Read La Bible en Malgache Ezekiela 34 Bible Online

Ezekiela 34 - La Bible en Malgache bible

Ezekiela 34

¹Tonga tamiko ny tenin’NY TOMPO hoe:

²Ry zanak’olona*, maminania ny hamelezana ny mpiandry ny Israely! Eny, maminania ka lazao aminy, amin’ny mpiandry hoe: Izao no lazain’NY TOMPO Andriamanitra: Lozan’ny mpiandry ondrin’ny Israely izay mamahan-tena! Moa tsy ny ondry va no tokony handrasan’ny mpiandry?

³Ny taviny dia haninareo, ary ny volony dia itafinareo; ny nafahy dia vonoinareo nefa ny ondry tsy mba andrasanareo.

⁴Tsy manatanjaka ny malemy ianareo, na manasitrana ny marary, na nifehy izay tapaka ny tongony, na mamerina ny diso lalana, na mikatsaka ny very; fa loza loatra ny nanjakazakanareo taminy.

⁵Dia miely izy satria tsy misy mpiandry; ary rehefa miely izy dia tonga rembin’ny bibidia rehetra.

⁶Mirenireny eny an-tendrombohitra sy eny amin’ny havoana rehetra ny ondriko; eny, any amin’ny tany rehetra no ielezan’ny ondriko ary tsy misy mitady na miahy azy.

⁷Koa mihainoa ny tenin’NY TOMPO ianareo, ry mpiandry ondry:

⁸Raha velona koa Aho, hoy NY TOMPO Andriamanitra, noho ny ondriko tonga babo sy ny ondriko tonga rembin’ny bibidia rehetra, satria tsy nisy mpiandry azy, ary tsy nitady ny ondriko ny mpiandry fa ny mamahan-tena kosa no ataony ka tsy namahana ny ondriko,

⁹dia mihainoa ny tenin’NY TOMPO ianareo, ry mpiandry ondry!

¹⁰Izao no lazain’NY TOMPO Andriamanitra: Indro, avy hamely ny mpiandry ondry Aho, dia hampamoahiko ny amin’ny ondriko izy ka hesoriko tsy hiandry ny ondry intsony; dia tsy hamahan-tena intsony ny mpiandry ondry fa hosarihiko avy eo am-bavany ny ondriko mba tsy ho azony hohanina intsony.

¹¹Fa izao no lazain’NY TOMPO Andriamanitra: Indro, Izaho, eny, Izaho no hiahy ny ondriko sy hikarakara azy.

¹²Toy ny fikarakaran’ny mpiandry ny ondriny rehefa eo anivon’ny ondriny izay efa niely izy, dia toy izany no hikarakarako ny ondriko sy hisarihako azy avy amin’ny toerana rehetra nielezany tamin’ny andro mandrahona sy feno haizim-pito.

¹³Hoentiko mivoaka avy any amin’ny firenena izy ka hangoniko avy any amin’ny tany samihafa; hoentiko any amin’ny taniny izy ary handrasako eny amin’ny tendrombohitry ny Israely sy eny amin’ny lohasahan-driaka ary eny amin’izay tsara honenana rehetra eo amin’ny tany.

¹⁴Eny amin’ny tany tsara ho fiandrasana no hiandrasako azy ary eny amin’ny tendrombohitra avon’ny Israely no ho tany hiandrasana azy; any no handriany amin’ny tany tsara ary eny amin’ny fiandrasana tsara ahitra no hihinanany, dia any amin’ny tendrombohitry ny Israely.

¹⁵Izaho no hiandry ny ondriko ary Izaho no hampandry azy, hoy NY TOMPO Andriamanitra.

¹⁶Ny very dia hotadiaviko, ny diso lalana haveriko, ny naratra hotsaboiko, ny malemy hohatanjahiko; fa ny matavy sy ny matanjaka kosa dia haringako. Handrasako amin’ny fitondrana tsara ny ondriko.

¹⁷Fa ny aminareo, ry ondriko, izao no lazain’NY TOMPO Andriamanitra: Indro, hotsaraiko ny adin’ny ondry aman’osy amin’ny namany, dia ny ady ataon’ny ondrilahy amin’ny osilahy.

¹⁸Moa ataonareo ho zavatra kely va ny nandanianareo ny ahitra tsara no dia nohosihosen’ny tongotrareo ny ahitrareo sisa, ary ny nisotroanareo ny rano madio no dia nolotoin’ny tongotrareo ny sisa?

¹⁹Ary ny amin’ny ondriko, moa izay voahosihosin’ny tongotrareo va no hohaniny, ary izay voaloton’ny tongotrareo va no hosotroiny?

²⁰Koa izao no lazain’NY TOMPO Andriamanitra aminy: Indro, Izaho, eny, Izaho no hitsara ny adin’ny ondry matavy amin’ny ondry mahia.

²¹Satria ny tehezanareo sy ny sorokareo no entinareo manosika ny marary rehetra, ary ny tandrokareo no entinareo manoto azy ka aronjinareo ho any ivelany izy,

²²dia hovonjeko ny ondriko ka tsy ho babo intsony izy, ary hotsaraiko ny adin’ny ondry amin’ny ondry namany.

²³Hanangana mpiandry tokana ho azy, izay hiandry azy Aho, dia i Davida mpanompoko. Izy no hitondra azy, ary izy no ho mpiandry azy.

²⁴Izaho TOMPO no ho Andriamaniny, ary i Davida mpanompoko no ho Mpanapaka aminy. Izaho TOMPO no niteny izany.

²⁵Hanao fanekem-pihavanana aminy Aho ka hampiala ny biby masiaka tsy ho eo amin’ny tany intsony, dia handry fehizay izy na dia any an-tany efitra aza, sady hatory na dia any anaty ala aza.

²⁶Izy sy ny manodidina ny havoanako dia hataoko fitahiana, ary hampilatsaka ranonorana amin’ny fotoanany Aho, dia ranonoram-pitahiana mivatravatra.

²⁷Hamoa ny hazo any an-tsaha sady hahavokatra ny tany, ary handry fehizay amin’ny tany izy; dia ho fantany fa Izaho no TOMPO, rehefa tapahiko ny ziogany, ary hafahako amin’ny tanan’izay nampanompo azy izy.

²⁸Tsy ho babon’ny Jentilisa* na ho rembin’ny bibidia intsony izy fa handry fehizay, ary tsy hisy hampitahotra azy.

²⁹Ary hampaniry saha malaza ho azy Aho ka tsy ho ritran’ny mosary amin’ny tany intsony izy na hitondra ny latsan’ny Jentilisa intsony;

³⁰dia ho fantany fa Izaho, NY TOMPO Andriamaniny, no momba azy, ary izy, taranak’Israely, no oloko, hoy NY TOMPO Andriamanitra.

³¹Ary ny aminareo ondriko, izay ondry andrasako, olombelona ianareo, ary Izaho no Andriamanitrareo, hoy NY TOMPO Andriamanitra.