Read La Bible en Malgache Ezekiela 35 Bible Online

Ezekiela 35 - La Bible en Malgache bible

Ezekiela 35

¹Tonga tamiko ny tenin’NY TOMPO hoe:

²Ry zanak’olona*, manandrifia ny tendrombohitra Seìra ka maminania ny hamelezana azy,

³dia lazao aminy hoe: Izao no lazain’NY TOMPO Andriamanitra: Indro, avy hamely anao Aho, ry tendrombohitra Seìra! Hatsotrako aminao ny tanako ka hataoko foana sy lao ianao.

⁴Ny tanànanao dia hataoko korontam-bato, ary ianao dia ho lao; dia ho fantatrao fa Izaho no TOMPO.

⁵Noho ny fandrafianao hatry ny ela, sy ny nanoloranao ny Zanak’Israely ho fatin’ny sabatra tamin’ny andro nahitany loza, rehefa tonga tamin’ny fanaperany ny heloka,

⁶dia izao no lazain’NY TOMPO: Raha velona koa Aho, dia hataoko manjary ra ianao, ary ra no hanenjika anao; satria tsy nankahalainao ny ra, dia ra kosa no hanenjika anao.

⁷Hataoko foana sy lao ny tendrombohitra Seìra ary hofongorako izay rehetra mamakivaky ao.

⁸Hofenoiko ny olony voavono ny tendrombohiny; eny, any amin’ny havoananao sy ny lohasahanao ary any amoron’ny lohasahan-driakanao rehetra no hiampatramparan’izay voatrabaky ny sabatra.

⁹Hataoko rava mandrakizay ianao, ary tsy honenana intsony ny tanànanao, dia ho fantatrareo fa Izaho no TOMPO.

¹⁰Noho ny nilazanao hoe: Ireto firenena roa ireto sy ireto tany roa ireto dia ho ahy avokoa ka horaisinay ny fanananay, kanefa teo ihany NY TOMPO,

¹¹dia izao no lazain’NY TOMPO: Raha velona koa Aho dia hanao araka ny fahatezerana sy ny fialonana izay nasehonao tamin’ny fandrafiana azy; ary hampahafantariko azy ny tenako rehefa mitsara azy Aho.

¹²Dia ho fantatrao fa Izaho TOMPO no efa nandre ny fanaratsiana izay nolazainao ny amin’ireny tendrombohitry ny Israely hoe: Tonga tany foana ireny ka nomena anay ho fivelomanay.

¹³Nanao teny miavonavona namely Ahy ianareo ary nanamaro ny teninareo namely Ahy, ary reko avokoa izany.

¹⁴Izao no lazain’NY TOMPO Andriamanitra: Rehefa mifaly ny tany manontolo dia hataoko tany foana kosa ianao.

¹⁵Toy ny nifalianao ny amin’ny lovan’ny taranak’Israely, satria tonga tany foana ireny, dia toy izany kosa no hataoko aminao: Hataoko tonga tany foana ianao, ry tendrombohitra Seìra sy Edoma rehetra; dia ho fantatra fa Izaho no TOMPO.