Read La Bible en Malgache Ezekiela 32 Bible Online

Ezekiela 32 - La Bible en Malgache bible

Ezekiela 32

¹Tamin’ny andro voalohany tamin’ny volana faharoa amby folo, tamin’ny taona faharoa amby folo dia tonga tamiko ny tenin’NY TOMPO hoe:

²Ry zanak’olona*, manaova hira fahalahelovana ny amin’i Farao mpanjakan’i Ejipta ka lazao aminy hoe: Nanao ny tenanao ho tahaka ny liona tanora tamin’ny firenena ianao, kanjo tahaka ny dragona ao anatin’ny ranomasina; nitsoriaka teny amin’ny oninao ianao dia nanakobankobana ny rano tamin’ny tongotrao ka nahaloto ny ony.

³Izao no lazain’NY TOMPO Andriamanitra: Ny firenena betsaka tafatambatra no hoentiko mamelatra ny haratoko aminao ary hakarin’ireny amin’ny haratoko ianao.

⁴Hatsipiko eny an-tanety ianao ary hariako any an-tsaha, dia hampitangoroniko eo aminao ny voromanidina rehetra ka homeko hivokisan’ny bibidia rehetra ny tenanao.

⁵Haeliko eny an-tendrombohitra ny nofonao ary hofenoiko ny tenabenao ny lohasaha.

⁶Hataoko safotry ny ranao ny tany, hatramin’ny tendrombohitra aza; ary ho feno anao ny ony.

⁷Rehefa vonoiko ny fahazavanao dia hosaronako ny lanitra; hotafiako lamba fisaonana ny kintany; ny masoandro dia hotakonako rahona ary ny volana dia tsy hangarangarana.

⁸Eny, noho ny aminao dia hotafiako lamba fisaonana avokoa ireny fanazavana eny amin’ny lanitra ireny ary hosaronako haizina ny taninao, hoy NY TOMPO Andriamanitra.

⁹Hataoko sosotra ny fon’ny firenena maro rehefa ampandrenesiko ny firenena maro ny naharavanao, dia ny amin’ny tany izay tsy fantatrao.

¹⁰Eny, hataoko talanjona anao ny firenena maro, ary hipararetra noho ny aminao ny mpanjakany, rehefa asidiko eo imasony ny sabatro, ary samy hangovitra lalandava noho ny ainy izy amin’ny andro haharavanao.

¹¹Fa izao no lazain’NY TOMPO Andriamanitra: Ny sabatry ny mpanjakan’i Babilona dia ho tonga aminao.

¹²Ny sabatry ny mahery izay samy masiaka indrindra amin’ny firenena, no hoentiko mandavo ny vahoakanao marobe, dia horavany ny reharehan’i Ejipta ka ho fongotra ny vahoakany marobe rehetra.

¹³Haringako koa ny biby fiompiny rehetra eny amoron’ny ranobe, ary tsy hanakobankobana azy intsony ny tongotry ny olona na handoto azy ny kitron’ny biby fiompy.

¹⁴Dia hampandriako ny ranony ka hampandehaniko toy ny diloilo ny oniny, hoy NY TOMPO Andriamanitra,

¹⁵Rehefa ataoko lao ny tany Ejipta ka hofoanako amin’ny tany izay rehetra nahafeno azy teo; haringako ny monina rehetra ao aminy, dia ho fantatra fa Izaho no TOMPO.

¹⁶Izany no hira fahalahelovana hataon’ny olona. Ny zanakavavin’ny firenena no hihira izany; eny, ho fisaonana an’i Ejipta sy ny vahoakany marobe rehetra no hihirany izany, hoy NY TOMPO Andriamanitra.

¹⁷Tamin’ny andro fahadimy amby folo tamin’ny volana, tamin’ny taona faharoa amby folo dia tonga tamiko ny tenin’NY TOMPO hoe:

¹⁸Ry zanak’olona, isaony ny vahoaka maroben’i Ejipta, ary ampidino izy mbamin’ny zanakavavin’ny firenena malaza ho any ambanin’ny tany, miaraka amin’izay midina any an-davaka!

