Read La Bible en Malgache Ezekiela 23 Bible Online

Ezekiela 23 - La Bible en Malgache bible

Ezekiela 23

¹Tonga tamiko ny tenin’NY TOMPO Andriamanitra hoe:

²Ry zanak’olona*, nisy vehivavy mirahavavy, iray reny.

³Nijangajanga tany Ejipta izy; tany no nisafosafoana ny tratrany, ary tany no nitsapatsapana ny nonon’ny faha-virijininy.

⁴Ny anaran’ny zokiny dia Ohola[7] ary ny rahavaviny dia Oholiba[8], ary novadiko izy ka niteraka zazalahy sy zazavavy. Ny amin’ny anarany: i Samaria no Ohola ary i Jerosalema no Oholiba.

⁵Ary raha mbola vadiko i Ohola dia nijangajanga izy; maimay izy tamin’ireo mpitia azy, dia ny Asiriana mifanakaiky aminy,

⁶izay mitafy mangamanga, dia ny governora sy ny lefiny, tanora bikana izy rehetra sady mpitaingin-tsoavaly.

⁷Nijangajanga tamin’ireny izy, dia tamin’izay tsara indrindra tamin’ny zanakalahin’i Asiria sy tamin’izay rehetra nahamaimay azy; tamin’ny sampiny rehetra no nandotoany tena.

⁸Ny fijangajangana izay fanaony hatrany Ejipta dia tsy foiny; fa fony izy mbola tanora dia nandrian’ireny, ary ireny no nitsapatsapa ny tratran’ny faha-virijininy sady nanaram-po nijangajanga taminy.

⁹Noho izany dia natolotro ho eo an-tanan’ireo mpitia azy izy, dia eo an-tanan’ny Asiriana izay nahamaimay azy.

¹⁰Ireny no mampiseho ny fitanjahany; ny zanany lahy sy ny zanany vavy dia lasan’ireny, ary ny tenany dia novonoiny tamin’ny sabatra ka tonga ambentinteny tamin’ny vehivavy izy ary niharan’ny fitsarana.

¹¹Nony hitan’i Oholiba rahavaviny izany dia vao mainka nataony manoatra noho ny azy indray ny fahamaimaizany, ary ny fijangajangany dia manoatra noho ny an’ny rahavaviny.

¹²Maimay tamin’ny Asiriana mifanakaiky aminy izy, dia ny governora sy ny lefiny, olona mareva-pitafiana sady mpitaingin-tsoavaly, samy tanora bikana izy rehetra.

¹³Dia hitako fa efa nandoto ny tenany izy, fa lalana iray ihany no nalehan’izy mirahavavy;

¹⁴Ary mbola nampitomboiny ihany ny fijangajangany, fa nahita sary olona voasoratra teo amin’ny rindrina izy sy ny sarin’ny Kaldeana voasoratra tamin’ny loko mena.

¹⁵Samy nanao fehikibo izy ary fehiloha nisy rambony teo an-dohany; ny fijery azy rehetra dia toy ny zanak’andriana, dia tahaka ny zanakalahin’i Babilona izay teraka tany amin’ny tany Kaldea.

¹⁶Ary raha vao hitan’ny masony ireny dia maimay taminy izy ka nandefa iraka ho any aminy tany Kaldea.

¹⁷Dia tonga tany aminy ho ao amin’ny fandrianam-pitiavana ireny zanakalahin’i Babilona ireny ka nandoto azy tamin’ny fijangajangany; ary nony efa voaloton’ireny izy dia tonga leony azy.

¹⁸Ary rehefa naneho ny fijangajangany sy nampiseho ny fitanjahany izy dia tonga leony azy Aho, toy ny nankaleo Ahy tamin’ny rahavaviny.

¹⁹Dia nampitombo ny fijangajangany ihany izy ka nahatsiaro ny andron’ny fahatanorany izay nijangajangany tany amin’ny tany Ejipta.

²⁰Fa izy dia maimay tamin’ireo lehilahiny maloto fiaina ireo, izay manana nofo tahaka ny nofom-boriky, ary ny avy aminy dia toy ny avy amin’ny soavaly.

²¹Nitady ny fijangajangan’ny fahatanoranao ianao, dia ilay nitsapatsapan’ny Ejiptiana ny nononao, satria nonon’ny faha-virijininao ireo.

²²Koa izao, ry Oholiba, no lazain’NY TOMPO Andriamanitra: Indro, hotairiko hamely anao ireny mpitia anao izay efa nankaleo anao ireny ka ho entiko avy amin’ny tany manodidina izy mba hamely anao,

²³dia ireny zanakalahin’i Babilona mbamin’ny Kaldeana rehetra, dia i Pekoda sy i Soa ary i Koa, ary ny Asiriana rehetra koa dia miaraka aminy; tanora bikana izy rehetra, dia ny governora sy ny lefiny, zanak’andriana sy olom-boafidy, sady mpitaingin-tsoavaly avokoa izy rehetra.

²⁴Ho avy izy mitondra fiadiana sy kalesy fitondra miady ary fiara mbamin’ny firenena betsaka hamely anao, izay hanisy ampinga lehibe sy ampinga kely sy fiarovan-doha manodidina hamelezana anao; hatolotro azy ny fitsarana ka hitsara anao araka ny fitsarany izy.

