Read La Bible en Malgache Fitomaniana 3 Bible Online

Fitomaniana 3 - La Bible en Malgache bible

Fitomaniana 3

¹Izaho ilay lehilahy nahita fahoriana tamin’ny tsorakazon’ny fahatezerany.

²Izaho dia notarihiny sy nampandehaniny ho amin’ny maizina, fa tsy ho amin’ny mazava.

³Izaho ihany no asian’ny tanany isanandro.

⁴Nataony mikainkona ny nofoko sy ny hoditro, notapatapahiny ny taolako.

⁵Manorina manda hamelezany ahy Izy ary manemitra ahy amin’ny zava-mangidy sy ny fahoriana.

⁶Ampitoeriny ao amin’ny maizina toy izay efa maty hatrizay aho.

⁷Nofefeny manodidina aho ka tsy afa-niala, nataony mavesatra ny gadrako.

⁸Ary na dia mitaraina sy miantso vonjy aza aho dia sakanany ny vavaka ataoko.

⁹Vato voapaika no narafiny natampiny ny lalako, ary naolikoliny ny alehako.

¹⁰Tonga bera manao vela-pandrika ho ahy Izy, ary toy ny liona ao amin’ny fierena.

¹¹Namily ny lalako Izy ary noviravirainy aho ka navelany ho lao.

¹²Nanenjana ny tsipìkany Izy ka nametraka ahy ho toy ny marika hokendrena amin’ny zana-tsipìka.

¹³Nampitsatoka ny zana-tsipìkany tamin’ny voako Izy.

¹⁴Tonga fihomehezan’ny oloko rehetra aho sady ataony an-kira mandritra ny andro.

¹⁵Novokisany anana mangidy aho ary nobobohany zava-mahafaty.

¹⁶Notorotoroiny tamin’ny vato kely ny nifiko sady natsinkasinkasiny tamin’ny lavenona aho.

¹⁷Noroahinao tsy hahita fiadanana ny fanahiko ka hadinoko ny fahasambarana.

¹⁸Dia hoy aho: Very ny lazako sy ny fanantenako NY TOMPO.

¹⁹Tsarovy ny fahantrako sy ny fanjenjenako, dia ny zava-mangidy sy ny poizina.

²⁰Tsaroako tokoa izany ka mitanondrika aho.

²¹Izany no eritreretiko ato am-poko ka mahatonga ahy hanantena.

²²Ny famindrampon’NY TOMPO no tsy nahalany ritra antsika satria tsy mitsahatra ny fiantrany.

²³Vaovao isa-maraina izany; lehibe ny fahamarinanao.

²⁴NY TOMPO no anjarako, hoy ny fanahiko, ka mahatonga ahy hanantena Azy izany.

²⁵Tsara NY TOMPO amin’izay miandry Azy, dia amin’ny olona izay mitady Azy.

²⁶Tsara ny manantena ny famonjen’NY TOMPO amim-pahanginana.

²⁷Tsara amin’ny olona ny mitondra zioga amin’ny fahatanorany.

²⁸Aoka hipetraka irery izy ka hangina rehefa ampitondraina izany.

²⁹Aoka hanohoka ny vavany eo amin’ny vovoka izy fa angamba mbola hisy fanantenana.

³⁰Aoka hanolotra ny takolany amin’izay mamely azy izy ka ho feno latsa.

³¹Fa tsy hanary mandrakizay ny Tompo;

³²eny, na dia mampahory aza Izy dia mbola hiantra ihany, araka ny haben’ny famindrampony,

³³satria tsy sitrany ny mampahory na mampalahelo ny zanak’olombelona.

³⁴Ny fanitsakitsahana ny mpifatotra rehetra ambonin’ny tany ho eo ambanin’ny tongotra,

³⁵ny familiana ny rariny amin’ny olona eo anatrehan’ny Avo Indrindra,

³⁶ny famadihana ny adin’ny olona, moa tsy samy jeren’ny Tompo va?

³⁷Iza moa no miteny ka mahatanteraka izany, raha tsy didy avy amin’ny Tompo?

³⁸Tsy avy amin’ny vavan’ny Avo Indrindra va no ivoahan’ny soa sy ny ratsy?

³⁹Koa nahoana no mitaraina ny olona velona, fa aoka ny olona samy hisento noho ny amin’ny fahotany.

⁴⁰Aoka isika handinika ny lalantsika sy hamantatra azy ka hiverina indray amin’NY TOMPO.

⁴¹Aoka hasandratsika ny fontsika sy ny tanantsika ho any amin’Andriamanitra any an-danitra.

⁴²Izahay dia efa nanota sy naditra, ary Ianao tsy namela heloka!

⁴³Nisarona fahatezerana Ianao ka nanenjika anay; novonoinao izahay fa tsy niantranao.

⁴⁴Nisarona rahona Ianao ka voasakana ny vavaka.

⁴⁵Nataonao tahaka ny fakofako sy ny zavatra nariana teo afovoan’ny olona izahay.

⁴⁶Ny fahavalonay rehetra dia mitanatana vava aminay.

⁴⁷Nanjary tahotra sy lavaka ho anay izany, sady faharavana sy fahatorotoroana.

⁴⁸Rano mandriaka no mijononoka amin’ny masoko noho ny fahatorotoroan’ny oloko zanakavavy.

⁴⁹Ny masoko dia mandrotsa-dranomaso ka tsy misy fijanonany; eny, tsy misy fiatoana,

⁵⁰ambara-pitazan’NY TOMPO ka hitsinjovany avy any an-danitra.

⁵¹Ny masoko dia mampahory ny fanahiko noho ny amin’ny zanakavavin’ny tanànako rehetra.

⁵²Manenjika ahy mafy, toy ny fanenjika voronkely ny fahavaloko tsy amin’antony.

⁵³Nanjera ahy tao an-davaka famorian-drano izy ka nitady hahafaty ahy sady nitora-bato ahy.

⁵⁴Mandifotra ny lohako ny rano ka hoy aho: Maty aho ity!

⁵⁵TOMPO ô, niantso ny anaranao avy tany an-davaka lalina indrindra aho.

⁵⁶Ny feoko dia efa renao ka aza tampenana ny sofinao, raha mitaraina mitady izay mba hiainana kely aho.

⁵⁷Nanakaiky Ianao tamin’ny andro niantsoako Anao ka hoy Ianao: Aza matahotra.

⁵⁸Tompo ô, Ianao nandahatra ny adiko izay nikasika ny aiko; eny, Ianao no nanavotra ny aiko.

⁵⁹TOMPO ô, hitanao ny fitsarana miangatra natao tamiko ka mba tsarao ny adiko.

⁶⁰Hitanao ny valifaty rehetra ataon’ireo, dia ny saina rehetra entiny mamely ahy.

⁶¹TOMPO ô, renao ny latsa ataony, dia ny saina rehetra entiny mamely ahy,

⁶²ny molotr’izay mitsangana hanohitra ahy sy ny fimonomononany mandritra ny andro hamelezany ahy.

⁶³Jereo ny fipetrany sy ny fitsangany, fa ataony an-kira aho.

⁶⁴Hovalianao izy, TOMPO ô, araka ny asan’ny tanany.

⁶⁵Eny, hohamaizininao ny fony, hihatra aminy ny ozonao.

⁶⁶Henjehinao amin’ny fahatezerana izy ka haringanao tsy ho etỳ ambanin’ny lanitry NY TOMPO.