Read La Bible en Malgache Jeremia 6 Bible Online

Jeremia 6 - La Bible en Malgache bible

Jeremia 6

¹Mandosira haingana hiala an’i Jerosalema, ianareo zanak’i Benjamina! Tsofy ao Tekoa ny anjomara ka manangàna famantarana ao Bety-Hakerema; fa misy loza sy fandringanana be miposaka avy any avaratra.

²Aringako ilay tsara tarehy sy mihantahanta, dia i Ziona* zanakavavy.

³Ao aminy no alehan’ny mpiandry ondry sy ny ondriny; haoriny manodidina azy ny tranolainy ka samy handany ny ao akaikiny avy izy.

⁴Miomàna ianareo hanao ady masina hamelezana azy; mitsangàna ka andeha isika hamely azy antoandrobenanahary. Lozantsika! Fa lasan-davitra ny andro, ary efa mandroso ny aloky ny hariva.

⁵Mitsangàna ka andeha isika hanao latsaka alina ary aoka horavantsika ny lapany.

⁶Fa izao no lazain’Andriamanitra, Tompon’izao rehetra izao: Kapao ny hazo, ary manandrata tovon-tany hamelezana an’i Jerosalema; io ilay tanàna hovaliana, fa feno fampahoriana ny ao anatiny.

⁷Toy ny loharano mampiboiboika ny ranony no ampiboiboihany ny faharatsiany; herisetra sy fandravana no re ao aminy; eo anatrehako mandrakariva ny faharariana sy ny faharatrana.

⁸Minoa anatra ianao, ry Jerosalema, fandrao hiala aminao ny fanahiko, ary fandrao hataoko tany lao ianao, dia tany tsy azo onenana.

⁹Izao no lazain’Andriamanitra, Tompon’izao rehetra izao: Hotsimponina tsirairay toy ny fitsimpona voaloboka izay sisa amin’ny Israely; avereno ho amin’ny rantsany indray ny tananao, toy ny an’ny mpioty voaloboka.

¹⁰Iza no hilazako sy hanariko mba handrenesany? Indro, ny sofiny dia tsy voafora ka tsy mahahaino izy. E! Ny tenin’NY TOMPO dia fahafaham-baraka ho azy ireo ka tsy ankamamìny.

¹¹Fa feno ny fahatezeran’NY TOMPO aho ka tsy zakako tsindriana intsony izany! Aidino amin’ny ankizy madinika eny an-dalambe sy amin’ny andian-jatovo izany; fa na lehilahy na vehivavy dia hosamborina avokoa, na ny antitra sy efa ela niainana koa.

¹²Ho lasan’ny sasany ny tranony mbamin’ny sahany sy ny vehivavy koa; fa hatsotrako amin’ny mponina amin’ny tany ny tanako, hoy NY TOMPO.

¹³Satria izy rehetra, na ny kely na ny lehibe, dia samy fatra-pila harena avokoa; na ny mpaminany na ny mpisorona dia samy mamitaka avokoa.

¹⁴Fa nataotaony foana ny fanasitranany ny faharatran’ny oloko zanakavavy tamin’ny nitenenany hoe: Fiadanana, fiadanana! Kanjo tsy misy fiadanana akory!

¹⁵Nitafy henatra izy noho ny nanaovany fahavetavetana; nefa tsy mba nahatsiaro menatra akory izy ary tsy mba tsapany ny hadisoany, koa ho lavo miaraka amin’izay lavo izy; amin’ny andro hamaliako azy dia ho tafintohina izy, hoy NY TOMPO.

¹⁶Izao no lazain’NY TOMPO: Mijanòna eo an-dalana ianareo ka zahao ary anontanio izay lalana masaka hatry ny ela: Aiza izay lalana mankany amin’ny tsara? Iny no izory, dia hahita fitsaharana ho an’ny fanahinareo ianareo; nefa hoy izy ireo: Tsy hizotra amin’iny izahay.

¹⁷Ary nasiako mpitily teo aminareo hiteny hoe: Henoy ny feon’ny anjomara! Nefa hoy ianareo: Tsy hihaino izahay.

¹⁸Koa henoinareo, ry Jentilisa*, ary aoka ho fantatrareo, ry fiangonana, ny hanjo azy.

¹⁹Henoy, ry tany! Indro, Izaho hahatonga loza amin’ity firenena ity, dia ny vokatry ny heviny ihany; fa tsy nihaino ny teniko izy ary nolaviny ny lalànako.

²⁰Nahoana Aho no itondrana ditin-kazo mani-pofona avy any Sheba sy veromanitra avy any amin’ny tany lavitra? Tsy sitrako ny fanatitra doranareo manontolo ary tsy mamiko ny zavatra vonoinareo hatao fanatitra.

²¹Koa izao no lazain’NY TOMPO: Indro, hasiako fahatafintohinana eo amin’ity firenena ity ka samy ho tafintohina amin’izany ny ray mbamin’ny zanany; ho faty ny mpiaramonina mbamin’ny namany.

²²Izao no lazain’NY TOMPO: Indro, misy firenena avy any amin’ny tany avaratra, dia firenena lehibe mitsangana avy any amin’ny faran’ny tany.

²³Tsipìka sy lefona no entiny, lozabe sady tsy mamindra fo izy; ny feony dia mirohondrohona toy ny ranomasina ary mitaingin-tsoavaly izy sady voaomana tahaka ny lehilahy ho amin’ny ady, hamelezana anao, ry Ziona* zanakavavy.

²⁴Renay ny lazany ka miraviravy tanana izahay; fahoriana no mahazo anay, eny, fanaintainana tahaka ny vehivavy eo am-piterahana.

²⁵Aza mandeha ho any an-tsaha ary aza mankeny amin’ny lalambe; fa manan-tsabatra ny fahavalo, misy fampihorohoroana avy amin’ny manodidina.

²⁶Ry oloko zanakavavy, misikìna lamba fisaonana ianao ary mihosena lavenona ka manaova fisaonana toy ny fisaonana zanakalahy tokana, dia fitomaniana fatratra; fa ho avy tampoka amintsika ny mpandringana.

²⁷Ho mpizaha toetra ao amin’ny oloko no nanendreko anao, dia ho fiarovana mafy, mba hahafantaranao sy hizahanao toetra ny alehany.

²⁸Tena mpikomy maditra avokoa izy rehetra ka mandehandeha manaratsy olona; varahina sy vy izy; samy mpanao ratsy avokoa izy rehetra.

²⁹May ny tafoforana, levon’ny afo ny firaka, foana ny nandrendrehan’ny mpandrendrika, nefa tsy voaisotra ny ratsy.

³⁰Ataon’ny olona hoe volafotsy tsy ilaina izy satria tsy ilain’NY TOMPO.