Read La Bible en Malgache Ezekiela 21 Bible Online

Ezekiela 21 - La Bible en Malgache bible

Ezekiela 21

¹Tonga tamiko ny tenin’NY TOMPO hoe:

²Ry zanak’olona*, manatreha ny atsimo ary mitenena manandrify ny atsimo! Maminania ny amin’ny hamelezana ny ala any Negeva!

³Lazao amin’ny ala amin’ny tany atsimo hoe: Henoy ny tenin’NY TOMPO! Izao no lazain’NY TOMPO Andriamanitra: Indro, hampirehitra afo ao aminao Aho, izay handevona ny hazo maitso sy ny hazo maina rehetra ao aminao; tsy hovonoina ny lelafo midedadeda fa ho main’ny afo ny tava rehetra hatrany atsimo ka hatrany avaratra.

⁴Ho hitan’ny nofo rehetra fa Izaho TOMPO no nampirehitra io ka tsy ho faty io.

⁵Dia hoy aho: Indrisy, RY TOMPO Andriamanitra ô! Hoy ny fitenin’ny olona ahy: Tsy oha-teny ihany va no lazain’io?

⁶Dia tonga tamiko ny tenin’NY TOMPO hoe:

⁷Ry zanak’olona, manandrifia an’i Jerosalema ary mitenena manandrify ny fitoerana masina! Maminania ny amin’ny hamelezana ny tanin’ny Israely!

⁸Lazao amin’ny tanin’ny Israely hoe: Izao no lazain’NY TOMPO: Indro, Izaho no mamely anao, ary hotsoahako amin’ny tranony ny sabatro ka haringako ny marina sy ny meloka eo aminao.

⁹Satria haringako ny marina sy ny meloka eo aminao, dia izany no itsoahan’ny sabatro amin’ny tranony mba hamely ny nofo rehetra hatrany atsimo ka hatrany avaratra.

¹⁰Dia ho fantatry ny nofo rehetra fa Izaho TOMPO no nanatsoaka ny sabatro tamin’ny tranony. Tsy hiverina ao intsony izany.

¹¹Ary ianao, ry zanak’olona, midridridridria fa tapaka andilana, eny, midridridridria amin’ny fangidiana eo imasony!

¹²Ary raha misy miteny aminao hoe: Nahoana ianao no midridridridry? Dia valio hoe: Misy vaovao tonga. Ho ketraka ny fo rehetra, hiraviravy ny tanana rehetra, hivarahontsana ny fanahy rehetra ary ho tonga rano ny lohalika rehetra. Eny, ho avy izany ka ho tanteraka, hoy NY TOMPO Andriamanitra.

¹³Tonga tamiko ny tenin’NY TOMPO hoe:

¹⁴Ry zanak’olona*, maminania! Lazao hoe: Izao no lazain’NY TOMPO: Sabatra! Sabatra re! Voaranitra sady mangirana koa.

¹⁵Voaranitra mba hahafaty be izany, mangirana ka hanelatselatra izany. Sa isika hifaly hoe: Ny tsorakazon’ny zanako no mamingavinga ny hazo rehetra?

¹⁶Natao mangirana izany mba horaisin-tanana; voaranitra io sabatra io sady mangirana mba hatolotra eo an-tanan’ny mpamono.

¹⁷Mitomania sy midradradradrà, ry zanak’olona! Fa mihatra amin’ny oloko izany, dia amin’ny lehibe rehetra amin’ny Israely; lavon’ny sabatra miaraka amin’ny oloko izy. Koa tehafo ny fenao[5]!

¹⁸Fizahan-toetra izao! Koa inona no hitranga, raha ilay tehim-panjakana namingavinga iny aza no ho tonga tsinontsinona? hoy NY TOMPO Andriamanitra.

¹⁹Ary ianao, ry zanak’olona, maminania ka mitehafa tanana! Aoka hihaloza roa heny, na telo heny aza, ny sabatra! Dia ny sabatra izay efa nahatrabaka olona; eny, ny sabatra izay efa nahatrabaka ny lehibe no manemitra azy.

