Read La Bible en Malgache Ezekiela 18 Bible Online

Ezekiela 18 - La Bible en Malgache bible

Ezekiela 18

¹Tonga tamiko ny tenin’NY TOMPO hoe:

²Nahoana no manao izao oha-teny izao ao amin’ny tanin’ny Israely ianareo: Ny ray no mihinana voaloboka maharikivy ka ny nifin’ny zanany no madilo?

³Raha velona koa Aho, hoy NY TOMPO Andriamanitra, dia tsy hisy hanaovanareo izany oha-teny izany ao amin’ny Israely intsony.

⁴Indro, Ahy ny aina rehetra; toy ny ain’ny ray, dia toy izany koa ny ain’ny zanany; samy Ahy ireny; ny olona izay manota no ho faty.

⁵Fa raha marina ny olona ka manao izay marina sy mahitsy,

⁶tsy mihinana eny an-tendrombohitra, na manandratra ny masony ho amin’ny sampin’ny taranak’Israely, na mandoto ny vadin’ny namany, na manakaiky ny vehivavy izay mararin’ny fadimbolana,

⁷na mampahory olona fa mamerina ny natao antoka, tsy mandroba fa manome ny haniny ho an’ny noana ary manafy lamba ny mitanjaka,

⁸tsy mampanjana-bola na maka tombony akory fa miaro ny tanany tsy hanao izay ratsy, ary manao fitsarana marina amin’izay miady,

⁹ary mandeha araka ny lalànako sy mitandrina ny fitsipiko ka manao izay marina, dia marina izy ka ho velona tokoa, hoy NY TOMPO Andriamanitra.

¹⁰Fa raha miteraka zazalahy mpanao an-keriny sy mpandatsa-dra izy ka indrisy, manao na dia ny iray ihany amin’ireo zavatra ireo aza iny,

¹¹nefa izy tenany tsy nanao ireo zavatra ireo akory fa ilay zazalahy no mihinana eny an-tendrombohitra, na mandoto ny vadin’ny namany,

¹²na mampahory ny malahelo sy ny mahantra, na mandroba, na tsy mamerina ny natao antoka, na manandratra ny masony ho amin’ny sampy ka manao izay fahavetavetana,

¹³na mampanjana-bola, na maka tombony, moa ho velona va izy? Tsy ho velona izy; nanao ireo fahavetavetana rehetra ireo izy; ho faty tokoa izy ary ny rany dia ho aminy ihany!

¹⁴Fa raha iny kosa indray no miteraka zazalahy izay mahita ny fahotana rehetra nataon’ny rainy, nefa nony mahita izany izy dia tsy mba manao tahaka izany

¹⁵ka tsy mihinana eny an-tendrombohitra, na manandratra ny masony ho amin’ny sampin’ny taranak’Israely, na mandoto ny vadin’ny namany,

¹⁶na mampahory olona, na maka antoka, na mandroba, fa manome ny haniny ho an’ny noana ary manafy lamba ny mitanjaka,

¹⁷miaro ny tanany tsy hampahory ny mahantra, tsy mampanàna vola na maka tombony, fa manaraka ny fitsipiko sy mandeha araka ny lalànako, dia tsy ho faty noho ny heloky ny rainy izy; ho velona tokoa izy.

¹⁸Ny amin’ny rainy kosa, noho ny nanaovany an-keriny sy ny nandrobany ny rahalahiny ary ny nanaovany izay tsy mety tao amin’ny fireneny, dia indro, ho faty noho ny helony izy.

¹⁹Nefa hoy ianareo: Nahoana moa ny zanaka no tsy mba hitondra ny heloky ny rainy? Raha ny zanaka no manao izay marina sy mahitsy sy mitandrina ny didiko rehetra ka mankatò azy dia ho velona tokoa izy.

²⁰Ny olona izay manota no ho faty. Ny zanaka dia tsy hitondra ny heloky ny rainy, ary ny ray dia tsy hitondra ny heloky ny zanany. Ny fahamarinan’ny marina dia ho aminy ihany, ary ny faharatsian’ny ratsy fanahy kosa dia ho aminy ihany.

²¹Fa raha ny ratsy fanahy no miala amin’ny fahotana rehetra izay nataony ka mitandrina ny didiko rehetra ary manao izay marina sy mahitsy dia ho velona tokoa izy fa tsy ho faty.

²²Ny fahadisoany rehetra izay nataony dia tsy hotsarovana intsony; ho velona izy noho ny fahamarinana izay nataony.

²³Moa sitrako akory va ny fahafatesan’ny ratsy fanahy, hoy NY TOMPO Andriamanitra, fa tsy ny hialany amin’ny lalany mba ho velona izy?

²⁴Fa raha ny marina no miala amin’ny fahamarinany ka manao meloka ary manaraka ny fahavetavetana rehetra izay nataon’ny ratsy fanahy, ho velona va izy? Ny fahamarinany rehetra izay nataony dia tsy hotsarovana. Noho ny fahadisoana sy ny fahotana izay nataony dia ho faty izy.

²⁵Nefa hoy ianareo: Tsy marina ny lalan’ny Tompo. Mihainoa ange, ry taranak’Israely! Moa ny lalako va no tsy marina? Tsy ny lalanareo va no tsy marina?

²⁶Raha ny marina no miala amin’ny fahamarinany ary manao meloka ka maty amin’izany dia maty noho ny heloka nataony ihany izy.

²⁷Ary raha ny ratsy fanahy no miala amin’ny faharatsiana nataony ka manao izay marina sy mahitsy dia hahavonjy ny ainy izy.

²⁸Raha mahita ny fahadisoana rehetra izay nataony izy ka miala amin’izany dia ho velona tokoa izy fa tsy ho faty.

²⁹Nefa hoy ny taranak’Israely: Tsy marina ny lalan’ny Tompo. Ry taranak’Israely, ny lalako va no tsy marina? Tsy ny lalanareo va no tsy marina?

³⁰Koa samy hotsaraiko araka ny lalanareo avy ianareo, ry taranak’Israely, hoy NY TOMPO Andriamanitra. Mitodiha ka mibebaha amin’ny fahadisoanareo rehetra, dia tsy ho tonga fahatafintohinana mahameloka anareo intsony izany.

³¹Esory ho afaka aminareo ny fahadisoanareo rehetra izay nataonareo ka manaova fo vaovao sy fanahy vaovao ho anareo. Fa nahoana no ho faty ianareo, ry taranak’Israely?

³²Fa tsy sitrako ny fahafatesan’izay maty, hoy NY TOMPO Andriamanitra. Koa mibebaha ianareo mba ho velona!