Read La Bible en Malgache Jeremia 51 Bible Online

Jeremia 51 - La Bible en Malgache bible

Jeremia 51

¹Izao no lazain’NY TOMPO: Indro, hampirisihiko ny fanahin’ny mpandringana hamely an’i Babilona sy izay monina ao Leba-Kamay[7].

²Ary handefa iraka hafa firenena ho any Babilona Aho, izay hikororoka azy ka hahafoana ny taniny; fa hamely azy manodidina amin’ny andro fahoriana ireo.

³Izay manenjana tsipìka mbamin’izay miandranandrana amin’ny akanjo fiarovan-tratrany, dia aoka samy hasian’izay manenjana tsipìka; aza tsitsìnareo ny zatovony, aringano toy ny zavatra voaozona avokoa ny miaramilany rehetra

⁴mba hiampatrampatra any amin’ny tanin’ny Kaldeana ny faty, ary izay voatrobaka dia hiampatrampatra eny an-dalamben’i Babilona.

⁵Fa Andriamanitra, Tompon’izao rehetra izao, Andriamanitry ny Israely sy ny Joda, dia tsy hahafoy azy ireo ho mpitondratena, na dia henika ny fahotany amin’ny Iray Masin’ny Israely aza ny taniny.

⁶Mandosira hiala an’i Babilona ianareo, ary samia mamonjy ny ainareo avy; aoka tsy ho voaringana noho ny fahotany ianareo, fa izao no andro famalian’NY TOMPO; Izy no hamaly azy.

⁷Babilona dia kapoaka volamena teny an-tanan’NY TOMPO, izay nahamamo ny tany rehetra; efa nisotroan’ny firenena ny divainy, koa izany no nahavery saina ireny.

⁸Tampoka no naharavan’i Babilona sy nahatorotoro azy; idradradradrao izy; makà balisama hatao amin’ny feriny maharary azy, fa angamba ho sitrana ihany izy.

⁹Nitady hanasitrana an’i Babilona izahay, nefa tsy nety sitrana izy; afoizo izy ka andeha isika samy handeha ho any amin’ny tanintsika avy; fa mahatakatra ny lanitra ny helony ary mitehika amin’ny rahona.

¹⁰Nasehon’NY TOMPO ny fahamarinantsika; andeha ka aoka hambarantsika ao Ziona ny asan’NY TOMPO Andriamanitsika.

¹¹Lambolamboy ny zana-tsipìka, tano ny ampinga; NY TOMPO efa nanaitra ny fanahin’ny mpanjakan’ny Mediana; fa ny hamely an’i Babilona no nosaininy mba handringanana azy; famalian’NY TOMPO izany, eny, famaliana noho ny tempoliny.

¹²Manangàna faneva hamelezana ny eo akaikin’ny mandan’i Babilona; ataovy mafy ny fiambenana; alatsaho ny mpiambina, alamino ny vela-pandrika; fa NY TOMPO sady efa nisaina no nanatanteraka izay nolazainy ny amin’ny mponina any Babilona.

¹³Ianao izay monina eny amoron’ny ranobe sady manana harena be dia be, tonga ny fiafaranao ka tsy hisy intsony ny filanao harena.

¹⁴Andriamanitra, Tompon’izao rehetra izao nianiana tamin’ny tenany hoe: Hofenoiko olona maro toy ny valala tokoa ianao, ary ireny dia hanakora hamely anao.

¹⁵Tamin’ny heriny no nanaovany ny tany, tamin’ny fahendreny no nanorenany izao tontolo izao ary tamin’ny fisainany no namelarany ny lanitra.

¹⁶Raha mampirohondrohona ny rano any an-danitra Izy dia mampiakatra rahona avy tany amin’ny faran’ny tany; manao ny tselatra ho an’ny ranonorana Izy sady mamoaka ny rivotra avy amin’ny trano fitahirizany.

¹⁷Efa kentrina avokoa ny olona rehetra ka tsy manam-pahalalana; menatra ny mpanefy volamena rehetra noho ny amin’ny sarin-javatra voasokitra; fa fitaka ny sarin-javatra voarendrika satria tsy misy fofonaina ao aminy.

¹⁸Zava-poana ireny, dia asa mahatsikaiky foana; amin’ny andro hamaliana azy dia ho levona izy.

¹⁹Tsy mba tahaka ireo ny Anjaran’i Jakoba, fa mpamorona ny zavatra rehetra Izy; ary ny Israely no firenena lovany; Andriamanitra, Tompon’izao rehetra izao, no anarany.

