Read La Bible en Malgache Ezekiela 24 Bible Online

Ezekiela 24 - La Bible en Malgache bible

Ezekiela 24

¹Tamin’ny andro fahafolo tamin’ny volana fahafolo, tamin’ny taona fahasivy dia tonga tamiko ny tenin’NY TOMPO hoe:

²Ry zanak’olona*, soratinao ny anaran’ny andro, dia izao andro anio izao; ny mpanjakan’i Babilona dia manomboka mamely an’i Jerosalema amin’izao andro anio izao.

³Milazà fanoharana amin’ny taranaka maditra ka lazao aminy hoe: Izao no lazain’NY TOMPO Andriamanitra: Asio vilany eo an-tokoana, eny, ataovy eo an-tokoana ka asio rano ao anatiny.

⁴Arotsahy ao ny vaingambaingany, dia ny vaingambaingany tsara rehetra, na ny feny na ny sorony; fenoy taolana voafantina izany.

⁵Alao ny ondry voafantina dia tohofy kitay betsaka ao ambaniny ka angony eo ambaniny ny taolana, dia ampangotrahy tsara izany ka andrahoy ao ny taolany.

⁶Fa izao no lazain’NY TOMPO Andriamanitra: Lozan’ny tanàna mpandatsa-dra sy ny vilany izay misy harafesina tsy mety afaka ao anatiny! Loary tsirairay ny vaingambaingany fa aza anaovana antsapaka.

⁷Fa ny rany dia ao aminy; teo ambonin’ny vatolampy mangadihady no nametrahany azy; tsy naidiny tamin’ny tany hosaronan’ny vovoka izany.

⁸Mba hampiakatra ny fahatezerana hamaliana azy no nametrahako ny rany teo ambonin’ny vatolampy mangadihady mba tsy ho voasarona.

⁹Koa izao no lazain’NY TOMPO Andriamanitra: Lozan’ny tanàna mpandatsa-dra! Izaho koa hamory kitay betsaka.

¹⁰Atohofy betsaka ny kitay hazo, ampireheto ny afo, masaho tsara ny hena ka asio zavatra hahamanitra azy ary aoka ho may ny taolana.

¹¹Dia foàny ny vilany ka ataovy eo ambonin’ny vainafo hampahafana sy hahamay ny varahina ao aminy ka ho levona ny fahalotoany ao anatiny, ary ho afaka ny harafesina aminy.

¹²Lany foana ny hasasarana, nefa tsy nety afaka ny harafesimbeny; aoka ho eo amin’ny afo ny harafesina aminy!

¹³Ny fahavetavetanao dia ao amin’ny fahalotoanao; satria nanadio anao Aho nefa tsy nadio ianao, koa tsy hadio ho afaka amin’ny fahalotoana intsony ianao raha tsy hanamparako ny fahatezerako.

¹⁴Izaho TOMPO no niteny; ho tonga izany ary hataoko; tsy hiahotrahotra Aho, na hiantra, na hanenina. Araka ny lalanao sy ny asanao no hitsarana anao, hoy NY TOMPO Andriamanitra.

¹⁵Tonga tamiko ny tenin’NY TOMPO hoe:

¹⁶Ry zanak’olona*, indro, hesoriko amin’ny loza indray mamely monja ilay tian’ny masonao. Nefa aza misaona na mitomany na mandatsa-dranomaso akory ianao.

¹⁷Misentoa mangingina ihany ianao fa aza mitomany na misaona ny maty; afehezo aminao ny fehilohanao, ary asio kapa ny tongotrao, ary aza manarona ny saokanao na mihinana ny sakafo aterin’ny olona.

¹⁸Nony maraina dia niteny tamin’ny olona aho, ary nony hariva dia maty ny vadiko. Nony maraina indray dia nanatanteraka izay nandidiana ahy aho.

¹⁹Dia hoy ny olona tamiko: Moa tsy holazainao aminay va izay hevitra tokony ho azonay amin’izao ataonao izao?

²⁰Dia hoy aho taminy: Tonga tamiko ny tenin’NY TOMPO hoe:

²¹Lazao amin’ny taranak’Israely hoe: Izao no lazain’NY TOMPO Andriamanitra: Indro, holotoiko ny fitoerako masina, izay reharehan’ny herinareo, dia ilay tian’ny masonareo sy mahamanina ny fanahinareo; ary ho lavon’ny sabatra ny zanakalahinareo sy ny zanakavavinareo izay nilaozanareo.

²²Dia hanao tahaka ny nataoko ianareo: Tsy hanarona ny saokanareo ianareo, na hihinana ny sakafo aterin’ny olona;

²³ho eo an-dohanareo ny fehilohanareo ary ho eo an-tongotrareo ny kapanareo; tsy hisaona na hitomany ianareo; fa ho levona noho ny helokareo ianareo ka hifampitoloko.

²⁴Ary i Ezekiela dia ho famantarana mahagaga ho anareo. Araka izay rehetra nataony no hataonareo. Ary rehefa tonga izany dia ho fantatrareo fa Izaho no TOMPO Andriamanitra.

²⁵Ary ianao, ry zanak’olona, amin’ny andro hanesorako aminy ny heriny, ny fifaliany, ny voninahiny, ilay tian’ny masony sy ilay tian’ny fanahiny, ny zanany lahy sy ny zanany vavy,

²⁶amin’izany andro izany dia hisy olona afa-nandositra ho tonga any aminao mba hampandre izany aminao.

²⁷Amin’izany andro izany dia hisokatra miaraka amin’ny vavan’ilay mpandositra ny vavanao. Dia hiteny ianao ka tsy ho moana intsony, ary ho famantarana mahagaga aminy ianao; dia ho fantany fa Izaho no TOMPO.