²⁵Hoentiko hamely anao ny fahasaro-piaroko ka hamely anao amin’ny fahatezerana ireny. Hesoriny ny oronao sy ny sofinao, ary izay sisa aminao dia ho lavon’ny sabatra ka ho lasan-ko babony ny zanakalahinao sy ny zanakavavinao, ary izay sisa aminao dia holevonin’ny afo.

²⁶Hendahany ny lambanao sady hesoriny aminao ny firavakao soa.

²⁷Ary hatsahatro ny fahavetavetanao, dia ny fijangajanganao izay fanaonao hatrany amin’ny tany Ejipta ka tsy handrandrainao aminy intsony ny masonao sady tsy hotsarovanao intsony i Ejipta.

²⁸Fa izao no lazain’NY TOMPO Andriamanitra: Indro, hatolotro eo an-tanan’izay halanao ianao, dia eo an-tanan’izay efa nankaleo anao.

²⁹Hamely anao amin’ny fankahalana izy dia hesoriny ny vokatry ny asanao ka hilaozany mitanjaka sy mihanjahanja ianao, ary hiseho ny fitanjahan’ny fijangajanganao, dia ny fahavetavetanao sy ny fijangajanganao.

³⁰Hatao aminao izany zavatra izany noho ny nijangajanganao nanaraka ny Jentilisa* sy noho ny nandotoanao tena tamin’ny sampiny.

³¹Tamin’ny lalan’ny rahavavinao koa no nalehanao, koa hataoko eo an-tananao ny kapoakany.

³²Izao no lazain’NY TOMPO Andriamanitra: Amin’ny kapoakan’ny rahavavinao no hisotroanao, dia ilay lalina aty sady lehibe; ho fihomehezana sy ho fanakorana tsy tanty ianao.

³³Ho feno fahamamoana sy alahelo ianao; kapoaka fahaverezan-kevitra sy fandringanana, dia ny kapoakan’i Samaria rahavavinao.

³⁴Hosotroinao sy hotrohinao izany ary hokikisanao ny vakivakiny sady handriatanao ny nononao; fa Izaho no niteny izany, hoy NY TOMPO Andriamanitra.

³⁵Koa izao no lazain’NY TOMPO Andriamanitra: Noho ny nanadinoanao Ahy sy ny nanarianao Ahy teo ivohonao dia mba zakaonao kosa ny fahavetavetanao sy ny fijangajanganao.

³⁶NY TOMPO niteny tamiko hoe: Ry zanak’olona*, tsy hotsarainao va i Ohola sy i Oholiba? Asehoy azy ny fahavetavetany

³⁷fa efa nijangajanga izy sady misy ra ny tanany, eny, ny sampiny no nijangajangany, ary ny zanany lahy naterany ho Ahy dia nampamakivakiny ny afo ho an’ireny mba ho levona.

³⁸Izao koa no nataony Tamiko: Nandoto ny fitoerako masina izy tamin’izany andro izany sady nandoto ny Sabatako koa.

³⁹Ary nony efa novonoiny ho an’ny sampiny ny zanany dia nidirany tamin’iny andro iny ihany ny fitoerako masina ka nolotoiny. Koa, e! Izany no nataony tao anatin’ny tranoko.

⁴⁰Ary koa, nandefa iraka haka lehilahy avy lavitra ireo; eny, nandefa iraka izy ka indreo, tonga izay efa nandroany sy nanosorany loko mainty ny masony sy niravahany

⁴¹ary nipetrahany tamin’ny farafara marevaka, sady nisy latabatra voavelatra teo anoloany, izay nametrahany ny ditin-kazo manitro sy ny diloiloko.

⁴²Ary teo aminy dia nisy ny feon’ny maro izay nipetraka tsy nanana ahiahy, ary afa-tsy ny vahoaka maro dia nisy mpiboboka noentina avy tany an-tany efitra; ary nasian’ireo haba teny an-tanan’izy mirahavavy ary satroboninahitra tsara tarehy teny an-dohany.

⁴³Dia hoy Aho ny amin’ilay efa tontan’ny fijangajangana ela: Amin’izao dia mbola hisy hijangajanga amin’io ihany va?

⁴⁴Eny, mbola nankao aminy ihany ny olona, toy ny ankanesany ao amin’ny vehivavy janga, toy ny efa nankanesany tao amin’i Ohola sy i Oholiba, vehivavy janga.

⁴⁵Ary olona marina no hitsara azy araka izay fitsara vehivavy mijangajanga sy mandatsa-dra, satria mijangajanga izy sady misy ra ny tanany.

⁴⁶Fa izao no lazain’NY TOMPO Andriamanitra: Hoentiko hamely azy ny olona maro ka hatolotro ho fampangovitana sy ho babo izy.

⁴⁷Ary ireo olona maro ireo dia hitora-bato azy sy hitetitetika azy amin’ny sabatra; hovonoiny ny zanany lahy sy ny zanany vavy, ary hodorany amin’ny afo koa ny tranony.

⁴⁸Toy izany no hampitsaharako ny fahavetavetana amin’ny tany, mba hahazo anatra tsy hanao araka ny fahavetavetanareo ny vehivavy rehetra.

⁴⁹Ary hatsingeriny aminareo ny fahavetavetanareo ary hoentinareo ny heloka noho ny sampinareo; dia ho fantatrareo fa Izaho no TOMPO Andriamanitra.