Read La Bible en Malgache Jeremia 48 Bible Online

Jeremia 48 - La Bible en Malgache bible

Jeremia 48

¹Ny amin’i Moaba. Izao no lazain’Andriamanitra, Tompon’izao rehetra izao, Andriamanitry ny Israely: Nidiran-doza i Nebo fa rava! Mangaihay i Kiriataima fa azo; mangaihay i Misgaba sady raiki-tahotra.

²Tsy misy ho reharehan’i Moaba intsony; tao Hesbona no niheverany izay hampidi-doza aminy hoe: Andeha horavantsika tsy ho firenena intsony izy. Ho ringana koa ianao, ry Madmena, hanenjika anao ny sabatra.

³Injay misy feo fitarainana ao Horonaima hoe: Fandravana sy fandringanana be!

⁴Rava i Moaba, ny madinika ao dia mamoaka fitarainana.

⁵Fa miakatra mitomany tsy misy fiafarany eny amin’ny fiakarana Lohita izy; ary any amin’ny fidinana mankany Horonaima no andrenesana fitarainana mafy noho ny fandringanana.

⁶Mandosira, vonjeo ny ainareo ary aoka ho tahaka ny anjavidy any an-tany efitra ianareo.

⁷Fa noho ny nitokianao tamin’ny asanao sy ny harenanao dia ho voasambotra koa ianao; ary i Kemosy dia ho lasan-ko babo, dia ny mpisorony sy ny mpanapaka azy rehetra.

⁸Ary ho tonga ao amin’ny tanàna rehetra ny mpandringana ka tsy hisy tanàna tsy ho azo; ho simba koa ny lohasaha, ary ho rava ny tany lemaka, araka izay nolazain’NY TOMPO.

⁹Omeo elatra i Moaba fa hanidina izy ka ho lasa; ary ho lao ny tanànany ka tsy hisy mponina.

¹⁰Ho voaozona anie izay manao tsirambina foana ny asa asain’NY TOMPO atao! Eny, ho voaozona anie izay mihazona ny sabany tsy handatsa-dra!

¹¹Nandry fehizay i Moaba hatry ny fony izy mbola kely ka niotrika tao amin’ny faikany, fa tsy mba naidina nafindrafindra siny ary tsy mbola lasan-ko babo izy; koa izany no naharetan’ny tsirony ao aminy sy tsy niovan’ny fofony.

¹²Koa indro, avy ny andro, hoy NY TOMPO, izay hanirahako olona any aminy, hampihohoka ny fitoeran-divainy ka hanafoana ny fitoeran-divainy sady hanorotoro ny siny hoditrany.

¹³Ary ho menatra i Moaba noho ny amin’i Kemosy, toy ny nahamenatra ny taranak’Israely noho ny amin’i Betela tokiny.

¹⁴Ahoana no ilazanareo hoe: Lehilahy matanjaka sady mahery an’ady izahay?

¹⁵Rava i Moaba, fa ny tanànany dia efa levon’ny setroka ary nidina ho any amin’ny famonoana ny zatovony voafantina, hoy ny Mpanjaka, dia Andriamanitra, Tompon’izao rehetra izao no anarany.

¹⁶Efa antomotra ny loza hanjo an’i Moaba ary manatona haingana ny fahoriany.

¹⁷Mitomania azy ianareo rehetra izay manodidina azy sy ianareo rehetra izay mahalala ny anarany! Eny, lazao hoe: Indrisy! Tapaka ny tehina mafy sy ny tsorakazo tsara tarehy!

¹⁸Ry mponina ao Dibona zanakavavy, midìna hiala amin’ny voninahitrao ka mitoera ao amin’ny tany mangentana, fa ilay mandringana an’i Moaba dia miakatra hamely anao sady mandrava ny fiarovanao.

¹⁹Ry mponina any Aroera mijanòna eny an-dalambe ka mitazàna, ary izay mandositra, na lehilahy na vehivavy, dia anontanio hoe: Inona no nitranga?

²⁰Afa-baraka i Moaba, eny, raiki-tahotra izy; midradradradrà sy miantsoantsoa mafy ka ambaraonareo ao Arnona fa rava i Moaba.

²¹Ary ny fitsarana dia miakatra ao amin’ny tany lemaka, dia ao Holona, Jahaza, Mefata,

²²Dibona, Nebo, Bety-Diblataima,

²³Kiriataima, Bety-Gamola, Bety-Meona,

²⁴Keriota ary Bozra, eny, ny tanànan’i Moaba rehetra, na ny lavitra na ny akaiky.

²⁵Voakapa ny tandrok’i Moaba ary tapaka koa ny sandriny, hoy NY TOMPO.

²⁶Ataovy leon-divay izy fa niavonavona tamin’NY TOMPO; hihosinkosina amin’ny loany i Moaba sady mba ho tonga fihomehezana kosa.

