Read La Bible en Malgache Ezekiela 42 Bible Online

Ezekiela 42 - La Bible en Malgache bible

Ezekiela 42

¹Dia noentiny nivoaka nianavaratra ho any amin’ny kianja ivelany aho, ary nampidiriny ho ao amin’ny efitrano tandrifin’ny kianja voafaritra sady tandrifin’ilay vatan-trano eo amin’ny avaratra.

²Io vatan-trano io, izay nisy ny varavarana avaratra, dia zato hakiho* ny lavany ary dimampolo hakiho ny sakany.

³Tandrifin’ny roapolo hakiho amin’ny kianja anatiny sady tandrifin’ny lampivato amin’ny kianja ivelany dia nisy lalantsara nifanandrify tamin’ny lalantsara telo miantoana.

⁴Teo anoloan’ireo efitrano dia nisy lalana mankao anatiny, folo hakiho ny sakany, ary lalana zato hakiho izany; nanatrika ny avaratra ny varavarany.

⁵Ary nohakelezina ny efitrano ambony fa nanalana ny ho lalantsara ka izany no nahakely azy noho ny ambany sy ny antenantenany.

⁶Natao rihana telo ireo fa tsy nisy andry tahaka ny andrin’ny kianja ka izany no nahakely azy noho ny ao ambany sy ny ao antenantenany, hatreny amin’ny tany.

⁷Ary nisy ampiantany teo ivelany, tandrifin’ny efitrano, nanatrika ny kianja ivelany, teo anoloan’ny efitrano ka dimampolo hakiho ny lavany.

⁸Fa ny lavan’ireo efitrano izay teo amin’ny kianja ivelany dia dimampolo hakiho; ary indro, ny teo anoloan’ny tempoly dia zato hakiho.

⁹Teo ambanin’ireo efitrano ireo dia nisy fidirana avy eo atsinanana raha miditra avy eo amin’ny kianja ivelany.

¹⁰Nisy efitrano koa teo amin’ny sakan’ny ampiantany teo amin’ny kianja, teo amin’ny atsinanana, tandrifin’ilay kianja voafaritra sady tandrifin’ny vatan-trano.

¹¹Nisy lalana teo anoloany, ary tahaka ny endriky ny efitrano teo amin’ny avaratra ny fijery azy sady mitovy amin’ireo avokoa ny lavany sy ny sakany ary ny fivoahana avy ao aminy mbamin’ny fombafombany rehetra sy ny varavarany.

¹²Tahaka ny varavaran’ny efitrano eo amin’ny atsimo dia nisy varavarana koa teo amin’ny fiandohan’ny lalana, dia ilay lalana eo anoloan’ny ampiantany mifanolotra aminy, dia ny lalana avy eo amin’ny atsinanana, raha miditra ao aminy.

¹³Dia hoy izy tamiko: Ny efitrano avaratra sy ny efitrano atsimo izay eo anoloan’ny kianja voatokana, dia efitrano masina; any ny mpisorona izay manatona NY TOMPO no mihinana ny zavatra masina indrindra; any no hametrahany izay zavatra masina indrindra, dia ny fanatitra avy amin’ny vokatry ny tany sy ny fanatitra noho ny ota ary ny fanati-panonerana. Masina io toerana io.

¹⁴Rehefa miditra ao ny mpisorona dia tsy hiala amin’ny fitoerana masina ho any amin’ny kianja ivelany izy, fa ao no hametrahany ny fitafiana masina izay noentiny nanao fanompoana satria masina ireo; ary hitafy fitafiana hafa izy vao manatona ny vahoaka.

¹⁵Nony voarefiny ny Trano anatiny dia noentiny nivoaka nankany amin’ny vavahady izay manatrika ny atsinanana aho, ary nandrefy ny manodidina izy.

¹⁶Norefesiny tamin’ny volotara fandrefesana ny lafiny atsinanana ka indimanjaton’ny volotara manodidina, tamin’ny volatara fandrefesana.

¹⁷Norefesiny koa ny lafiny avaratra ka indimanjaton’ny volotara manodidina, tamin’ny volotara fandrefesana.

¹⁸Norefesiny koa ny lafiny atsimo ka indimanjaton’ny volotara, tamin’ny volotara fandrefesana.

¹⁹Nitodika nankany amin’ny lafiny andrefana izy ka nandrefy indimanjaton’ny volotara, tamin’ny volotara fandrefesana.

²⁰Norefesiny avokoa ny lafiny efatra. Nisy ampiantany manodidina, indimanjaton’ny volotara fandrefesana ny lavany ary indimanjatony koa ny sakany, hampiavaka ny masina sy ny tsy masina.