Read La Bible en Malgache Ezekiela 25 Bible Online

Ezekiela 25 - La Bible en Malgache bible

Ezekiela 25

¹Tonga tamiko ny tenin’NY TOMPO hoe:

²Ry zanak’olona*, manandrifia ny Amonita ary maminania ny hamelezana azy

³ka lazao aminy hoe: Mihainoa ny tenin’NY TOMPO Andriamanitra! Izao no lazain’NY TOMPO Andriamanitra: Noho ny nitenenanao hoe: Hia! Akory izay! Rehefa nolotoina ny fitoerako masina ka nopotehina ny tanin’ny Israely, sady lasan-ko babo ny taranak’i Joda,

⁴dia indro, hatolotro ho fananan’ny zanaky ny Atsinanana kosa ianao ka haoriny ao aminao ny tobiny, ary hataony ao aminao ny fonenany; ireny no hihinana ny vokatrao sy hisotro ny ronononao.

⁵Raba dia hataoko tany fitoeran’ny rameva, ary ny taranak’i Amona ho tany fandrian’ny ondry aman’osy; dia ho fantatrareo fa Izaho no TOMPO.

⁶Fa izao no lazain’NY TOMPO Andriamanitra: Noho ny nitehafanao tanana sy ny nitotoanao tamin’ny tongotrao ary ny nifalian’ny fonao tamin’ny fanaovana tsinontsinona ny tanin’ny Israely

⁷dia indro, hatsotrako aminao ny tanako ka hatolotro ho babon’ny Jentilisa* ianao; hofongorako tsy ho vanon-ko firenena intsony ianao ka hataoko lany ritra tsy ho amin’ny tany; eny, haringako ianao; dia ho fantatrao fa Izaho no TOMPO.

⁸Izao no lazain’NY TOMPO Andriamanitra: Noho ny nanaovan’i Moaba sy i Seìra hoe: Indro, ny taranak’i Joda izao dia efa tonga tahaka ny firenena rehetra

⁹dia indro, hotatahako kosa ny sisin’ny Moaba, hatrany amin’ny tanànany rehetra, ny tanànany izay ravaky ny tany, hatrany amin’ny sisintaniny, dia i Bety-Jesimota sy i Baala-Meona ary i Kiriataima.

¹⁰Hatolotro ho fananan’ny zanaky ny Atsinanana, tahaka ny taranak’i Amona koa izy, mba tsy hotsarovana any amin’ny firenena intsony ny taranak’i Amona.

¹¹Ary hotanterahiko ny fitsarana an’i Moaba; dia ho fantany fa Izaho no TOMPO.

¹²Izao no lazain’NY TOMPO Andriamanitra: Noho ireo valifaty nataon’i Edoma tamin’ny taranak’i Joda ka nahameloka azy be tamin’izany valifaty izany,

¹³dia izao no lazain’NY TOMPO Andriamanitra: Hatsotrako amin’i Edoma ny tanako ka haringako ny olona sy ny biby ao aminy; hataoko lao hatrany Temana izy sy ho lavon’ny sabatra hatrany Dedana.

¹⁴Ny tanan’ny Israely oloko no hoentiko mamaly an’i Edoma ka hamely azy araka ny fahatezerako sy ny fahavinirako ireo; dia ho fantany ny famaliako, hoy NY TOMPO Andriamanitra.

¹⁵Izao no lazain’NY TOMPO Andriamanitra: Noho ny valifaty nataon’ny Filistina, eny, noho izy namalifaty sy ny fanaovana tsinontsinona tamin’ny fony rehetra ka nandringana noho ny fandrafiany hatry ny fony ela,

¹⁶dia izao no lazain’NY TOMPO Andriamanitra: Indro, hatsotrako amin’ny Filistina ny tanako ka haringako ny Keretita[9] ary holevoniko izay sisa any amoron-dranomasina;

¹⁷Famaizana mirehitra no hoentiko manatanteraka famaliana lehibe aminy. Dia ho fantany fa Izaho no TOMPO rehefa hataoko mihatra aminy ny famaliako.