²⁰Nahebihebiko teny amin’ny vavahadiny rehetra ny sabatra mba hahaketraka ny fo sy hahatonga fahatafintohinana maro. Indrisy! Nataoko nanelatselatra izany sady voatsoaka hamono.

²¹Miomàna ka mandrosoa eo ankavanana ianao, mijoroa ka mandrosoa eo ankavia, amin’izay voatendry hamelezanao na aiza na aiza!

²²Hiteha-tanana koa Aho ary hanampatra ny fahatezerako. Izaho TOMPO no nilaza izany.

²³Tonga tamiko ny tenin’NY TOMPO hoe:

²⁴Ianao, ry zanak’olona*, manaova lalana roa hiavian’ny sabatry ny mpanjakan’i Babilona; avy amin’ny tany iray no hiavian’izy roa. Manaova famantaran-dalana ka eo an-tsampanan-dalana mankany amin’ny tanàna no anaovanao azy.

²⁵Manaova lalana hiavian’ny sabatra ho any Raban’ny taranak’i Amona sy ho an’i Joda ao Jerosalema, tanàna mimanda.

²⁶Fa ny mpanjakan’i Babilona dia mijanona eo amin’ny sampanan-dalana, dia eo an-dohan’ny lalana roa mba hisikidy; manetsiketsika ny zana-tsipìka izy ary manontany amin’ny terafima* sy mizaha amin’ny atin-kena[6].

²⁷Eo an-tanany havanana ny sikidy izay manondro an’i Jerosalema mba hametrahany lohondry fandravana, hiantsoantsoany hampanao famonoana, hanandratany feo amin’ny akoran’ady, hametrahany lohondry fandravana eo akaikin’ny vavahady, hanandratany tovon-tany sy manda fanafihana.

²⁸Heverin’ny olona fa sikidy lainga ihany izany satria ireo dia efa nanao fianianana mafy, nefa NY TOMPO no mampahatsiaro ny helony mba hisamborana azy.

²⁹Koa izao no lazain’NY TOMPO Andriamanitra: Satria ianareo nampahatsiaro ny helokareo tamin’ny nampiharihariana ny fahadisoanareo ka nampiseho ny fahotanareo tamin’izay rehetra nataonareo, noho izany fahatsiarovana ny momba anareo izany dia hosamborina ianareo.

³⁰Ary ianao, ry ilay ratsy fanahy, lozan-tany, dia ilay mpanjakan’ny Israely, izay tapitra andro amin’ny fotoanan’ny heloka tena mahafaty,

³¹izao no lazain’NY TOMPO Andriamanitra: Hesorina ny fehiloha, ary halàna ny satroboninahitra. Miova ny zavatra rehetra! Hasandratra ny iva ary haetry ny avo.

³²Faharavana, faharavana, faharavana! Izany ho hataoko aminy. Efa niova sahady ny zavatra rehetra mandra-pahatongan’izay tena tompon’ny fitsarana ka hatolotro azy izany.

³³Ary ianao, ry zanak’olona*, maminania ka lazao hoe: Izao no lazain’NY TOMPO Andriamanitra: Ny amin’ny taranak’i Amona sy ny latsa ataony dia lazao hoe: Indro sabatra! Sabatra voatsoaka hamono! Mangirana izany ka handringana sy hanelatselatra!

³⁴Ao anatin’ny fahitana mamitaka sy ny faminaniana mandainga ataonao no handrasàny ny tendanao miaraka amin’ireo ratsy fanahy lozan-tany, izay tapitra andro amin’ny fotoanan’ny heloka tena mahafaty.

³⁵Avereno ao amin’ny tranony ny sabatrao. Any amin’ny tany namoronana anao, dia any amin’ny tany niavianao no hitsarako anao.

³⁶Haidiko aminao ny fahavinirako; ny afon’ny fahatezerako no hotsofiko aminao ka hatolotro eo an-tanan’ny olona kentrina izay mpamorona fandringanana ianao,

³⁷dia hataina amin’ny afo ianao; hijanona eny amin’ny tany ny ranao; tsy hotsaroana ianao; fa Izaho TOMPO no niteny izany.