²⁷Fa tsy efa nataonao ho fihomehezana va ny Israely? Moa hita fa naman’ny mpangalatra va izy no dia mihifikifika ianao isaky ny milaza azy?

²⁸Ry mponina any Moaba! Ilaozy ny tanàna ka mitoera any amin’ny harambato, ary aoka ho tahaka ny voromailala izay manao ny akaniny erỳ ampitan’ny hantsana ianao.

²⁹Efa renay ny fiavonavonan’i Moaba, fatra-piavonavona loatra mantsy izy, renay ny fireharehany sy ny fiavonavonany ary ny fiaingitrainginy sy ny avonavon’ny fony.

³⁰Izaho no mahalala ny vavany tafahoatra sy ny fibedibediny foana, hoy NY TOMPO; samy tsinontsinona ireny.

³¹Koa hidradradradra noho ny amin’i Moaba aho; eny, hitomany noho ny amin’i Moaba rehetra aho, ary hitsetra noho ny amin’ny mponina ao Kira-Haresa ny olona.

³²Mihoatra noho ny fitomanian’i Jazera no hitomaniako anao, ry voalobok’i Sibma, tafita ny ranomasina ny rantsanao ary tonga hatrany amin’ny ranomasin’i Jazera; ny mpandripaka dia tonga handripaka ny voankazonao masaka fahavaratra sy ny voalobokao.

³³Ary ny hafaliana sy ny faharavoravoana dia nesorina tamin’ny saha nahavokatra sy tamin’ny tany Moaba; ary nataoko tankina ny divay tamin’ny vata fanantazana ranom-boaloboka, tsy hisy intsony fihobiana rehefa manao fanitsakitsahana voaloboka, raha misy aza dia fihobiana tsy izy akory.

³⁴Ny fitarainan’i Hesbona dia re hatrany Elale sy Jahaza, hatrany Zoara ka hatrany Horonaima sy Eglata-Selisia; fa na dia ny ranon’i Nimrima aza dia ho ritra koa.

³⁵Ary hatsahatro ao Moaba koa izay miakatra hanatitra amin’ny toerana fanaovana sorona sy izay mandoro ditin-kazo manitra ho an’ny andriamaniny, hoy NY TOMPO.

³⁶Ary noho izany ny foko dia mitomany manao feon-tsodina noho ny amin’i Moaba, ary ny foko dia mitomany manao feon-tsodina noho ny amin’ny mponina ao Kira-Haresa, eny, noho izany dia levona ny harena be izay noharìny.

³⁷Fa nosolaina ny loha rehetra, voaharatra ny somotra rehetra, asiana tetika amin’ny tanana rehetra ary lamba fisaonana no amin’ny andilany.

³⁸Eny, amin’ny tampon-trano* rehetra any Moaba sy eny amin’ny kianja malalaka dia misy fisaonana avokoa; satria torotoroiko toy ny fanaka tsy misy ilàna azy intsony i Moaba, hoy NY TOMPO.

³⁹Indrisy! Raiki-tahotra izy! Midradradradrà! Indrisy! Efa miamboho i Moaba, mangaihay izy ka tonga mampihomehy sady mampatahotra ho an’izay rehetra manodidina azy.

⁴⁰Fa izao no lazain’NY TOMPO: Indro, hanidina toy ny voromahery izy ka hamelatra ny elany hipaoka an’i Moaba.

⁴¹Azo ny tanàna Keriota ary azo ny manda fiarovana, ary amin’izany andro izany ny fon’ny lehilahy maherin’i Moaba dia ho tahaka ny fon’ny vehivavy mihetsi-jaza.

⁴²Fa horavana tsy ho firenena intsony i Moaba satria niavonavona tamin’NY TOMPO.

⁴³Tahotra sy lavaka ary fandrika no mahazo anao, ry mponina any Moaba, hoy NY TOMPO.

⁴⁴Izay mandositra ny tahotra dia ho latsaka any an-davaka; ary izay miakatra avy any an-davaka dia ho voan’ny fandrika; fa hataoko tonga amin’i Moaba ny taona hamaliana azy, hoy NY TOMPO.

⁴⁵Ao amin’ny alokalok’i Hesbona no ijanonan’ny mpandositra satria lany hery ireny; kanjo misy afo mivoaka avy any Hesbona ary lelafo avy any Sihona ka mandevona ny sisin’i Moaba sy ny tampon-dohan’ny mpitabataba.

⁴⁶Idiran-doza ianao, ry Moaba! Ringana ny olon’i Kemosy! Fa ho babo ny zanakao lahy ary hosamborina ny zanakao vavy.

⁴⁷Nefa mbola hampodiko avy amin’ny fahababoana ihany i Moaba amin’ny ho avy, hoy NY TOMPO. Hatreto ny amin’ny fitsarana an’i Moaba.