy ka lavo mifanindry ireo; dia hoy ireo: Mitsangàna ka andeha isika hiverina ho any amin’ny firenentsika sy ho any amin’ny tany nahaterahantsika ho afaka amin’ny sabatra mandoza.

¹⁷Nantsoina hoe: Tabataba foana i Farao, mpanjakan’i Ejipta, nefa nandiso ny fotoana nifanarahana izy.

¹⁸Raha velona koa Aho, hoy ny Mpanjaka, ny anarany dia Andriamanitra, Tompon’izao rehetra izao: Tahaka an’i Tabara amin’ny tendrombohitra sy tahaka an’i Karmela ao amoron-dranomasina, dia ho tahaka izany no hiaviany.

¹⁹Ry mponina ao Ejipta, ampirimo ny entana hoentinao any amin’ny fahababoana; fa ho tonga tany lao Nofa, eny, hodorana izy ka tsy hisy mponina.

²⁰Ejipta dia tahaka ny ombivavy kely tena tsara tarehy; Fa injay tamy! Eny, tamy ny fihitra avy any avaratra!

²¹Na dia ny olona mpikarama an’ady ao aminy aza, izay tahaka ny ombilahy kely mifahy, ireny koa dia mihodina ka samy mandositra avokoa; tsy mahajanona izy fa tonga aminy ny andro hahitany loza, dia ny andro hamaliana azy.

²²Ny feony dia toy ny fikasaotsaoky ny menarana mandeha; fa mandeha mitondra miaramila izy ka avy hamely azy amin’ny famaky toy ny mpikapa hazo.

²³Kapainy ny alany, hoy NY TOMPO, satria efa nikirindro loatra; fa maro noho ny valala izy ka tsy tambo isaina.

²⁴Ho afa-baraka i Ejipta zanakavavy, hatolotra eo an-tanan’ny olona any avaratra izy.

²⁵Ary hoy Andriamanitra, Tompon’izao rehetra izao, Andriamanitry ny Israely: Indro, hovaliko i Amona avy any No, ary i Farao sy i Ejipta mbamin’ny andriamaniny sy ny mpanjakany, dia i Farao sy izay rehetra matoky azy;

²⁶ary hatolotro eo an-tanan’izay mitady ny ainy izy, dia eo an-tanan’i Nebokadnezara, mpanjakan’i Babilona, sy eo an-tanan’ny mpanompony. Ary aorianan’izany, dia ho azo honenana toy ny tamin’ny andro fahiny ihany indray izy, hoy NY TOMPO.

²⁷Fa aza matahotra ianao, ry Jakoba mpanompoko, ary aza mivadi-po, ry Israely! Fa indro, hovonjeko avy any amin’ny tany lavitra ianao, ary ny taranakao avy any amin’ny tany nahababo azy; dia hiverina i Jakoba ka hiadana, eny, handry fehizay izy ka tsy hisy hanaitaitra azy.

²⁸Aza matahotra ianao, ry Jakoba mpanompoko, hoy NY TOMPO, fa momba anao Aho. Fa na dia levoniko aza ny firenena rehetra izay nandroahako anao dia tsy mba holevoniko ianao, nefa kosa mba hanariko araka ny fitsarako ihany ianao fa tsy dia havelako fotsiny.