¹⁹Mihoatra noho ny an’iza moa ny hatsaran-tarehinao? Midìna ka mandria miaraka amin’izay tsy voafora!

²⁰Any amin’ny voatrabaky ny sabatra no hiampatramparany; ny sabatra dia efa voatolotra: Tariho i Ejipta mbamin’ny vahoakany marobe rehetra!

²¹Izy sy ny nanampy azy no resahin’ireo malaza amin’ny lehilahy mahery any amin’ny fitoeran’ny maty*: Tafidina ka miampatra ny tsy voafora, dia ireo voatrabaky ny sabatra.

²²Ao koa i Asiria mbamin’ny vahoakany marobe rehetra; manodidina azy ny fasany; voatrabaka izy rehetra, samy lavon’ny sabatra.

²³Natao any amin’ny lavaka farany ambany ny fasany, ary ny vahoakany marobe dia manodidina ny fasany; voatrabaka izy rehetra, samy lavon’ny sabatra, dia ireo izay nahatonga tahotra tany amin’ny tanin’ny velona.

²⁴Ao koa i Elama mbamin’ny vahoakany marobe rehetra manodidina ny fasany; voatrabaka izy rehetra, samy lavon’ny sabatra ka tafidina tsy voafora ho any ambanin’ny tany, dia ireo nahatonga ny fahatahorana azy tany amin’ny tanin’ny velona, samy mitondra henatra miaraka amin’izay midina any an-davaka.

²⁵Teo amin’ny voatrabaka no nanaovana fandriana ho azy mbamin’ny vahoakany marobe rehetra; manodidina azy ny fasany, izy rehetra dia samy tsy voafora sady voatrabaky ny sabatra satria niely tany amin’ny tanin’ny velona ny fahatahorana azy, ary samy mitondra henatra miaraka amin’izay midina any an-davaka izy; teo amin’ny voatrabaka no nametrahany azy.

²⁶Ao koa i Meseka, i Tobala mbamin’ny vahoakany marobe rehetra; manodidina azy ny fasany; samy tsy voafora izy rehetra sady voatrabaky ny sabatra, satria nahatonga ny fahatahorana azy tany amin’ny tanin’ny velona izy.

²⁷Tsy hiara-mandry amin’ny lehilahy mahery izay lavo isan’ny tsy voafora izy, dia ireo tafidina any amin’ny fitoeran’ny maty ka mitondra ny fiadiany, sady voapetraka eo ambanin’ny lohany ny sabany, ary ao amin’ny taolany ny helony satria nampahatahotra ny mahery tany amin’ny tanin’ny velona izy.

²⁸Eny, ianao dia haripaka eo amin’ny tsy voafora ka hiara-miampatra amin’ny voatrabaky ny sabatra!

²⁹Ao koa i Edoma mbamin’ny mpanjakany sy ny mpitarika rehetra tao aminy, izay natao ao amin’ny voatrabaky ny sabatra na dia be aza ny heriny; miara-miampatra amin’ny tsy voafora izy, sy amin’izay midina any an-davaka.

³⁰Ao koa ireo mpanapaka ny any avaratra rehetra sy ny Sidoniana rehetra izay niara-nidina tamin’ny voatrabaka; menatra izy, na dia efa natahorana noho ny heriny aza; miampatra ny tsy voafora miaraka amin’izay voatrabaky ny sabatra ka mitondra henatra miaraka amin’izay midina any an-davaka.

³¹Ireny dia ho hitan’i Farao ka hionona ny amin’ny vahoakany marobe izy. Voatrabaky ny sabatra i Farao mbamin’ny miaramilany rehetra, hoy NY TOMPO Andriamanitra.

³²Fa efa nahatonga ny fahatahorana Ahy any amin’ny tanin’ny velona Aho; ary i Farao dia hampandriana any amin’ny tsy voafora, miaraka amin’ireo voatrabaky ny sabatra, dia i Farao mbamin’ny vahoakany marobe rehetra, hoy NY TOMPO Andriamanitra.