Read La Bible en Malgache Ezekiela 9 Bible Online

Ezekiela 9 - La Bible en Malgache bible

Ezekiela 9

¹Ary niantso tamin’ny feo mahery teo anatrehako NY TOMPO hoe: Manakeke ianareo, ry mpiambina ny tanàna, ka samia mitondra ny fiadiany eny an-tanany avy ho enti-mandringana!

²Ary indreo, nisy lehilahy enina avy teo amin’ny vavahady ambony izay manatrika ny avaratra, samy nitondra ny fiasany fanorotoroana teny an-tanany avy izy; ary ny iray tamin’ireo dia nitafy lamba rongony fotsy sady nisy fitoeran-dranomaintin’ny mpitantsoratra teo amin’ny andilany. Dia niditra izy ireo ka nijoro teo anilan’ny alitara varahina.

³Ary ny voninahitry ny Andriamanitry ny Israely dia niakatra ka niala teo amin’ny kerobima* izay nitoerany, ho eo amin’ny tokonam-baravaran’ny Trano, ary Izy dia niantso ilay lehilahy nitafy lamba rongony fotsy izay nisy fitoeran-dranomaintin’ny mpitantsoratra teo amin’ny andilany.

⁴Ary hoy NY TOMPO taminy: Mandehana mamakivaky ny tanàna, dia Jerosalema, ka asio marika[2] ny handrin’ny olona izay misento sy mitaraina noho ny fahavetavetana rehetra atao ao aminy.

⁵Ary reko Izy niteny tamin’ny sasany hoe: Mandehana manaraka azy ianareo hamakivaky ny tanàna ka mameleza; aoka tsy hamindra fo ny masonareo ary aza ananana antra!

⁶Na lahiantitra na zatovo na virijiny na zaza madinika na vehivavy, dia aringano avokoa; fa izay olona misy ilay marika ihany no aza kasihina; ary atombohy hatreo amin’ny fitoerako masina izany. Dia nanomboka tamin’ny lahiantitra izay teo anoloan’ny Trano ireo.

⁷Ary hoy Izy tamin’ireo: Lotoy ny Trano ary fenoy faty ny kianja! Mivoaha ianareo! Dia nivoaka izy ireo ka namely ny tao an-tanàna.

⁸Ary raha mbola namely izy, ary izaho ihany no sisa teo, dia niankohoka aho ka nitaraina hoe: Indrisy! Ry TOMPO Andriamanitra ô! Haringanao va ny sisa rehetra amin’ny Israely amin’izao ampidinanao ny fahatezeranao amin’i Jerosalema izao?

⁹Dia hoy Izy tamiko: Lehibe dia lehibe ny heloky ny taranak’Israely sy ny Joda; feno ran’olona nalatsaka ny tany sady feno fitsarana miangatra ny tanàna satria hoy izy: NY TOMPO efa nahafoy ny tany ary NY TOMPO tsy mahita.

¹⁰Ary Izaho kosa dia tsy hiantra ny masoko sady tsy hamindra fo Aho fa hatsingeriko ho eo an-dohany ny lalany.

¹¹Ary indro, Ralehilahy, ilay nitafy lamba rongony fotsy sady nisy fitoeran-dranomainty teo amin’ny andilany, dia nitondra teny niverina hoe: Efa vitako izay nandidianao ahy.