Read La Bible en Malgache Ezekiela 28 Bible Online

Ezekiela 28 - La Bible en Malgache bible

Ezekiela 28

¹Tonga tamiko ny tenin’NY TOMPO hoe:

²Ry zanak’olona*, lazao amin’ny mpanapaka an’i Tiro hoe: Izao no lazain’NY TOMPO Andriamanitra: Satria miavonavona ny fonao ka hoy ianao hoe: Mba andriamanitra koa aho; eto amin’ny fitoeran’ny andriamanitra no ipetrahako, eto ampovoan’ny ranomasina! Nefa olona ihany ianao fa tsy andriamanitra tsinona. Na dia noheverinao ho toy ny fon’ny andriamanitra aza ny fonao,

³Hay! Hendry noho i Daniela ianao! Tsy misy zavamiafina azo afenina aminao!

⁴Ny fahendrenao sy ny fahalalanao no nahazoanao harena. Eny, izany no nahazoanao volamena sy volafotsy ho ao amin’ny trano fitahirizanao.

⁵Ny haben’ny fahendrenao tamin’ny varotrao no nampitomboanao ny harenanao ka miavonavona ny fonao noho ny harenanao.

⁶Koa indro, izao no lazain’NY TOMPO Andriamanitra: Satria efa noheverinao ho toy ny fon’andriamanitra ny fonao,

⁷dia indro, hitondra olona hafa firenena hamely anao Aho, dia izay masiaka indrindra amin’ny firenena, koa hotsoahany ny sabany hamelezany ny fahendrenao tsara, ary hataony matroka ny famirapiratanao.

⁸Havariny ho any an-davaka ianao ka ho faty toy ny fahafatesan’izay voatrabaka ao amin’ny ranomasina.

⁹Moa mbola hitompo teny fantatra va ianao eo imason’izay mamono anao hoe: Mba andriamanitra koa aho? Nefa olona ihany ianao, fa tsy andriamanitra tsinona, rehefa eo an-tanan’izay manatrabaka anao

¹⁰Tahaka ny fahafatesan’ny tsy voafora no hahafatesanao amin’ny tanan’ny fahavalo. Fa Izaho no niteny, hoy NY TOMPO Andriamanitra.

¹¹Ary tonga tamiko ny tenin’NY TOMPO hoe:

¹²Ry zanak’olona, manaova hira fisaonana ny amin’ny mpanjakan’i Tiro ka lazao aminy hoe: Izao no lazain’NY TOMPO Andriamanitra: Ry ilay nanao ny rafitra tonga lafatra sy fakan-tahaka, sady feno fahendrena no tena tsara tarehy,

¹³tany Edena, sahan’Andriamanitra, ianao; ny vatosoa rehetra, ny eloelo teo amboninao, dia ny karneola, ny topaza, ny oniksa, ny krizolita, ny berila, ny jaspy, ny safira, ny robisy, ny emeraoda ary ny volamena izay nandravaka ny ampongatapakao sy ny sodinao, tamin’ny andro namoronana anao dia natao koa ireo.

¹⁴Ianao dia kerobima* voahosotra izay manaloka, fa voatendriko ianao; tao an-tendrombohitra masin’Andriamanitra ianao; teo amin’ny vato mirehitra no nitsangantsangananao.

¹⁵Tsy nanan-tsiny ianao tamin’ny nalehanao, hatramin’ny andro namoronana anao ka mandra-pahita heloka tao aminao.

¹⁶Noho ny habetsahan’ny varotra nataonao dia nofenoina loza tao aminao ka nanota ianao; dia nolotoiko ianao ka nariako niala tamin’ny tendrombohitr’Andriamanitra. Nosimbako ianao, ry kerobima manaloka, ka tsy eo amin’ny vato mirehitra intsony.

¹⁷Niavonavona ny fonao noho ny hatsaran-tarehinao; nosimbanao ny fahendrenao mbamin’ny famirapiratanao; nazerako eny amin’ny tany ianao sady natolotro ho fitalanjonan’ireo mpanjaka.

¹⁸Noho ny haben’ny helokao tamin’ny tsy fahamarinan’ny varotrao dia voalotonao ny fitoeranao masina; koa izany no hamoahako afo avy ao aminao handevona anao, ary hataoko tonga lavenona eny ambonin’ny tany ianao eo imason’izay rehetra mijery anao.

¹⁹Ny firenena rehetra izay mahalala anao dia ho gaga anao; ho tonga zava-mahatahotra ianao ary tsy hisy intsony mandrakizay!

²⁰Tonga tamiko ny tenin’NY TOMPO hoe:

²¹Ry zanak’olona*, manandrifia an’i Sidona, dia maminania ny hamelezana azy

²²ka lazao hoe: Izao no lazain’NY TOMPO Andriamanitra: Indro, hamely anao Aho, ry Sidona! Ary hankalazaina ao ampovoanao Aho; dia ho fantatra fa Izaho no TOMPO, rehefa manatanteraka ny fitsarana azy Aho ka miseho ho masina amin’ny ataoko aminy.

²³Fa hahatonga areti-mandringana hamely azy Aho ary ra eny an-dalambeny; hiampatrampatra eny aminy ny voatrabaky ny sabatra izay mamely avy eny rehetra eny; dia ho fantatra fa Izaho no TOMPO.

²⁴Ary tsy hisy roy mampangirifiry na tsilo mampanaintaina intsony ho an’ny taranak’Israely, avy amin’ireo manodidina azy, izay manao tsinontsinona azy; dia ho fantatra fa Izaho no TOMPO Andriamanitra.

²⁵Izao no lazain’NY TOMPO Andriamanitra: Rehefa angoniko avy any amin’ny firenena izay nampielezana azy ny taranak’Israely dia hiseho ho masina eo imason’ny firenena Aho amin’ny ataoko aminy ka honina any amin’ny taniny izay nomeko an’i Jakoba mpanompoko izy.

²⁶Dia handry fehizay any izy ka hanorina trano sy hanao tanim-boaloboka; eny, handry fehizay izy amin’ny anatanterahako ny fitsarana ireo rehetra manodidina azy izay manao tsinontsinona azy; dia ho fantatra fa Izaho no TOMPO Andriamaniny.