Read La Bible en Malgache Ezekiela 39 Bible Online

Ezekiela 39 - La Bible en Malgache bible

Ezekiela 39

¹Ary ianao, ry zanak’olona*, maminania ny hamelezana an’i Goga ka lazao hoe: Izao no lazain’NY TOMPO Andriamanitra: Indro, hamely anao Aho, ry Goga, mpanjakan’i Rosy sy i Meseka ary i Tobala.

²Hitaritarika sy hitondra anao hiakatra avy any amin’ny farany avaratra Aho, dia hoentiko ho any amin’ny tendrombohitry ny Israely ianao.

³Hasiako ny tsipìkanao hiala eny an-tananao havia, ary halatsako hiala eny an-tananao havanana ny zana-tsipìkanao.

⁴Any amin’ny tendrombohitry ny Israely no hiampatramparanao sy ny miaramilanao rehetra mbamin’ny firenena izay miaraka aminao; homeko hohanin’ny vorona mpihaza samihafa karazana rehetra sy ny bibidia ianao.

⁵Eny an-tsaha no hiamparanao; fa Izaho no efa niteny, hoy NY TOMPO Andriamanitra.

⁶Handefasako afo i Magoga sy izay mipetraka tsy manana ahiahy any amoron-tsiraka; dia ho fantany fa Izaho no TOMPO.

⁷Ary ny anarako masina dia hataoko fantatra ao amin’ny Israely oloko; tsy havelako hamavoina intsony ny anarako masina; dia ho fantatry ny firenena fa Izaho no TOMPO izay masina ao amin’ny Israely.

⁸Indro, tonga izany ary efa tanteraka, hoy NY TOMPO Andriamanitra. Izany no andro izay nolazaiko.

⁹Ary hivoaka ny mponina ao amin’ny tanànan’ny Israely ka handrehitra sy hitaina ny fiadiana, dia ny ampinga lehibe, ny tsipìka sy ny zana-tsipìka, ny langilangy sy ny lefona, ary hitaina izany mandritra ny fito taona izy;

¹⁰fa tsy haka kitay hazo any an-tsaha na hanapaka hazo any an’ala izy, fa hitaina ny fiadiana ka hamabo izay efa namabo azy sy handroba izay efa nandroba azy, hoy NY TOMPO Andriamanitra.

¹¹Amin’izany andro izany dia homeko tany eo amin’ny Israely i Goga hasiana fasana, dia ny lohasahan’ny mpandalo eo atsinanan’ny ranomasina, ka hanampin-dalana ny mpandalo izany; any no handevenana an’i Goga sy ny vahoakany marobe rehetra; ary ny anarany dia hatao hoe Lohasahan’ireo vahoaka maroben’i Goga.

¹²Fito volana mipaka no handevenan’ny taranak’Israely azy, hanadiovany ny tany.

¹³Eny, ny tompon-tany rehetra no handevina azy; ary ho laza ho azy amin’ny andro hampisehoako ny voninahitro izany, hoy NY TOMPO Andriamanitra.

¹⁴Ary hisy olona hotendrena hitety tsy mitsahatra ny tany ka handevina izay mbola tavela eny ambonin’ny tany, hanadiovana azy. Hikaroka mandritra ny fito volana izy.

¹⁵Ary rehefa mandeha mitety ny tany ireo mpitety tany ka mahita taolan’olona dia hanangana marika eo anilany izy, mandra-pandevin’ny mpandevina izany ao amin’ny Lohasahan’ireo vahoaka maroben’i Goga.

¹⁶Ary hisy tanàna koa hatao hoe Hamona[10]. Toy izany no hanadiovany ny tany.

¹⁷Ary ianao, ry zanak’olona, dia izao no lazain’NY TOMPO Andriamanitra: Lazao amin’ny voromanidina rehetra sy ny bibidia rehetra hoe: Mivoria ianareo ka mankanesa atỳ; miangòna ianareo avy amin’ny manodidina ho amin’ny fanatitro izay vonoiko ho anareo, dia fanatitra lehibe eny amin’ny tendrombohitry ny Israely, hihinananareo nofo sy hisotroanareo ra.

¹⁸Ny nofon’ny lehilahy mahery no hohaninareo, ary ny ran’ireo mpanjakan’ny tany no hosotroinareo, dia ondrilahy, zanak’ondry, osilahy ary vantotra ombilahy, samy mifahy avy any Basana izy rehetra.

¹⁹Dia hihinana matavy ianareo mandra-pahavokinareo ary hisotro ra mandra-paha-leonareo avy amin’ny fanatitro izay novonoiko ho anareo.

²⁰Ary ho voky soavaly sy ny mpitaingina azy ary lehilahy mahery mbamin’ny miaramila rehetra eo amin’ny latabatro ianareo, hoy NY TOMPO Andriamanitra.

²¹Dia hasehoko any amin’ny Jentilisa* ny voninahitro ka hohitan’ny firenena rehetra ny fitsarana hataoko sy ny tanako izay hatsotrako aminy.

²²Ary ho fantatry ny taranak’Israely fa Izaho no TOMPO Andriamaniny hatramin’iny andro iny ka hatramin’ny ho avy rehetra.

²³Ho fantatry ny Jentilisa fa ny heloky ny taranak’Israely no nahababo azy; fa satria nivadika Tamiko izy dia izany no nanafenako ny tavako taminy sy nanolorako azy ho eo an-tanan’ny fahavalony, dia lavon-tsabatra izy rehetra.

²⁴Araka ny fahalotoany sy ny fahadisoany no navaliko azy sy nanafenako ny tavako taminy.

²⁵Koa izao no lazain’NY TOMPO Andriamanitra: Ankehitriny dia haveriko ho toy ny teo aloha i Jakoba, ary hamindrako fo ny taranak’Israely rehetra; ary hiseho ho saro-piaro noho ny amin’ny anarako masina Aho.

²⁶Dia hivesatra ny fahamenarany sy ny fahadisoany rehetra izay nahadiso azy Tamiko izy rehefa mandry fehizay ao amin’ny taniny ka tsy hisy hampitahotra azy.

²⁷Rehefa ampodiko avy any amin’ny firenena izy ary angoniko avy any amin’ny tanin’ny fahavalony dia hiseho ho masina eo imason’ny Jentilisa Aho amin’ny ataoko amin’ireny;

²⁸dia ho fantany fa Izaho TOMPO no Andriamaniny amin’ny ampandehanako azy ho babo any amin’ny firenena sy amin’ny anangonako azy ho any amin’ny taniny ka tsy hisy hafoiko any izy na dia iray akory aza.

²⁹Tsy hafeniko aminy intsony ny tavako; fa haidiko ao amin’ny taranak’Israely ny Fanahiko, hoy NY TOMPO Andriamanitra.