Read La Bible en Malgache Ezekiela 19 Bible Online

Ezekiela 19 - La Bible en Malgache bible

Ezekiela 19

¹Ary ianao, manaova hira fisaonana ny amin’ireo andrianan’ny Israely

²ka lazao hoe: Inona moa reninareo? Liom-bavy izy. Namitsaka teo amin’ny liona izy ary nitaiza ny zanany teo amin’ny liona tanora.

³Nahalehibe ny zanany iray izy dia tonga liona tanora io ka nianatra hamiravira haza sady nihinana olona.

⁴Nahare ny lazany ny firenena dia namandrika azy tamin’ny lavaka ka nasiany masom-by ny orony, ary noentiny ho any amin’ny tany Ejipta izy.

⁵Nony hitan’ny liom-bavy fa foana sy levona ny fanantenany dia nanalany indray ny zanany ka notezainy ho tonga liona tanora.

⁶Dia nivoivoy teny amin’ny liom-bavy iny ka tonga liona tanora, ary nianatra hamiravira haza sady nihinana olona.

⁷Narodany ny lapan’ireny sady noravany ny tanànany ka lao ny tany mbamin’izay rehetra tao aminy noho ny feon’ny fierony.

⁸Ary ny Jentilisa* manodidina, izay avy any amin’ny fari-piadidiany samihafa, dia nanamboatra sy namelatra ny fandrika haratony taminy ka voafandrika tamin’ny lavaka izy.

⁹Nataony tamin’ny tranokely izy ka nasiany masom-by ny orony ary noentiny ho any amin’ny mpanjakan’i Babilona izy; noentiny ho ao amin’ny manda izy mba tsy ho re intsony ny feony eny amin’ny tendrombohitry ny Israely.

¹⁰Ny reninao dia tahaka ny voaloboka voavoly teo amoron-drano, vokatra sady nanaroka izy azon’ny rano betsaka.

¹¹Nisy rantsany matanjaka teo aminy ka azo natao tehim-panjakana ho an’izay manapaka izany. Tonga avo izy ka nitehika teny amin’ny rahona matevina, mora tazana noho ny haavony izy sy noho ny hamaroan’ny rantsany.

¹²Nefa nongotana tamin’ny fahavinirana izy ka nazera ho amin’ny tany; ny rivotra avy any atsinanana no nahamaina ny voany; ny rantsany matanjaka dia tapaka ka maina; levon’ny afo ireny.

¹³Ary ankehitriny dia voavoly any an-tany efitra izy, dia ao amin’ny tany maina sady karankaina.

¹⁴Afo no mivoaka avy amin’ny sampany ka mandevona ny voany; tsy misy rantsany mafy azo atao tehim-panjakana ho fanapahana intsony izy. Hira fisaonana izany sady mbola ho hira fisaonana ihany.