Read La Bible en Malgache Ezekiela 10 Bible Online

Ezekiela 10 - La Bible en Malgache bible

Ezekiela 10

¹Ary hitako fa indro, teo ambonin’ny eloelo izay teo ambonin’ny lohan’ny kerobima* dia nisy tahaka ny vato safira; ary nisy zavatra tahaka ny endriky ny sezafiandrianana niseho teo amboniny.

²Ary niteny tamin-dRalehilahy nitafy lamba rongony fotsy Izy hoe: Midira eo anelanelan’ny kodiarana, dia eo ambanin’ny kerobima, ary fenoy vainafo avy eo anelanelan’ny kerobima ny tananao roa ka afafazo amin’ny tanàna izany! Dia niditra teo imasoko izy.

³Ary ny kerobima dia nitsangana teo ankavanan’ny Trano rehefa niditra Ralehilahy; ary ilay rahona dia nameno ny kianja anatiny.

⁴Dia niakatra niala teo amin’ny kerobima ho eo amin’ny tokonam-baravaran’ny Trano ny voninahitry ny TOMPO; ary ilay rahona dia nameno ny Trano, ary ny kianja dia feno ny famirapiratan’ny voninahitry NY TOMPO.

⁵Ary ny fikopakopaky ny elatry ny kerobima dia re hatrany amin’ny kianja ivelany, toy ny feon’Andriamanitra Tsitoha raha miteny Izy.

⁶Ary rehefa nodidiany Ralehilahy nitafy lamba rongony fotsy hoe: Makà afo avy eo analenelan’ny kodiarana, eo anelanelan’ny kerobima, dia niditra izy ka nitsangana teo anilan’ny kodiarana.

⁷Ary ny kerobima iray dia nanatsotra ny tanany avy teo anelanelan’ny kerobima ho eo amin’ny afo izay teo anelanelan’ny kerobima, dia nakany ka nofenoiny ny tanan-droan’ilay nitafy lamba rongony fotsy. Ary rehefa nandray izany Ralehilahy dia lasa nandeha.

⁸Ary nisy zavatra toy ny tanan’olona niseho teo ambanin’ny elatry ny kerobima.

⁹Ary hitako fa indreo, nisy kodiarana efatra teo anilan’ny kerobima, dia kodiarana iray avy teo anilan’ny kerobima tsirairay; ny fijery ny kodiarana dia toy ny volon’ny vato krizolita.

¹⁰Ary ny fijery azy efatra dia toy ny kodiarana anatin’ny kodiarana hafa.

¹¹Rehefa nandeha izy ireo dia nandeha tamin’ny hitsin’ny lafiny efatra; tsy niherika izy rehefa nandeha, fa tamin’ny hitsin’izay natrehin’ny lohany ihany no nalehany; tsy niherika izy rehefa nandeha.

¹²Feno maso manodidina ny tenan’ny kerobima manontolo, ny lamosiny, ny tanany, ny elany ary koa ny kodiarana; izy efatra dia samy nisy kodiarana avokoa.

¹³Ny amin’ny kodiarana dia reko nisy niantso azy hoe: Ry tadio![3]

¹⁴Samy nanana tarehy efatra avy izy: Ny tarehin’ny voalohany dia nitarehin’ny kerobima, ary ny tarehin’ny faharoa dia nitarehin’olona, ny fahatelo dia nitarehin’ny liona, ary ny fahefatra nitarehim-boromahery.

¹⁵Ary niakatra ny kerobima. Izany dia ilay zavamananaina hitako teo amoron’ny ony Kebara ihany.

¹⁶Rehefa nandeha ny kerobima dia mba nandeha teo anilany koa ny kodiarana; ary rehefa nasandratry ny kerobima ny elany hiainga tsy hipaka amin’ny tany dia tsy nisaraka taminy ny kodiarana fa teo akaikiny koa.

¹⁷Rehefa nijanona izy dia mba nijanona koa ireo; ary rehefa niainga izy dia mba niainga koa ireo: fa ny fanahin’ny zavamananaina no tao aminy.

¹⁸Dia niala avy teo ambonin’ny tokonam-baravaran’ny Trano ny voninahitry NY TOMPO ka nijanona teo ambonin’ny kerobima*.

¹⁹Ary nasandratry ny kerobima ny elany ka niainga tsy nipaka tamin’ny tany teo imasoko izy rehefa nivoaka, ary teo anilany ny kodiarana ary samy nijanona teo anoloan’ny vavahady atsinanana amin’ny tranon’NY TOMPO izy ireo; ary ny voninahitry ny Andriamanitry ny Israely no teo amboniny.

²⁰Izany dia ilay zavamananaina hitako teo ambanin’ny Andriamanitry ny Israely teo amoron’ny ony Kebara; ary fantatro fa kerobima ireo.

²¹Samy nanana tarehy efatra avy izy sady samy nanana elatra efatra avy koa; ary nisy zavatra toy ny tanan’olona teo ambanin’ny elany.

²²Ary ny tarehiny dia nitovy tamin’ilay hitako teo amoron’ny ony Kebara ihany, dia ny endriny sy ny tenany. Ary ny hitsin’ny tavany no nalehany.