Read La Bible en Malgache Ezekiela 22 Bible Online

Ezekiela 22 - La Bible en Malgache bible

Ezekiela 22

¹Tonga tamiko ny tenin’NY TOMPO hoe:

²Ry zanak’olona*, moa tsy hitsara va ianao? Tsy hitsara ny tanana mpandatsa-dra va ianao? Ampahafantaro azy ary ny fahavetavetany rehetra!

³Lazao hoe: Izao no lazain’NY TOMPO Andriamanitra: Ity dia tanàna mpandatsa-dra ao ampovoany, koa noho izany dia tonga ny fotoanany sady manao sampy mampahaloto azy ao aminy izy!

⁴Ny ra izay nalatsakao no nahameloka anao, ary ny sampy izay nataonao no nampahaloto anao. Nampahafohy ny andronao ianao ka tonga ny fetran’ny taonanao. Koa izany no nanaovako anao ho fandatsan’ny Jentilisa* sy ho fanakoran’ny tany rehetra.

⁵Na ny akaiky anao na ny lavitra anao dia samy hanakora anao voaloto anarana sy be tabataba.

⁶Indreo, ny lehiben’ny Israely ao aminao dia samy mampiasa ny sandriny avy mba handatsa-dra.

⁷Ao aminao no anozonana ray aman-dreny; ao aminao no anaovana izay sarotra amin’ny vahiny; ary ao aminao no ampahoriana ny kamboty sy ny mpitondratena.

⁸Hamavoinao ny zavatra masina ary lotoinao ny Sabatako.

⁹Ao aminao no misy olona mandehandeha manaratsy mba handatsa-dra; ary ao aminao no misy mihinana eny an-tendrombohitra; ao aminao no misy manao fahavetavetana.

¹⁰Ao aminao no misy mandry amin’ny rainy; ao aminao no misy misavika izay mararin’ny fadimbolana.

¹¹Misy manao fahavetavetana amin’ny vadin’ny namany; misy manao fahavetavetana mandoto ny vinantovaviny; ary misy misavika ny anabaviny, zanakavavin’ny rainy.

¹²Ao aminao no misy mandray kolikoly handatsa-dra. Maka zana-bola sy tombony ianao sady manao an-keriny mandroba ny an’ny namanao ka manadino Ahy, hoy NY TOMPO Andriamanitra.

¹³Koa indro, manjera tanana Aho noho ny harena azonao tamin’ny tsy marina sy ny fandatsahan-dra tao aminao.

¹⁴Hahatoha va ny fonao, na hatanjaka va ny tananao amin’ny andro izay hifanatrehako aminao? Izaho TOMPO no nilaza sady hanatanteraka izany.

¹⁵Haeliko any amin’ny Jentilisa sy hahahako any amin’ny tany samihafa ianao, ary holevoniko ho afaka aminao mihitsy ny fahalotoanao.

¹⁶Dia ho hitan’ny Jentilisa fa ny nataonao ihany no nahaloto anao ka ho fantatrao fa Izaho no TOMPO.

¹⁷Tonga tamiko ny tenin’NY TOMPO hoe:

¹⁸Ry zanak’olona, ny taranak’Israely dia efa tonga tain-drendrika Amiko; izy rehetra dia varahina, firapotsy, vy ary firaka ao anatin’ny memy; eny, efa tonga taim-bolafotsy izy.

¹⁹Koa izao no lazain’NY TOMPO Andriamanitra: Satria ianareo rehetra dia tonga tain-drendrika dia indro, hangoniko ao afovoan’i Jerosalema ianareo.

²⁰Toy ny fanangonana volafotsy, varahina, vy, firaka ary firapotsy ho ao anatin’ny memy ka misy mifofotra azy amin’ny afo ho rendrika, dia toy izany no hanangonako anareo amin’ny fahatezerako sy ny fahavinirako, ary hataoko ao ianareo ka ho voarendrika.

²¹Eny, hangoniko ianareo, dia hifofotra anareo amin’ny afon’ny fahatezerako Aho ka ho voarendrika ao anatiny ianareo.

²²Toy ny fandrendrika volafotsy ao anatin’ny memy no handrendrehana anareo ao anatiny. Dia ho fantatrareo fa Izaho TOMPO no nampidina ny fahatezerako aminareo.

²³Tonga tamiko ny tenin’NY TOMPO Andriamanitra hoe:

²⁴Ry zanak’olona, lazao aminy hoe: Ianao no tany tsy voadio sady tsy nilatsahan’ny ranonorana tamin’ny andron’ny fahatezerana.

²⁵Manao tetika fikomiana ny mpaminany ao aminy; tahaka ny liona mierona mamiravira haza izy; mihinana olona izy sady mahalasa ny harena sy ny zava-tsoa ary mahamaro ny mpitondratena ao aminy.

²⁶Ny mpisorona ao aminy dia mandika ny lalànako sy mandoto ny zavatra masina; tsy manavaka ny masina sy ny tsy masina izy, na mampiseho ny tsy fitovian’ny maloto sy ny madio, ary mitampi-maso tsy hijery ny Sabatako izy, ary tsiratsiraina ao aminy Aho.

²⁷Toy ny amboadia mamiravira haza ny lehibeny ao aminy ka mandatsa-dra sy mahafaty aina ary mahazo harena amin’ny tsy marina.

²⁸Ny mpaminaniny dia mandalotra azy amin’ny rihitra tsy madity ka mahita zava-poana sy maminany lainga aminy hoe: Izao no lazain’NY TOMPO Andriamanitra! Nefa NY TOMPO tsy niteny tsinona.

²⁹Ny vahoaka dia manao an-keriny sy mandroba ka mampahory ny malahelo sy ny mahantra, ary ny vahiny dia ampahoriny tsy ara-drariny.

³⁰Nitady olona teo aminy Aho hanao manda sy hijanona eo amin’ny banga eo anatrehako hifona ho an’ny tany mba tsy handravako azy, kanjo tsy nahita.

³¹Koa dia haidiko eo aminy ny fahatezerako; ny afon’ny fahatezerako no handaniako azy. Hatsingeriko ho eo an-dohany ihany ny lalany, hoy NY TOMPO Andriamanitra.