Read La Bible en Malgache Ezekiela 27 Bible Online

Ezekiela 27 - La Bible en Malgache bible

Ezekiela 27

¹Tonga tamiko ny tenin’NY TOMPO hoe:

²Ianao, ry zanak’olona*, manaova hira fisaonana ny amin’i Tiro

³ka teneno aminy hoe: E, ry ilay monina amin’ny vava-ranomasina, mpivaro-mandeha ho an’ny firenena, ho any amin’ny nosy maro samihafa: Izao no lazain’NY TOMPO Andriamanitra: E, ry Tiro, ianao no efa niteny hoe: Izaho dia tena tsara tarehy!

⁴Ao afovoan’ny ranomasina ny taninao; izay nandrafitra anao dia nanao ny hatsaran-tarehinao ho tonga lafatra.

⁵Hazo kipreso avy any Senira no nanaovany ny lampihazonao; sedera avy any Libanona no nalainy hatao andrin-tsambonao;

⁶oaka avy any Basana no nanaovany ny fivoinao; hazo bokso avy any amin’ny moron-dranomasin’i Kitima no nataony fipetrahana ho an’ny mpivoinao sady nasiany gorodona ivoara.

⁷Lamba rongony madinika samihafa soratra avy any Ejipta no nataonao lay mba ho faneva; lamba manga sy volomparasy avy any amin’ny moron-dranomasin’i Elisaha no eloelonao.

⁸Ny mponina any Sidona sy Arvada no mpivoinao; ny olon-kendrinao tao aminao, ry Tiro, dia ireo mpitondra sambonao.

⁹Ny zokiolon’i Gebala sy izay hendry tany no mpanentsin-tsambonao tao aminao; ny sambo rehetra teny amin’ny ranomasina mbamin’ny tantsambony dia tonga tao aminao hanakalo ny entam-barotrao.

¹⁰Ny avy any Persia sy Loda ary Pota dia isan’ny miaramila mpiadinao; nanantona ampinga sy fiarovan-doha teny aminao ireo ka nahatsara tarehy anao.

¹¹Ny terak’i Arvada sy ny miaramilanao no teny ambonin’ny mandanao manodidina, ary lehilahy avy any Gamada no teny amin’ny tilikambo fiambenanao; ny ampingany dia nahantony teny amin’ny mandanao manodidina; ireny no nahatonga ny hatsaran-tarehinao ho tonga lafatra.

¹²I Tarsisy dia nifampivarotra taminao noho ny haben’ny harena samihafa tao aminao. Volafotsy, vy, firapotsy ary firaka no noentiny natakalo ny entanao.

¹³I Javana sy i Tobala ary i Maseka dia nifampivarotra taminao, koa olona sy fanaka varahina no natakalony ny varotrao.

¹⁴Ny terak’i Togarma no nitondra soavaly sy soavaly fitaingina ary ampondra natakalo ny entanao.

¹⁵Ny terak’i Dedana dia nifampivarotra taminao; ny varotra avy amin’ny nosy marobe dia nandalo teto aminao ka vangy ivoara sy hazomainty no natakalo ny entanao.

¹⁶I Arama dia nifampivarotra taminao noho ny habetsahan’ny taozavatrao ka karbonkolo, lamba volomparasy, tenona samihafa soratra, rongony fotsy madinika, voahangy ary robisy no noentiny natakalo ny entanao.

¹⁷I Joda sy ny tanin’ny Israely dia nifampivarotra taminao ka varimbazaha avy tany Minita, mofomamy, tantely, diloilo ary balisama no natakalony ny varotrao.

¹⁸I Damaskosy dia nifampivarotra taminao noho ny habetsahan’ny taozavatrao, ny haben’ny harenanao rehetra, ka nitondra divay avy any Helbona sy volon’ondry fotsy izy.

¹⁹I Vedana koa sy i Javana dia nitondra vy voatefy avy any Ozala, kasia ary veromanitra ho takalon’ny varotrao.

²⁰I Dedana dia nifampivarotra taminao, nitondra lamba fanao lamban-tsoavaly.

²¹I Arabia sy ireo andriandahin’i Kedara rehetra dia nifampivarotra taminao ka zanak’ondry sy ondrilahy ary osilahy no noentiny natao varotra tao aminao.

²²Ny mpivaro-mandeha avy any Sheba sy Rama dia nifampivarotra taminao ka zavamanitra tsara indrindra sy vatosoa samihafa karazana ary volamena no noentiny natakalo ny entanao.

²³I Harana sy i Kane ary i Edena sy ny mpivaro-mandeha avy any Sheba sy Asiria ary Kilmada no nifampivarotra taminao.

²⁴Ireo no mpivaro-mandeha nifampivarotra taminao nitondra ny fitafiana marevaka rehetra: Akanjobe fanao ivelany manga sy samihafa soratra, tady voarandrana mafy, fitafiana soa, izany no ao amin’ny tsenanao.

²⁵Ny sambon’i Tarsisy no mpitondra ny entanao. Tao amin’ny fahafenoana sy voninahitra be ianao tany afovoan’ny ranomasina.

²⁶Noentin’ny mpivoinao teny amin’ny ranobe ianao, dia nahavaky anao tao amin’ny ranomasina ny rivotra avy any atsinanana.

²⁷Ny harenanao, ny entam-barotrao, ny entana notaterinao, ny tantsambonao, ny mpitondra sambonao, ny mpanentsin-tsambonao, ny mpividy ny entanao ary ny miaramilanao rehetra izay tao aminao mbamin’ny olona betsaka tafangona tao aminao dia nilentika tao amin’ny ranomasina tamin’ny andro nandravana anao.

²⁸Noho ny fidradradradran’ny mpitondra sambonao dia mihorohoro ny tany manodidina;

²⁹samy midina miala amin’ny sambony ny mpivoy rehetra, ny tantsambo ary ny mpitondra sambo rehetra eny an-dranomasina ka mijanona eny an-tanety;

³⁰manandratra ny feony noho ny nanjo anao izy ka midradradradra mafy sady manopy vovoka hiraraka amin’ny lohany ary mihosinkosin-davenona;

³¹nosolaina avokoa izy noho ny aminao sy misikina lamba fisaonana, mitomany anao amin’ny fangidiam-panahy sy fisaonana mafy.

³²Ary raha midradradradra izy dia manao hira fisaonana ny aminao ka mitomany anao hoe: Iza no tahaka an’i Tiro, dia tahaka ilay mangina ao ampovoan’ny ranomasina?

³³Raha nivoaka avy amin’ny ranomasina ny entam-barotrao dia nahatretrika firenena maro ianao; tamin’ny haben’ny harenanao sy ny entana notaterinao dia nampanankarena ny mpanjakan’ny tany ianao.

³⁴Tamin’ny andro nandravan’ny ranomasina anao ho any amin’ny rano lalina dia niara-nilentika taminao ny entana notaterinao sy ny olona tafangona tao aminao.

³⁵Talanjona ny mponina rehetra amin’ny moron-dranomasina noho ny aminao, ary raiki-tahotra ny mpanjakany ka mivalomainty.

³⁶Misiotsioka ny mpivaro-mandeha amin’ny firenena noho ny aminao; tonga zava-mahatahotra ianao ary tsy hisy intsony mandrakizay!