²⁰Langilangiko sy fiadiako ianao; fa ianao no nentiko nanorotoro firenena; ianao no nentiko nandringana fanjakana;

²¹ianao no nentiko nanorotoro soavaly sy ny mpitaingina azy; ianao no nentiko nanorotoro ny kalesy fitondra miady sy ny mpitaingina azy;

²²ianao koa no nentiko nanorotoro ny lehilahy sy ny vehivavy; ianao no nentiko nanorotoro ny antitra sy ny tanora; ianao no nentiko nanorotoro ny zatovolahy sy ny zatovovavy;

²³ianao koa no nentiko nanorotoro ny mpiandry ondry sy ny andian’ondry; ianao no nentiko nanorotoro ny mpiasa tany sy ny ombiny miray zioga; ianao no nentiko nanorotoro ny governora sy ny lefiny.

²⁴Ary hampanodiaviko an’i Babilona sy ny mponina rehetra any Kaldea ny ratsy rehetra izay efa nataony tao Ziona* teo imasonareo, hoy NY TOMPO.

²⁵Indro mamely anao Aho, ry tendrombohitra ahitan-doza, izay mandringana ny tany rehetra, hoy NY TOMPO; ary hatsotrako ny tanako hamelezana anao, dia hakodiako hianjera amin’ny harambato ianao ka hataoko tendrombohitra mirehitra.

²⁶Ary tsy mba hakana vato hatao fehizoro ianao, na hatao vato fanorenana; fa ho lao mandrakizay ianao, hoy NY TOMPO.

²⁷Manangàna faneva eny amin’ny tany; mitsofa anjomara any amin’ny firenena; manendre firenena hamely azy; antsoy ny fanjakan’i Ararata sy i Miny ary i Askenaza hamely azy; asio mpitari-tafika hamely azy; mampiakara soavaly toy ny valala volovoloina.

²⁸Manendre firenena sy ireo mpanjakan’ny Mediana hamely azy; ao koa ny governora sy ny lefiny rehetra ary ny tany rehetra anjakany.

²⁹Mihorohoro sy mangovitra ny tany fa tanterahina amin’i Babilona ny fikasan’NY TOMPO rehetra mba hahatonga ny tany Babilona ho lao tsy misy mponina intsony.

³⁰Nitsahatra tamin’ny ady ny lehilahy maherin’i Babilona, nitoetra tao amin’ny manda fiarovana izy, lany ny heriny; tonga toy ny vehivavy izy; nodorana ny fonenany, tapaka ny hidiny.

³¹Mifamoivoy be ihany ny iraka mpihazakazaka ary mifamoivoy be ihany ny mpitondra teny mba hanambara amin’ny mpanjakan’i Babilona fa azo ny tanànany manontolo.

³²Ary efa azo ny lalana fiampitàna ary nodorany tamin’ny afo ny heniheny sady toran-kovitra ny miaramila.

³³Fa izao no lazain’Andriamanitra, Tompon’izao rehetra izao, Andriamanitry ny Israely: Babilona zanakavavy dia tahaka ny famoloana amin’ny andro anosena azy; ary vetivety foana dia ho avy ny andro hijinjana azy.

³⁴Efa lanin’i Nebokadnezara, mpanjakan’i Babilona, izahay; naringany izahay; napetrany toy ny vata tsy misy entana izahay; nateliny toy ny fitelin’ny mamba izahay; nivokisan’ny kibony ny zavatra tena tianay ka nandroaka anay izy.

³⁵Aoka ny mponina ao Ziona* hiteny hoe: Hanody an’i Babilona anie ny loza nanjo ahy sy nihatra tamin’ny nofoko! Ary aoka i Jerosalema hiteny hoe: Hanody ny mponina any Kaldea anie ny rako!

³⁶Koa izao no lazain’NY TOMPO: Indro, hisolo vava anao amin’ny adinao Aho sady hanao famaliana ho anao ary horitiko ny ranomasiny, ary hataoko tankina ny loharanony.

³⁷Ho tonga korontam-bato i Babilona, ho fonenan’ny amboadia, ho figagana sy ho zavatra mampisitrisitra ka tsy hisy mponina intsony.

³⁸Hiara-mierona toy ny liona tanora izy; hikaonkaona toy ny zanaky ny liona izy.

³⁹Raha mbola liana izy dia hanaovako fanasana ho azy ka hataoko mamo izy mba hiravoravo, dia hatory amin’ny torimaso mandrakizay izy ka tsy hifoha intsony, hoy NY TOMPO.

⁴⁰Hampidiniko toy ny zanak’ondry ho any amin’ny famonoana izy, ary toy ny ondrilahy mbamin’ny osilahy.

⁴¹Endre! Azo i Sesaka[8]! Ary azo ilay fideran’ny tany rehetra, endre! Tonga figagana any amin’ny firenena i Babilona.

⁴²Nanafotra an’i Babilona ny ranomasina; voasaron’ny habetsahan’ny onjany izy.

⁴³Ny tanànany dia lao sy karankaina ary ngazana, dia tany tsy onenan’ny olona sady tsy misy zanak’olombelona mamakivaky eo.

⁴⁴Ary i Bela dia hampijaliako any Babilona ka hasaiko haloany izay nateliny; ary tsy hitanjozotra hankany aminy intsony ny firenena; ny mandan’i Babilona dia hirodana.

