Read La Bible en Malgache Ezekiela 38 Bible Online

Ezekiela 38 - La Bible en Malgache bible

Ezekiela 38

¹Tonga tamiko ny tenin’NY TOMPO hoe:

²Ry zanak’olona*, manandrifia an’i Goga avy any amin’ny tany Magoga, izay mpanjakan’i Rosy sy i Meseka ary i Tobala, ary maminania ny hamelezana azy

³ka lazao hoe: Izao no lazain’NY TOMPO Andriamanitra: Indro, avy hamely anao Aho, ry Goga, mpanjakan’i Rosy sy i Meseka ary i Tobala.

⁴Hitaritarika anao Aho ka hanisy masom-by ny valanoranonao ary hoentiko mivoaka ianao sy ny tafikao rehetra, dia ny soavaly sy ny mpitaingin-tsoavaly izay samy mitafy marevaka, dia olona marobe mitondra ampinga lehibe sy ampinga kely, ary samy mitan-tsabatra;

⁵miaraka aminy ny Persiana, i Kosy ary i Pota, samy mitondra ampinga lehibe sy fiarovan-doha avokoa,

⁶i Gomera koa mbamin’ny miaramilany rehetra, ny taranak’i Togarma avy any amin’ny farany avaratra mbamin’ny miaramilany rehetra, dia firenena maro izay miaraka aminao.

⁷Miomàna ka mitaova tsara ianao, eny, ianao sy ireo mpomba anao izay efa mivory ao aminao, ary aoka ianao no ho mpiaro azy.

⁸Rehefa afaka andro maro dia hantsoina ianao; any aoriana any dia ho tonga any amin’ny tany izay novonjena ka afaka tamin’ny sabatra ianao, dia ny tanin’ny olona izay novoriana avy tany amin’ny firenena maro, any amin’ny tendrombohitry ny Israely izay efa lao hatry ny ela; fa efa navoaka avy tany amin’ny firenena izy ka mandry fehizay izy rehetra.

⁹Eny, hiakatra ianao, ary ho tahaka ny fiavin’ny rivo-doza no hiavianao, ho tahaka ny rahona hanarona ny tany, dia ianao sy ny miaramilanao rehetra mbamin’ny firenena maro izay miaraka aminao.

¹⁰Izao no lazain’NY TOMPO Andriamanitra: Amin’izany andro izany dia hisy eritreritra hiditra ao an-tsainao, ary hamorona hevi-dratsy ianao

¹¹ka hiteny hoe: Hiakatra hamely ny tany izay misy tanàna tsy mimanda aho; hankany amin’izay mandry fehizay sy mitoetra tsy manana ahiahy aho, samy monina ao an-tanàna tsy misy manda na hidy na vavahady izy rehetra,

¹²mba hamabo sy handroba ary hamely indray izay efa rava, saingy vao misy mponina ankehitriny izao, ary ny firenena izay nangonina avy tany amin’ny Jentilisa* sady nihary omby sy fananana, dia ireo mitoetra ao amin’ny foiben’ny tany.

¹³I Sheba sy i Dedana ary ny mpivaro-mandehan’i Tarsisy rehetra mbamin’ireo lionany tanora rehetra dia hiteny aminao hoe: Tonga hamabo va ianao? Nangoninao handroba va ireto olonao betsaka ireto, hahalasa volafotsy sy volamena, handroba harena sy fananana ary hahazo babo betsaka?

¹⁴Koa maminania, ry zanak’olona, ka lazao amin’i Goga hoe: Izao no lazain’NY TOMPO Andriamanitra: Amin’izany andro hitoeran’ny Israely oloko mandry fehizay izany, moa tsy ho fantatrao va izany?

¹⁵Ho tonga avy any amin’ny fonenanao avy any amin’ny farany avaratra ianao mbamin’ny firenena maro miaraka aminao, izay samy mitaingin-tsoavaly, dia olona maro be sy miaramila betsaka;

¹⁶ary hiakatra hamely ny Israely oloko tahaka ny fiakatry ny rahona hanarona ny tany ianao. Any aoriana any no ho tonga izany. Hoentiko hamely ny taniko ianao, mba hahafantaran’ny firenena Ahy, rehefa miseho ho masina eo anatrehany Aho amin’ny ataoko aminao, ry Goga!

¹⁷Izao no lazain’NY TOMPO Andriamanitra: Moa ianao va ilay nampilazaiko ny mpanompoko hatramin’ny fahiny, dia ny mpaminanin’ny Israely, izay naminany ela tamin’izany andro izany ny hampiakarako anao hamely azy?

¹⁸Amin’izany andro izany, dia ny andro hiavian’i Goga hamely ny tanin’ny Israely, hoy NY TOMPO Andriamanitra, dia hiefonefona eo am-bavoroko ny fahatezerako.

¹⁹Fa amin’ny fahasaro-piaroko sy ny afon’ny fahatezerako no nitenenako hoe: Amin’izany andro izany dia hisy horohoron-tany mafy any amin’ny tanin’ny Israely

²⁰ka hangorohoro eo anatrehako ny hazandrano any an-dranomasina, ny voromanidina, ny bibidia ary ny biby mandady sy mikisaka rehetra izay mandady sy mikisaka amin’ny tany, ary ny olona rehetra ambonin’ny tany; dia hazera ny tendrombohitra, hikoa ny fiakarana mideza, ary hirodana ny ampiantany rehetra.

²¹Dia hiantso sabatra hamely azy eny amin’ny tendrombohitro rehetra Aho, hoy NY TOMPO Andriamanitra. Hifamely sabatra amin’ny namany avy izy rehetra.

²²Ary hamaly azy amin’ny areti-mandringana, ny ra, ny ranonorana manafotra ary ny havandra vaventy Aho; ary koa, handatsaka afo sy solifara aminy sy amin’ny miaramilany mbamin’ny firenena maro izay miaraka aminy Aho.

²³Dia hasehoko ny fahalehibiazako sy ny fahamasinako, ary ho fantatra eo imason’ny firenena maro Aho; dia ho fantany fa Izaho no TOMPO.