Read La Bible en Malgache Daniela 1 Bible Online

Daniela 1 - La Bible en Malgache bible

Daniela 1

¹Tamin’ny taona fahatelo nanjakan’i Joiakima, mpanjakan’ny Joda, no nankanesan’i Nebokadnezara mpanjakan’i Babilona tany Jerosalema sy nanaovany fahirano azy.

²Ary ny Tompo nanolotra an’i Joiakima, mpanjakan’ny Joda, mbamin’ny fanaka sasany tao amin’ny tranon’Andriamanitra ho eo an-tanany. Dia noentiny ho any amin’ny tany Sinara, ho ao amin’ny tranon’ireo andriamaniny ireo; ary ny fanaka dia nampidiriny tao amin’ny trano fitahirizana an’ireo andriamaniny.

³Nandidy an’i Aspenaza, lehiben’ny tandapany, ny mpanjaka mba hitondra ny sasany amin’ny Zanak’Israely avy amin’ny taranaky ny mpanjaka na avy amin’ny fianakavian’andriana,

⁴dia zatovo izay tsy nanan-kilema fa tsara tarehy sady mendrika amin’ny fahendrena rehetra no manam-pahalalana ary mazava saina ka sahaza hitoetra ao an-dapan’ny mpanjaka; nasainy nampianarina ny soratra sy ny tenin’ny Kaldeana ireo.

⁵Nampanokana hanina ho azy ireo isanandro avy tamin’ny haniny sy avy tamin’ny divay izay fisotrony ny mpanjaka mba hamelomana azy ireo mandritra ny telo taona, fa rehefa afaka izany dia hijoro eo anatrehan’ny mpanjaka izy.

⁶Tamin’izy ireo dia nisy avy amin’ny taranak’i Joda: I Daniela sy i Hanania ary i Misaela sy i Azaria.

⁷Nomen’ny lehiben’ny tandapa anarana ireo ka i Daniela dia nataony hoe Beltesazara, i Hanania kosa dia Sadraka, i Misaela indray dia Mesaka, ary i Azaria dia nataony hoe Abed-Nego.

⁸Fa i Daniela dia ninia tao am-pony tsy handoto ny tenany tamin’ny anjara hanina avy tamin’ny hanin’ny mpanjaka, na tamin’ny divay izay fisotrony ka nangataka tamin’ny lehiben’ny tandapa izy mba havelany tsy handoto ny tenany.

⁹Dia nataon’Andriamanitra nahita fitia sy famindrampo tamin’ilay lehiben’ny tandapa i Daniela.

¹⁰Ary hoy ilay lehiben’ny tandapa tamin’i Daniela: Matahotra ny mpanjaka tompoko izay nampanokana ny hohaninareo sy ny hosotroinareo aho; fa hanao ahoana raha mahita ny tarehinareo mahia noho ny an’ny zatovo namanareo izy, moa tsy hahameloka ahy amin’ny mpanjaka va ianareo ka hotapahiny ny lohako?

¹¹Dia hoy i Daniela tamin’ny mpiambina izay notendren’ny lehiben’ny tandapa ho mpiambina an’i Daniela sy i Hanania sy i Misaela ary i Azaria:

¹²Miangavy anao aho, zahao toetra mandritra ny hafoloana izahay mpanomponao, ary aoka homena legioma hohaninay sy rano hosotroinay.

¹³Dia aoka hojerena eo anatrehanao ny tarehinay sy ny tarehin’ny zatovo izay mihinana ny anjara avy amin’ny hanin’ny mpanjaka, koa araka izay hitanao no ataovy amin’ny mpanomponao.

¹⁴Nanaiky izany tolo-kevitra izany izy ka nanara-maso azy ireo nandritra ny hafoloana.

¹⁵Nony tapitra ny hafoloana dia hita fa mandimandina sy matavy aza ny tarehin’izy ireo noho ny an’ny zatovo hafa rehetra izay nihinana anjara avy tamin’ny hanin’ny mpanjaka.

¹⁶Dia najanon’ilay mpiambina ny anjara haniny sy ny divay tokony hosotroiny ka legioma no nomeny azy.

¹⁷Nomen’Andriamanitra fahalalana sy saina ny amin’ny soratra sy ny fahendrena rehetra ireo zatovo efa-dahy ireo, ary i Daniela dia nahay namantatra ny amin’ny fahitana sy ny nofy rehetra.

¹⁸Nony tonga ny andro nasain’ny mpanjaka hitondrana azy ireo dia noentin’ilay lehiben’ny tandapa niditra teo anatrehan’i Nebokadnezara izy.

¹⁹Niresaka tamin’izy ireo ny mpanjaka ka tamin’izy rehetra dia tsy nisy hitany ho tahaka an’i Daniela sy i Hanania sy i Misaela ary i Azaria. Dia nitoetra teo anatrehan’ny mpanjaka izy ireo.

²⁰Ary ny amin’ny fahendrena sy ny fahalalana rehetra izay nanontanian’ny mpanjaka azy dia hitany fa nanan-tombo avo folo heny noho ny ombiasy rehetra sy ny mpisikidy izay tao amin’ny fanjakany rehetra aza izy ireo.

²¹Ary nahatratra ny taona voalohany nanjakan’i Kirosy mpanjaka i Daniela.