Read La Bible en Malgache Ezekiela 7 Bible Online

Ezekiela 7 - La Bible en Malgache bible

Ezekiela 7

¹Tonga tamiko ny tenin’NY TOMPO hoe:

²Ary ianao, ry zanak’olona*, izao no lazain’NY TOMPO Andriamanitra amin’ny tanin’ny Israely: Injao ny farany! Eny, efa mby akaiky ny farany ho amin’ny vazan-tany efatra!

³Ankehitriny dia efa mby akaikinao ny farany, ary halefako aminao ny fahatezerako dia hotsaraiko araka ny lalanao ianao ka hatambesatro aminao ny fahavetavetanao rehetra.

⁴Tsy hiantra anao ny masoko sady tsy hamindra fo Aho; fa hatambesatro aminao ny lalanao ary ny fahavetavetanao dia ho eo aminao. Dia ho fantatrareo fa Izaho no TOMPO.

⁵Izao no lazain’NY TOMPO Andriamanitra: Injao! Avy ny loza, dia loza izay tsy misy toa azy!

⁶Njao ny farany! Eny, efa akaiky ny farany! Mifoha hamely anao izany! Indro, efa mby akaiky iny!

⁷Efa akaiky ny anjaranao, ry mponina amin’ny tany! Efa akaiky ny fotoana, efa antomotra ny andro! Akoran’ady fa tsy fihobiana, eny an-tendrombohitra!

⁸Vetivety foana dia hampidiniko aminao ny fahatezerako, ary hotanterahiko aminao ny fahavinirako ka hotsaraiko araka ny lalanao ianao, ary hatambesatro aminao ny fahavetavetanao.

⁹Tsy hiantra anao ny masoko sady tsy hamindra fo Aho; hatambesatro aminao ny lalanao, ary ny fahavetavetanao dia ho eo aminao dia ho fantatrareo fa Izaho TOMPO no mamely.

¹⁰Indro ny andro, indro efa akaiky izany! Miseho ny anjaranao! Mamony ny tsorakazo! Manorobona ny avonavona!

¹¹Ny fanaovana an-keriny dia mitsangana ho tsorakazo hamelezan’ny faharatsiana; tsy hisy tavela intsony aminy, na ny hamaroany na ny harenany na ny zava-mendrika eo aminy.

¹²Efa mby akaiky ny fotoana, antomotra ny andro! Aoka tsy hifaly ny mpividy ary aoka halahelo ny mpivarotra! Fa iharan’ny fahatezerana mirehitra ny harembeny rehetra.

¹³Fa ny mpivarotra dia tsy hifodian’izay efa lafony na dia mbola isan’ny velona aza izy; fa ny fahitana ny amin’ny hanjo ny harembe dia tsy hitsoaka, ary tsy hisy hamonjy ny ainy amin’ny helony.

¹⁴Efa notsofina ny trompetra ka vonona ny zavatra rehetra nefa tsy misy mankany amin’ny ady satria iharan’ny fahatezerako mirehitra ny harembe rehetra.

¹⁵Ny sabatra no eny ivelany ary ny areti-mandringana sy ny mosary no ao an-trano! Izay any an-tsaha dia ho fatin-tsabatra ary izay any an-tanàna kosa dia ho levon’ny mosary sy ny areti-mandringana.

¹⁶Ary na dia misy afa-mandositra aza dia ho eny an-tendrombohitra izy ka ho toy ny voromailala an-dohasaha: Izy rehetra dia samy hitoloko avokoa noho ny helony.

¹⁷Hiraviravy ny tanana rehetra ary ho toy ny rano ny lohalika rehetra.

¹⁸Hisikina lamba fisaonana izy ka hanafotra azy ny horohoro; ho menatra ny tava rehetra ary ho voasola ny lohan’izy rehetra.

¹⁹Ny volafotsiny dia hariany eny an-dalambe ary ny volamenany dia hataony ho zava-maloto; ny volafotsiny sy ny volamenany dia tsy hahavonjy azy amin’ny andron’ny fahatezeran’NY TOMPO; tsy hahavoky ny tendany na hahafeno ny kibony izany satria izany no nahatonga heloka ho azy.

²⁰Nataony firavaka tsara tarehy hoentiny mirehareha ireny sady noentiny nanao ireo sary fahavetavetany, dia ireo zava-maharikoriko nataony. Koa izany no hanaovako azy ireny ho zava-maloto.

²¹Hatolotro ho babo eny an-tanan’ny hafa firenena izy, eny, ho babo ho an’ny ratsy fanahy amin’ny tany ka holotoin’ireny izy.

²²Dia hiamboho azy koa Aho ka holotoina ny rakitro, fa hiditra ao aminy ny mpandroba ka handoto azy.

²³Manefe gadra! Fa feno fitsarana mandatsa-dra ny tany ary feno fampahoriana ny tanàna.

²⁴Koa hitondra izay firenena ratsy indrindra Aho ka ho lasan’ireny ny tranony; ary hatsahatro ny avonavon’ny mahery sady holotoina ny fitoerany masina.

²⁵Ho avy ny fampangovitana! Hitady fiadanana izy nefa tsy hisy izany!

²⁶Mifanontona ny fandravana, mifandimby ny filazan-doza; dia manontany fahitana amin’ny mpaminany izy nefa tsy misy lalàna intsony amin’ny mpisorona, na fahendrena amin’ny zokiolona.

²⁷Hitomany ny mpanjaka, eny, hitafy fahaverezan-kevitra ny andriana, hangovitra ny tanan’ny vahoaka. Araka ny lalany ihany no hataoko aminy, ary hotsaraiko araka ny fitsarana nataony izy dia ho fantany fa Izaho no TOMPO.