⁴⁵Mivoaha avy ao afovoany ianareo, ry oloko, ary samia mamonjy ny ainareo avy ianareo mba tsy ho azon’ny firehetan’ny fahatezeran’NY TOMPO.

⁴⁶Ary andrao ho ketraka ny fonareo ka hatahotra ianareo noho ny tsaho miely amin’ny tany; fa amin’ny taona iray dia misy tsaho, ary amin’ny taona manaraka indray dia mbola hisy tsaho ihany koa; zava-doza fa mpanjakazaka no mamely mpanjakazaka hafa.

⁴⁷Koa indro, avy ny andro hamaliako ny sarin-javatra voasokitr’i Babilona; ho menatra ny taniny rehetra; ary ny fatiny rehetra dia hiampatrampatra eo aminy.

⁴⁸Ny lanitra sy ny tany sy izay rehetra ao aminy dia hihoby noho ny amin’i Babilona satria tonga ao aminy avy any avaratra ireo mpandringana, hoy NY TOMPO.

⁴⁹Toy ny nampiampatramparan’i Babilona ny faty tamin’ny Israely, dia ho toy izany no hiampatramparan’ny faty amin’ny tany rehetra, noho ny amin’i Babilona.

⁵⁰Ianareo izay tsy voan’ny sabatra dia mialà fa aza mijanona; tsarovy NY TOMPO raha mbola lavitra ianareo, ary aoka ho an-tsainareo i Jerosalema.

⁵¹Nahatsiaro menatra izahay fa nandre latsa; nanarona ny tavanay ny henatra; fa ny hafa firenena no niditra teo amin’ny fitoerana masina amin’ny tranon’NY TOMPO.

⁵²Koa indro, avy ny andro, hoy NY TOMPO, izay hamaliako ny sarin-javatra voasokitra ao koa; ary hitoloko manerana ny taniny rehetra ny voatrobaka.

⁵³Na dia miakatra any an-danitra aza i Babilona, ary na dia ataony mafy aza ny manda mafy sady avo izay heriny dia avy Amiko no hiavian’ny mpandringana azy, hoy NY TOMPO.

⁵⁴Injany misy feo mitaraina avy any Babilona ary fandringanana be avy any amin’ny tanin’ny Kaldeana!

⁵⁵Fa NY TOMPO mandrava an’i Babilona sy mampitsahatra ny fihorakorahana eo aminy, ary hirohondrohona toy ny ranobe ny onjany, eny, re tokoa ny feon’ny firohondrohony.

⁵⁶Fa tonga ao aminy, dia ao Babilona, ny mpandringana, ary voasambotra ny lehilahy maheriny; tapatapaka avokoa ny tsipìkany satria NY TOMPO dia Andriamanitry ny famaliana ka hamaly tokoa.

⁵⁷Ary hataoko mamo ny mpanapaka azy sy ny olon-kendriny, ny governorany sy ny lefiny ary ny mpiady maheriny; ary hatory amin’ny torimaso mandrakizay izy ka tsy hifoha intsony, hoy ny Mpanjaka, izay antsoina hoe: Andriamanitra, Tompon’izao rehetra izao.

⁵⁸Izao no lazain’Andriamanitra, Tompon’izao rehetra izao: Ny manda matevina any Babilona dia horavana tanteraka hatramin’ny fanorenany ary hodorana amin’ny afo ny vavahadiny avo. Koa ho foana ny nisasaran’ny firenena ary ho nisasatra ho an’ny afo ny olona ka ho reraka.

⁵⁹Ny teny izay nandidian’i Jeremia mpaminany an’i Seraia, zanak’i Neria, zanak’i Mahaseia, fony izy nandeha niaraka tamin’i Zedekia, mpanjakan’ny Joda, ho any Babilona tamin’ny taona fahefatra nanjakany. Fa i Seraia no lehiben’ny fandraharahana.

⁶⁰Ary nosoratan’i Jeremia tao amin’ny boky iray ny loza rehetra izay hanjo an’i Babilona, dia ireo teny rehetra ireo, izay voasoratra ny amin’i Babilona.

⁶¹Ary hoy i Jeremia tamin’i Seraia: Rehefa tonga any Babilona ianao dia tandremo tsara mba hovakinao ireo teny rehetra ireo

⁶²ka lazao hoe: TOMPO ô, Ianao no niteny hamely ity tany ity ka handringana azy ary tsy hisy hitoetra eto, na olona, na biby, fa ho tany lao mandrakizay izy.

⁶³Ary rehefa tapitra ny famakianao ity boky ity dia asio vato afehy aminy, ary atsipazo ao Eofrata izy,

⁶⁴koa teneno hoe: Toy izao no hilentehan’i Babilona ka tsy hifongarany intsony noho ny loza hataoko mihatra aminy, ary ho reraka izy. Hatreto no tenin’i Jeremia.