Read La Bible en Malgache Ezekiela 13 Bible Online

Ezekiela 13 - La Bible en Malgache bible

Ezekiela 13

¹Tonga tamiko ny tenin’NY TOMPO hoe:

²Ry zanak’olona*, maminania ny hamelezana ny mpaminanin’ny Israely izay maminany, koa lazao amin’izay maminany araka ny fony hoe: Mihainoa ny tenin’NY TOMPO ianareo!

³Izao no lazain’NY TOMPO Andriamanitra: Lozan’ny mpaminany adala izay manaraka ny fanahiny sy ny zavatra tsy hitany.

⁴Tahaka ny amboahaolo any an-tanàna aolo ny mpaminaninao, ry Israely.

⁵Tsy mba niakatra ho eo amin’ny banga ianareo sady tsy mba nanao manda hiarovana ny taranak’Israely mba hifaharany amin’ny ady amin’ny Andron’NY TOMPO.

⁶Mahita zava-poana sy faminaniana tsy marina ireo izay milaza hoe: Hoy NY TOMPO, nefa tsy nirahin’NY TOMPO izy tsinona, nefa manantena fa ho to ny teniny.

⁷Moa tsy fahitana tsy izy no hitanareo ary faminaniana lainga no lazainareo, raha milaza ianareo hoe: Hoy NY TOMPO! Kanefa tsy nilaza izany Aho tsinona?

⁸Koa izao no lazain’NY TOMPO Andriamanitra: Satria ny teninareo dia anoano foana, ary ny fahitanareo dia lainga fotsiny dia indro, hamely anareo Aho, hoy NY TOMPO Andriamanitra.

⁹Ary ny tanako no hamely ny mpaminany izay mahita anoano foana sy maminany lainga; tsy ho isan’ny mpanolotsainan’ny oloko na ho voasoratra amin’ny bokin’ny taranak’Israely izy sady tsy hiditra ao amin’ny tanin’ny Israely; dia ho fantatrareo fa Izaho no TOMPO Andriamanitra.

¹⁰Noho ny nampiviliany ny oloko tamin’ny nanaovany hoe: Fiadanana! Kanjo tsy nisy fiadanana tsinona; ary rehefa manao ampiantany ny oloko dia indreo, izy no mandalotra azy amin’ny rihitra tsy madity.

¹¹Koa lazao amin’izay mandalotra azy amin’ny rihitra tsy madity fa hirodana izany! Hisy ranonorana mifafy. Eny, milatsaha ianareo, ry havandra vaventy! Ary mifofofofoa ianareo, ry tafio-drivotra!

¹²Indro, raha mirodana ny ampiantany, tsy holazaina aminareo va hoe: Aiza ny lalotra izay nandaloranareo azy?

¹³Koa izao no lazain’NY TOMPO Andriamanitra: Hampifofofofo ny tafio-drivotra amin’ny fahatezerako Aho; hisy ranonorana mifafy amin’ny fahatezerako ary havandra vaventy amin’ny fahavinirako ka hahafongana azy.

¹⁴Dia harodako ny ampiantany izay nolalorinareo tamin’ny rihitra tsy madity ka ho fongotra hatramin’ny tany izy, ary hiseho ny fanambaniny; eny, hirodana izy ka haringana ao anatiny ianareo; dia ho fantatrareo fa Izaho no TOMPO.

¹⁵Hotanterahiko amin’ny ampiantany sy izay mandalotra azy amin’ny rihitra tsy madity ny fahatezerako, ary holazaiko aminareo hoe: Tsy misy intsony ny manda sy izay mpandalotra azy,

¹⁶dia ny mpaminanin’ny Israely izay maminany ny amin’i Jerosalema, sy izay mahita fahitana fiadanana ho azy, kanjo tsy misy fiadanana tsinona, hoy NY TOMPO Andriamanitra.

¹⁷Koa ianao, ry zanak’olona*, handrino mafy ny zanakavavin’ny firenenao izay manao faminaniana araka ny fony ary maminania ny hamelezana azy!

¹⁸Lazao aminy hoe: Izao no lazain’NY TOMPO Andriamanitra: Lozan’ny vehivavy rehetra izay manjaitra fono ho amin’ny foto-tanan’ny olona rehetra, ary manao voaly antonona ny loha samihafa rehetra[4] mba hihazanareo ny ain’ny olona! Ny ain’ny oloko dia hazainareo, nefa ny ainareo kosa velominareo!

¹⁹Manamavo Ahy ao amin’ny oloko ianareo noho ny varimbazaha eran’ny tanana ila sy ny sombi-mofo, mba hahafaty ny ain’olona izay tsy tokony ho faty ary hahavelona ny ain’olona izay tsy tokony hovelomina, amin’ny andainganareo amin’ny oloko izay mihaino ny lainganareo.

²⁰Koa izao no lazain’NY TOMPO Andriamanitra: Indro, hosimbako ny fonon-tanana nataonareo, izay entinareo hihaza ny ain’olona any toy ny fihaza voronkely. Eny, hotriariko hiala amin’ny sandrinareo izany ka halefako hanidina ny ain’ny olona izay nohazainareo toy ny fihaza voronkely.

²¹Hotriariko koa ny voalinareo ka hovonjeko ho afaka amin’ny tananareo ny oloko, dia tsy ho azon’ny tananareo ho haza intsony izy; dia ho fantatrareo fa Izaho no TOMPO.

²²Satria lainga no entinareo manaketraka ny fon’ny marina izay tsy nampalaheloviko, sady entinareo manatanjaka ny tanan’ny ratsy fanahy mba tsy hialany amin’ny lalan-dratsiny mba hamelomana azy,

²³dia tsy hahita anoano foana na hanao faminaniana tsy marina intsony ianareo, fa hovonjeko ho afaka amin’ny tananareo ny oloko. Dia ho fantatrareo fa Izaho no TOMPO.