Read La Bible en Malgache Ezekiela 37 Bible Online

Ezekiela 37 - La Bible en Malgache bible

Ezekiela 37

¹Tonga tamiko ny tanan’NY TOMPO, ary ny Fanahy no nitondran’NY TOMPO ahy nivoaka, dia napetrany teo amin’ny lohasaha iray feno taolana aho.

²Ary nitondra ahy nandehandeha teny amin’ireo Izy; ary indreo, marobe ireo tao amin’ny lohasaha, ary indreo, maina dia maina ireo.

³Ary hoy NY TOMPO tamiko: Ry zanak’olona*, moa mety ho velona ihany va ireto taolana ireto? Ary hoy aho: TOMPO Andriamanitra ô, Ianao no mahalala!

⁴Dia hoy indray Izy tamiko: Maminania amin’ireto taolana ireto ka lazao aminy hoe: Ry taola-maina, mihainoa ny tenin’NY TOMPO!

⁵Izao no lazain’NY TOMPO Andriamanitra amin’ireto taolana ireto: Indro, hasiako fofonaina ianareo dia ho velona;

⁶hasiako ozatra ianareo ka hampaniriako nofo; hosaronako hoditra ianareo; ary hasiako fofonaina ianareo ka ho velona; dia ho fantatrareo fa Izaho no TOMPO.

⁷Dia naminany aho araka izay efa nandidiana ahy, ary raha mbola naminany aho dia injany nisy feo! Ary indreo nihetsiketsika sady nifanatonatona ny taolana, samy nanatona ny taolana namany avy.

⁸Ary hitako fa indro, nisy hozatra sy nofo teo aminy, ary nisarona hoditra izy nefa tsy mbola nisy fofonaina tao aminy.

⁹Dia hoy Izy tamiko: Maminania amin’ny fofonaina, eny, maminania, ry zanak’olona, koa lazao amin’ny fofonaina hoe: Izao no lazain’NY TOMPO Andriamanitra: Manatòna avy amin’ny rivotra efatra, ry fofonaina, ka tsotsofy ireo voavono ireo mba ho velona izy.

¹⁰Dia naminany araka izay efa nandidiany ahy aho ka nidiran’ny fofonaina ireo ary velona, dia nijoro tamin’ny tongony izy: Tafika lehibe dia lehibe tokoa.

¹¹Dia hoy Izy tamiko: Ry zanak’olona, ireto taolana ireto dia ny taranak’Israely rehetra; indreo izy miteny hoe: Maina ny taolanay, levona ny fanantenanay, fongotra izahay!

¹²Koa maminania ka lazao aminy hoe: Izao no lazain’NY TOMPO Andriamanitra: Indro, ry oloko, Izaho no hanokatra ny fasanareo, ary hampiakariko avy amin’ny fasanareo ianareo ka ho entiko ho any amin’ny tanin’ny Israely;

¹³dia ho fantatrareo fa Izaho no TOMPO, rehefa manokatra ny fasanareo Aho, ry oloko, ka mampiakatra anareo hiala amin’ny fasanareo!

¹⁴Ary hataoko ao anatinareo ny Fanahiko dia ho velona ianareo, ary hamponeniko any amin’ny taninareo ianareo; dia ho fantatrareo fa Izaho TOMPO no efa niteny sady nanatanteraka izany, hoy NY TOMPO.

¹⁵Ary tonga tamiko ny tenin’NY TOMPO hoe:

¹⁶Ary ianao, ry zanak’olona*, makà tapa-kazo iray ka asio soratra hoe: Ho an’ny Joda sy ho an’ny Zanak’Israely namany. Dia makà tapa-kazo iray hafa koa ka asio soratra hoe: Ho an’i Josefa, dia tapa-kazon’i Efraima izany, sy ho an’ny taranak’Israely namany rehetra.

¹⁷Ary ampifanatony izy roa ho tonga tapa-kazo iray ihany, dia ho tafaray eny an-tananao izy.

¹⁸Ary raha miteny aminao ny zanaky ny firenenao hoe: Moa tsy hilaza izay hevitrao amin’izany va ianao?

¹⁹Dia lazao aminy hoe: Izao no lazain’NY TOMPO Andriamanitra: Indro, Izaho haka ny tapa-kazon’i Josefa izay eny an-tanan’i Efraima, sy ny fokon’ny Israely namany, ary hakambako ho eo amin’ny tapa-kazon’i Joda izy, ary hataoko tapa-kazo iray ihany izy ka ho tonga iray eny an-tanako.

²⁰Ary ny tapa-kazo izay hasianao soratra dia ho eny an-tananao, eo imasony.

²¹Dia lazao aminy hoe: Izao no lazain’NY TOMPO Andriamanitra: Indro, Izaho no haka ny Zanak’Israely avy any amin’ny Jentilisa* izay nalehany, eny, hangoniko avy any amin’ny manodidina any izy ka hoentiko any amin’ny taniny.

²²Hataoko firenena tokana any amin’ny tany izy, dia any amin’ny tendrombohitry ny Israely, ary mpanjaka iray ihany no ho mpanjakan’izy rehetra, ka tsy ho firenena roa intsony izy ary tsy hisaraka ho fanjakana roa intsony.

²³Tsy handoto tena amin’ny sampiny, na amin’ny fahavetavetany, na amin’ny fahadisoany intsony izy, fa hovonjeko ho afaka amin’ny fonenany rehetra izay nanotany izy, ary hodioviko izy ka ho oloko, ary Izaho ho Andriamaniny.

²⁴Ary i Davida mpanompoko no ho mpanjakany; ary hiray mpiandry izy rehetra dia handeha araka ny fitsipiko izy sady hitandrina ny lalànako sy hankatò izany.

²⁵Ary honina any amin’ny tany izay nomeko an’i Jakoba mpanompoko izy, dia ilay efa nonenan’ny razanareo, ka honina any izy sy ny zanany mbamin’ny zafiny mandrakizay; ary i Davida mpanompoko no ho mpitarika azy mandrakizay.

²⁶Ary hanao fanekem-pihavanana ho azy Aho ka ho fanekena mandrakizay eo aminy izany, ary hampiorim-ponenana azy sy hahamaro azy Aho sady hampiorina ny fitoerako masina eo aminy mandrakizay.

²⁷Ary ny tabernakeliko dia ho eo aminy; Izaho ho Andriamaniny ary ho oloko izy;

²⁸dia ho fantatry ny Jentilisa fa Izaho TOMPO no manamasina ny Israely, rehefa eo aminy mandrakizay ny fitoerako masina.