Read La Bible en Malgache Ezekiela 2 Bible Online

Ezekiela 2 - La Bible en Malgache bible

Ezekiela 2

¹Ary hoy Izy tamiko: Ry zanak’olona*, mitsangàna, fa hiteny aminao Aho.

²Ary nisy fanahy tonga tao anatiko raha niteny tamiko Izy ka nampitsangana ahy, ary reko Izay niteny tamiko.

³Ary hoy Izy tamiko: Ry zanak’olona, maniraka anao ho any amin’ny Zanak’Israely Aho, eny, ho amin’ireo Jentilisa* mpikomy izay nikomy tamiko; izy sy ny razany dia samy nanota tamiko avokoa mandraka androany;

⁴ireo zanakalahy ireo dia mafy handrina sy mafy fo; any amin’ireo no anirahako anao, ary ianao dia hiteny aminy hoe: Izao no lazain’NY TOMPO Andriamanitra.

⁵Ary na hihaino izy na tsy hihaino, fa taranaka maditra izy, dia ho fantany fa efa nisy mpaminany teo anivony.

⁶Ary ianao, ry zanak’olona, aza matahotra azy, ary aza matahotra ny teniny, na dia voakasiky ny songosongo sy ny tsilo aza ianao, ary na dia eo amin’ny maingoka aza no ipetrahanao; eny, aza matahotra ny fiteniny, ary aza mivadi-po noho ny tarehiny, fa taranaka maditra izy.

⁷Ary holazainao aminy ihany ny teniko, na hihaino izy na tsy hihaino, fa tena maditra izy.

⁸Fa ianao kosa, ry zanak’olona, mihainoa izay lazaiko aminao: Aza maditra tahaka izany taranaka maditra izany ianao! Sokafy ny vavanao ka hano izay afahako anao!

⁹Ary hitako fa indro, nisy tanana nitsotra tamiko, ary indro, nisy horonan-taratasy teny aminy.

¹⁰Dia novelariny teo anatrehako izany, ary nisy soratra teo anatiny sy teo ivelany; ary fitomaniana sy fidradradradrana sy fitarainana no voasoratra teo.