Read La Bible en Malgache Ezekiela 31 Bible Online

Ezekiela 31 - La Bible en Malgache bible

Ezekiela 31

¹Tamin’ny andro voalohany tamin’ny volana fahatelo, tamin’ny taona fahiraika amby folo dia tonga tamiko ny tenin’NY TOMPO hoe:

²Ry zanak’olona*, lazao amin’i Farao mpanjakan’i Ejipta sy amin’ny vahoakany marobe hoe: Tahaka an’iza moa ianao amin’ny fahalehibiazanao?

³Indro, i Asiria dia sedera tsara rantsana any Libanona, misandrahaka manalokaloka sady mijoroaka avo ka mitehika amin’ny rahona matevina ny tendrony.

⁴Ny rano no nahalehibe azy, eny, ny rano any amin’ny lalina no nampijoroaka azy, ary ny ranovelona no nandeha manodidina ny tany nambolena azy ka nampandeha ny lakandranony hankany amin’ny hazo rehetra any an-tsaha.

⁵Koa nisandratra ho avo noho ny hazo rehetra any an-tsaha izy, ary nihamaro ny sampany sady nihalava ny rantsany noho ny habetsahan’ny rano tamin’ny fisandrahany.

⁶Teo amin’ny sampany no nanaovan’ny voromanidina rehetra akany ary teo ambanin’ny rantsany no niterahan’ny bibidia rehetra, sady teo amin’ny alokalony no nitoeran’ny firenena marobe.

⁷Koa tsara tarehy tamin’ny fahalehibiazany sy ny halavan’ny sampany izy, fa tany amin’ny rano maro ny vahany.

⁸Tsy nahatakona azy ny sedera tao amin’ny sahan’Andriamanitra; tsy mba nahatoraka ny sampany ny hazo kipreso, tsy mba nanana rantsana tahaka azy ny hazo platana; tsy nisy tsara tarehy tahaka azy ny hazo rehetra tany amin’ny sahan’Andriamanitra.

⁹Nohatsaraiko tamin’ny haben’ny rantsany ny tarehiny ka nialona azy ny hazo rehetra tany Edena, dia ireo tany amin’ny sahan’Andriamanitra.

¹⁰Koa izany no nitenenan’NY TOMPO Andriamanitra hoe: Satria nisandratra avo ianao ka nanandratra ny lohanao teo amin’ny rahona matevina, ary nirehareha ny fonao noho ny haavony,

¹¹dia hatolotro eo an-tanan’ilay mahery amin’ny firenena ianao; hamely anao tokoa io; noho ny faharatsianao no nandroahako anao.

¹²Izay fahavalo masiaka indrindra amin’ny firenena no nanapaka azy sady nanary azy; ary dia nihahaka teny an-tendrombohitra sy lohasaha rehetra teny ny sampany, ary notapatapahina teny amoron’ny ony rehetra amin’ny tany ny rantsany; dia nidina niala tamin’ny alokalony ny firenena rehetra ka nahafoy azy.

¹³Mipetraka eo amin’ny vatany nianjera ny voromanidina rehetra ary eny amin’ny sampany ny bibidia rehetra

¹⁴mba tsy hisy hiavonavona intsony noho ny haavony ny hazo rehetra eny amoron’ny rano, na hanandratra ny lohany ho eo amin’ny rahona matevina sady tsy hisy hitoky amin’ny haavony intsony ny hazo mifo-drano rehetra. Fa voatolotra ho faty ho any ambanin’ny tany izy rehetra, ho any amin’ny zanak’olombelona, dia any amin’izay midina any an-davaka.

¹⁵Izao no lazain’NY TOMPO Andriamanitra: Tamin’ny andro nidinany ho any amin’ny fitoeran’ny maty* dia nampanao fisaonana Aho: Nanarona ny rano any amin’ny lalina* noho ny aminy Aho sady nanampina ny ony avy aminy ka nijanona ny ranobe; nampisaoniko i Libanona noho ny aminy ka nalazo noho izany ny hazo rehetra tany an-tsaha.

¹⁶Tamin’ny fiezinezin’ny fianjerany dia nampihorohoroiko ny firenena rehefa nampidiniko ho any amin’ny fitoeran’ny maty izy ho naman’izay midina any an-davaka; ary ny hazo rehetra any Edena, dia ny notsongaina sady soa indrindra any Libanona, izay mifo-drano rehetra, dia samy nampionona ny tenany any ambanin’ny tany.

¹⁷Ireo koa dia niara-nidina taminy ho any amin’ny fitoeran’ny maty ho any amin’izay voatrabaky ny sabatra, mbamin’ireo izay nianteherany ka nipetraka teo ambanin’ny alokalony teo amin’ny firenena.

¹⁸Tahaka an’iza amin’ny hazo any Edena moa ianao amin’izao voninahitra sy fahalehibiazana izao? Hampidinina ho any ambanin’ny tany miaraka amin’ny hazo any Edena ianao. Eo amin’ny tsy voafora no hiamparanao, dia eo amin’izay voatrabaky ny sabatra. I Farao sy ny vahoakany marobe rehetra izany, hoy NY TOMPO Andriamanitra.