Read La Bible en Malgache Ezekiela 4 Bible Online

Ezekiela 4 - La Bible en Malgache bible

Ezekiela 4

¹Ary ianao, ry zanak’olona*, makà biriky tanimanga ary apetraho eo anoloanao, dia manaova sarin-tanàna eo aminy, sarin’i Jerosalema.

²Dia ataovy fahirano izany ka manangàna manda fanafihana hamelezana azy; manandrata tovon-tany eo aminy, asio toby hamelezana azy ary anangano lohondry fandravana manodidina azy.

³Ary makà lapoaly vy ka ataovy manda vy eo anelanelanao sy ny tanàna; banjino tsara io, ary aoka hatao fahirano, eny, aoka hataonao fahirano io. Famantarana ho amin’ny taranak’Israely izany.

⁴Ary ianao, mandria amin’ny ilanao havia ka ataovy eo aminy ny fahotan’ny taranak’Israely; koa araka ny isan’ny andro handrianao toy izany no hitondranao ny helony.

⁵Fa Izaho manao fetrandro ho anao mitovy amin’ny taonan’ny helony, dia sivifolo sy telonjato andro izay hitondranao ny heloky ny taranak’Israely.

⁶Rehefa tapitrao ireo dia mandria amin’ny ilanao havanana, ary aoka hitondra ny heloky ny taranak’i Joda efapolo andro ianao; ny andro iray no ataoko solon’ny taona iray ho anao.

⁷Dia banjino tsara io fahirano an’i Jerosalema io, ary aoka hiseho sandry ianao ka haminany hamely azy.

⁸Ary indro, hafatotro ianao ka tsy hahavadi-mandry ambara-pahatapitrao ny andron’ny fahiranonao.

⁹Ary makà varimbazaha, tsaramaso, voanemba, tsiasisa, ampemby sy spelta ary ataovy anaty vilia iray ireo ka anaovy mofo ho anao; araka ny isan’ny andro izay handrianao amin’ny ilanao, dia sivifolo sy telonjato andro, no hihinananao azy.

¹⁰Tsinjaraina no hihinananao ny haninao, dia roapolo sekela isanandro; amin’ny fotoana voafetra isanandro no hihinananao azy.

¹¹Rano afàtra no hosotroinao, ampahenin’ny hina*; amin’ny fotoana voafetra isanandro koa no hisotroanao azy.

¹²Hatao toy ny mofo varimbazaha no ho fihinanao azy, ary dikin’olona no hataonao kitay hanendasanao azy eo imasony.

¹³Ary hoy NY TOMPO: Toy izany no hihinanan’ny Zanak’Israely ny mofony voaloto any amin’ny firenena izay handroahako azy.

¹⁴Dia hoy aho: Indrisy! Ry TOMPO Andriamanitra ô! Indro, tsy mbola voaloto aho; fa hatry ny fony aho mbola tanora ka mandraka ankehitriny dia tsy mba nihinana izay fatin-javatra na izay noviraviraim-biby akory aho; ary tsy mbola nikasika ny vavako akory izay hena ratsy.

¹⁵Dia hoy Izy tamiko: Indro ary, tain’omby no omeko anao hisolo ny dikin’olona ka izany no hataonao kitay hanendasanao ny mofonao.

¹⁶Hoy koa Izy tamiko: Ry zanak’olona, indro, hotapahiko any Jerosalema ny mofo tohan’aina ka antsinjarany, amin’ny tebiteby, no hihinanany mofo, ary rano afàtra no hosotroiny amin’ny tahotra.

¹⁷Koa tsy hahita mofo na rano izy, ary samy ho raiki-tahotra sady hihalevona noho ny helony.