Read La Bible en Malgache Fitomaniana 5 Bible Online

Fitomaniana 5 - La Bible en Malgache bible

Fitomaniana 5

¹TOMPO ô, tsarovy izay nanjo anay; hevero sy diniho ny latsa mahazo anay.

²Ny lovanay dia afindra ho an’ny vahiny, ary ny tranonay dia ho an’ny olona tsy fantatra.

³Efa kamboty izahay ka tsy manan-dray, ny reninay dia toy ny mpitondratena.

⁴Na ny loharanonay aza dia andoavanay vola vao azonay isotroana, ary ny kitainay koa dia vidinay vao azo.

⁵Noraisin’ireo nanenjika anay tamin’ny hatokay izahay; reraka izahay nefa tsy manam-pitsaharana.

⁶Nanolo-tanana tamin’ny Ejiptiana sy ny Asiriana izahay mba ho voky mofo.

⁷Nanota ny razanay; tsy etỳ intsony izy ireo; ary izahay no mivesatra ny helony.

⁸Andevo no mifehy anay; tsy misy manafaka anay amin’ny tanany.

⁹Noho ny sabatra mamely any an-tany efitra dia manao vy very ny ainay izahay vao mahazo hanina.

¹⁰Mahamay toy ny fatana ny hoditray noho ny fivaivain’ny mosary.

¹¹Nosavihina ny vehivavy tao Ziona* sy ny virijiny tao amin’ny tanànan’ny Joda.

¹²Nahantona tamin’ny tanany ny lehibe ary tsy mba nohajaina ny antitra.

¹³Ny zatovo dia nitondra ny fikosoham-bary ary ny ankizy madinika dia nivembena nitondra ny kitay.

¹⁴Ny loholona dia tsy misy eo am-bavahady ary ny zatovo dia tsy mitendry zavamaneno intsony.

¹⁵Ny hafalian’ny fonay dia nitsahatra ary ny dihinay dia niova ho fitomaniana.

¹⁶Efa afaka ny satroboninahitra tamin’ny lohanay; idiran-doza izahay fa efa nanota!

¹⁷Noho izany dia reraka ny fonay; eny, noho izany dia maizina ny masonay,

¹⁸noho ny amin’ny tendrombohitra Ziona izay efa lao sady ikarenjen’ny amboahaolo.

¹⁹TOMPO ô, Ianao no mipetraka mandrakizay; eny, ny sezafiandriananao no maharitra hatramin’ny taranaka fara aman-dimby.

²⁰Ahoana no dia anadinoanao anay mandrakariva sy ahafoizanao anay andro lava?

²¹TOMPO ô, ampivereno aminao izahay mba hiverenanay; havaozy ho toy ny fahiny ny andronay.

²²Moa dia nanary anay tokoa va Ianao sady tezitra mafy aminay?