Read La Bible en Malgache Ezekiela 30 Bible Online

Ezekiela 30 - La Bible en Malgache bible

Ezekiela 30

¹Tonga tamiko ny tenin’NY TOMPO nanao hoe:

²Ry zanak’olona*, maminania ka lazao hoe: Izao no lazain’NY TOMPO Andriamanitra: Midradradradrà ianareo! Indrisy ny andro!

³Fa antomotra ny andro, Eny, antomotra ny Andron’NY TOMPO: Andro mandrahona sy fotoanan’ny Jentilisa* izany.

⁴Hisy sabatra tonga any Ejipta ary fangorohoroana fatratra any Kosy, rehefa miampatrampatra any Ejipta ny voatrabaka, ary ho lasa ny harenany sady ho rava ny fanorenany.

⁵I Kosy, i Pota, i Lidia, ny olona samihafa firenena rehetra, ny Kobiana ary ny zanaky ny tany vita fanekena dia hiaraka ho lavon-tsabatra aminy.

⁶Izao no lazain’NY TOMPO: Ho lavo koa izay manohana an’i Ejipta ary hietry ny fiavonavonan’ny heriny; hatrany Migdola ka hatrany Siena no ho lavon-tsabatra izy, hoy NY TOMPO Andriamanitra.

⁷Ho rava ao amin’ny tany rava izy, ary ny tanànany dia ho lao ao amin’ny tanàna lao,

⁸dia ho fantatra fa Izaho no TOMPO rehefa mampirehitra afo any Ejipta Aho ka torotoro izay rehetra manampy azy.

⁹Amin’izany andro izany dia hisy iraka mivoaka avy Amiko handeha an-tsambo hampahatahotra ny Kosita izay mitoetra tsy manana ahiahy, dia hangorohoro tahaka ny tamin’ny andro namelezana an’i Ejipta izy. Fa indro, avy izany!

¹⁰Izao no lazain’NY TOMPO Andriamanitra: Ny tanan’i Nebokadnezara mpanjakan’i Babilona no hoentiko mandevona ny harenan’i Ejipta.

¹¹Izy sy ny vahoakany manaraka azy, dia ireo masiaka indrindra amin’ny firenena, no hoentina handrava ny tany; hanatsoaka ny sabany hamely an’i Ejipta ireny ka ho feno faty ny tany.

¹²Hahatankina an’i Neily sy hivarotra ny tany ho eo an-tanan’ny ratsy fanahy Aho, ary ny tanan’ny hafa firenena no hoentiko mandrava ny tany mbamin’izay rehetra ao aminy. Izaho TOMPO no niteny izany.

¹³Izao no lazain’NY TOMPO Andriamanitra: Horavako koa ny sampy, ary hatsahatro ny andriamanitra tsy izy ao Nofa; ary tsy hisy mpanjaka intsony amin’ny tany Ejipta.

¹⁴Handrava an’i Patrosa Aho ary hampirehitra afo any Zoana, ary hotanterahiko ny fitsarana an’i No.

¹⁵Hampidina ny fahatezerako amin’i Sina, fiarovana mafy any Ejipta, Aho, ary hofongorako ny vahoaka be any No.

¹⁶Hampirehitra afo any Ejipta Aho; hiolanolana fatratra i Sina noho ny faharariany; ho voabanga ny mandan’i No ary i Nofa dia hasian’ny fahavalo amin’ny andro antoandro.

¹⁷Ny zatovon’i Avena sy Py-Beseta dia ho lavon-tsabatra sady ho lasan-ko babo ny ao.

¹⁸Any Tapanesa dia ho maizina ny andro rehefa tapahiko any ny ziogan’i Ejipta ka hitsahatra ny fiavonavonan’ny heriny; hisy rahona hanarona azy sady ho lasan-ko babo ny zanany vavy.

¹⁹Toy izany no hanatanterahako ny fitsarana an’i Ejipta; dia ho fantatra fa Izaho no TOMPO.

²⁰Tamin’ny andro fahafito tamin’ny volana voalohany, tamin’ny taona fahiraika amby folo dia tonga tamiko ny tenin’NY TOMPO hoe:

²¹Ry zanak’olona*, ny sandrin’i Farao mpanjakan’i Ejipta dia efa notorotoroiko, ary e! Tsy notsaboina mba ho sitrana izy na nofehezina lamba mba hanatanjaka azy ka hahatan-tsabatra.

²²Koa izany no nanaovan’NY TOMPO Andriamanitra hoe: Indro, hamely an’i Farao mpanjakan’i Ejipta Aho ka hotorotoroiko ny sandriny, na ny mbola matanjaka, na ny efa torotoro; ary hampilatsaka ny sabatra eny an-tanany Aho.

²³Dia haeliko ho any amin’ny firenena samihafa ny Ejiptiana ka hahahako any amin’ny tany samihafa.

²⁴Fa hampahatanjahiko kosa ny sandrin’ny mpanjakan’i Babilona ka hataoko eny an-tanany ny sabatro; hotorotoroiko ny sandrin’i Farao, dia hitrona eo anatrehany toy ny fitronan’ny voatrabaka izy.

²⁵Eny, hampahatanjahiko ny sandrin’ny mpanjakan’i Babilona, dia hiraviravy ny sandrin’i Farao ka ho fantatra fa Izaho no TOMPO, rehefa ataoko eny an-tanan’ny mpanjakan’i Babilona ny sabatro ka haingainy hamelezana ny tany Ejipta.

²⁶Dia haeliko ho any amin’ny firenena samihafa ny Ejiptiana ka hahahako any amin’ny tany samihafa; dia ho fantatra fa Izaho no TOMPO.