Read La Bible en Malgache Fitomaniana 4 Bible Online

Fitomaniana 4 - La Bible en Malgache bible

Fitomaniana 4

¹Indrisy! Tonga matromatroka ny volamena; niova ny volamena tsara! Ny vato nohamasinina dia naely eny an-joron-dalambe rehetra eny.

²Ny zanaka sarobidin’i Ziona* izay nosandaina tahaka ny volamena tsy miharo dia indrisy, efa atao toy ny siny tany, asan’ny tanan’ny mpanefy tanimanga!

³Na ny amboahaolo aza dia manolotra nono hampinonoany ny zanany; fa ny oloko zanakavavy kosa dia tonga masiaka toy ny aotirisy any an-tany efitra.

⁴Ny lelan’ny zaza minono dia miraikitra amin’ny lanilaniny noho ny hetaheta; ny ankizy madinika dia mangataka mofo, nefa tsy misy mizara ho azy.

⁵Izay nihinana hanim-py dia miala aina eny an-dalambe; izay notezaina tamin’ny jaky dia mamihina zezika.

⁶Fa ny heloky ny oloko zanakavavy dia lehibe noho ny helok’i Sodoma izay noravana indray mipy maso monja, nefa tsy nokasihin-tanana akory,

⁷Ny Naziritany dia mangatsakatsaka noho ny fanala; eny, fotsy noho ny ronono; mena noho ny voahangy ny tenany, ary tahaka ny vato safira ny endriny.

⁸Fa izao kosa dia mainty noho ny arina ny tarehiny ka tsy misy mahafantatra azy eny an-dalana; miraikitra amin’ny taolany ny hodiny ka tonga maina toy ny hazo.

⁹Tsara ny matin-tsabatra noho ny maty mosary, fa mihareraka toy ny voatrobaka ihany izy noho ny tsy fisian’ny vokatry ny saha.

¹⁰Ny tanan’ny vehivavy malemy fanahy aza dia nahandro ny zanany; eny, izany no nohaniny tamin’ny fandringanana ny oloko zanakavavy.

¹¹Tanterahin’NY TOMPO ny fahavinirany ka naidiny ny fahatezerany mirehitra; nampirehitra afo tao Ziona Izy handevonana ny fanorenany.

¹²Ny mpanjakan’ny tany sy ny mponina rehetra amin’izao tontolo izao dia tsy nanampo fa ny mpanohitra sy ny fahavalo no ho tafiditra ao amin’ny vavahadin’i Jerosalema.

¹³Noho ny fahotan’ny mpaminany sy ny heloky ny mpisorony izay nandatsaka ny ran’ny marina tao aminy no nahatonga izao.

¹⁴Niraparapa toy ny jamba teny an-dalambe izy, mihosin-dra rahateo ny tenany ka tsy nisy sahy nikasika ny akanjony.

¹⁵Ny olona dia niantsoantso azy hoe: Mialà ianareo fa maloto! Mialà! Mialà! Aza mikasika anay! Raha nandositra sy niraparapa izy dia hoy ny olona tany amin’ny hafa firenena: Tsy mahazo mivahiny atỳ intsony ireny.

¹⁶Ny tavan’NY TOMPO no nampihahakahaka azy, ary tsy mijery azy intsony Izy; ny mpisorona dia tsy hajain’ireny ary ny antitra dia tsy amindrany fo.

¹⁷Mbola pahina ny masonay miandry foana ny hamonjena anay; nitazana teo amin’ny tilikambo fitazanana izahay nanantena ny firenena izay tsy nahavonjy anay.

¹⁸Mitsongo dia anay izy ka tsy mahazo mandeha izahay na dia eny an-dalambe aza; akaiky ny fara fiainanay, tapitra ny andronay; eny, tonga ny fara fiainanay.

¹⁹Ny mpanenjika anay dia haingam-pandeha noho ny voromahery eny amin’ny lanitra ka milomay manenjika anay any an-tendrombohitra ary manao vela-pandrika ho anay any an-tany efitra.

²⁰Ny fofonainay, ilay voahosotry NY TOMPO, dia efa voafandriky ny longoany, dia ilay nataonay hoe: Ao ambanin’ny alokalony no hahavelona anay any amin’ny hafa firenena.

²¹Mifalia sy miravoravoa ihany, ry Edoma zanakavavy izay monina any amin’ny tany Oza; ianao koa no horosoana ny kapoaka ka ho mamo sy hitanjaka.

²²Tsy misy intsony ny helokao, ry Ziona zanakavavy, tsy hoentina ho babo intsony ianao; hamaly anao noho ny helokao Izy, ry Edoma zanakavavy, ka hampiseho ny fahotanao.