Read La Bible en Malgache Daniela 4 Bible Online

Daniela 4 - La Bible en Malgache bible

Daniela 4

¹Izaho Nebokadnezara dia niadana tao an-tranoko ary finaritra tao an-dapako.

²Nanonofy zavatra nahatahotra aho ka nieritreritra teo am-pandrianako, satria ny fahitan’ny lohako dia naharaiki-tahotra ahy.

³Dia nandidy aho mba hoentina eo anatrehako ny olon-kendrin’i Babilona rehetra hilaza amiko ny hevitry ny nofy.

⁴Dia niditra ny ombiasy, ny mpisikidy, ny Kaldeana ary ny mpanandro; ary nambarako teo anatrehany ny nofy, kanjo tsy nahalaza ny heviny tamiko ireny.

⁵Nony farany anefa dia niditra teo anatrehako kosa i Daniela, izay antsoina hoe Beltesazara, araka ny anaran’ny andriamanitro; sady misy fanahin’ireo andriamanitra masina ao anatiny; ary ny nofy dia nambarako teo anatrehany hoe:

⁶Ry Beltesazara, lehiben’ny ombiasy, fantatro fa misy fanahin’ireo andriamanitra masina ao anatinao, ary tsy misy zavamiafina manahirana anao, koa ambarao ahy ny fahitana izay hitako tamin’ny nofy mbamin’ny heviny.

⁷Fa izao no fahitana tao an-dohako raha teo am-pandriana aho: Nijery aho ka indro, nisy hazo teo afovoan’ny tany, ary avo dia avo ilay izy.

⁸Nihalehibe sy niha nahery io hazo io; nipaka tamin’ny lanitra ny haavony ary ny fijery azy dia hatrany amin’ny faran’ny tany rehetra.

⁹Tsara tarehy ny raviny ary betsaka ny voany sady teo aminy dia nisy hanina ho an’ny rehetra; teny ambaniny no nialokalofan’ny bibidia; teny amin’ny sampany no nitoeran’ny voromanidina ary nahazo hanina avy aminy ny nofo rehetra.

¹⁰Tamin’ny fahitana tao an-dohako raha teo am-pandriana aho no nahitako fa indro, nisy mpiambina masina iray nidina avy tany an-danitra.

¹¹Niantso mafy izy hoe: Kapao io hazo io dia rantsano; ahintsano ny raviny ary aelezo ny voany; aoka ny biby handositra avy eo ambaniny, ary ny vorona hiala avy eny amin’ny rantsany.

¹²Nefa avelao amin’ny tany ao aminy ihany ny fotony ka asio fehy vy sy varahina ao amin’ny ahitra any an-tsaha. Aoka ho kotsan’ny andon’ny lanitra izy, ary aoka ny ahitra amin’ny tany no ho anjarany, toy ny an’ny biby.

¹³Hovana tsy ho fon’olombelona ny fony; fom-biby no ho ao aminy; fetrandro fito no holanina aminy.

¹⁴Didin’ny mpiambina izany zavatra izany; eny, avy amin’ny tendrin’ireo masina izany zavatra izany mba hahafantaran’ny velona fa ny Avo Indrindra no mitondra ny fanjakan’ny olona ka manome izany ho an’izay tiany, ary olona ambany toetra no mety hampifeheziny azy.

¹⁵Izany no nofy izay hitako, izaho Nebokadnezara. Ary ianao kosa, ry Beltesazara, lazao ny heviny, fa ny olon-kendry rehetra amin’ny fanjakako tsy nisy nahay nampahafantatra ahy ny hevitr’izany; fa ianao no mahay azy, satria misy fanahin’ireo andriamanitra masina ao anatinao.

¹⁶Nandritra ny fotoana fohy dia nitolagaga i Daniela, izay antsoina hoe Beltesazara, ary naharaiki-tahotra azy ny eritreriny. Ary niteny indray ny mpanjaka hoe: Ry Beltesazara ô! Aoka tsy haharaiki-tahotra anao ny nofy na ny heviny. Hoy ny navalin’i Beltesazara: Tompokolahy ô, ny nofy anie ho an’izay mankahala anao, ary ny heviny ho an’izay fahavalonao.

¹⁷Io hazo hitanao io dia ilay nihalehibe sy nihanahery, koa ny haavony dia nipaka tamin’ny lanitra ary ny fijery azy hatramin’ny tany rehetra;

¹⁸ny raviny dia tsara tarehy sady betsaka ny voany, ary teo aminy dia nisy hanina ho an’ny rehetra; teny ambaniny no nitoeran’ny bibidia ary teny amin’ny rantsany no nitoeran’ny voromanidina.

¹⁹Ianao indrindra izany, ry mpanjaka ô! Ianao dia nihalehibe sy niha nahery; fa ny fahalehibiazanao dia efa nitombo ka mipaka amin’ny lanitra, ary ny fanapahanao dia hatramin’ny faran’ny tany.

²⁰Hitan’ny mpanjaka ny mpiambina masina iray nidina avy tany an-danitra nilaza hoe: Kapao io hazo io ary simbao; nefa avelao amin’ny tany ao amin’ny ahitra maitso any an-tsaha ihany ny fotony, fa asio fehy vy sy varahina, ary aoka ho kotsan’ny andon’ny lanitra izy, ary aoka ny anjarany ho ao amin’ny bibidia, ambara-pahalanin’ny fetrandro fito aminy.

²¹Izao no heviny, ry mpanjaka, ary izao no tendrin’ny Avo Indrindra, izay mihatra amin’ny mpanjaka tompoko:

²²Horoahina hiala amin’ny olona ianao ary ho any amin’ny bibidia no fonenanao; hampihinanina ahitra toy ny omby ianao sady ho kotsan’ny andon’ny lanitra, ary fetrandro fito no holanina aminao, ambara-pahafantatrao fa ny Avo Indrindra no mitondra ny fanjakan’ny olona ka manome izany ho an’izay tiany.

²³Ny hevitry ny namelàna ny fotony dia satria mbola ho voatahiry ho anao ihany ny fanjakanao rehefa fantatrao fa ny lanitra no manapaka.

²⁴Koa aoka hankasitrahanao ny anatro, ry mpanjaka, koa ny fahamarinana no ento mampitsahatra ny fahotanao, ary ny fiantrana ny mahantra no ento mampitsahatra ny helokao, fandrao mba hampaharetina ihany ny fiadananao.

²⁵Ireo rehetra ireo dia nanjo an’i Nebokadnezara mpanjaka.

²⁶Nony afaka roa amby folo volana dia nitsangantsangana teo an-tampon’ny tranony tao Babilona izy.

²⁷Ary niteny ny mpanjaka hoe: Tsy ity va no Babilona lehibe, izay nataoko ho lapan’ny fanjakana tamin’ny haben’ny heriko mba ho voninahitry ny fahalehibiazako?

²⁸Raha mbola teo am-bavan’ny mpanjaka ihany ny teny dia nisy feo tonga avy tany an-danitra hoe: Ry Nebokadnezara mpanjaka! Ianao indrindra no ilazana hoe: Niala taminao ny fanjakana.

²⁹Horoahina hiala amin’ny olona ianao ka ho any amin’ny bibidia no fonenanao; hampihinanina ahitra toy ny omby ianao ary fetrandro fito no holanina aminao ambara-pahafantatrao fa ny Avo Indrindra no mitondra ny fanjakan’ny olona ka manome izany ho an’izay tiany.

³⁰Tamin’izay indrindra no nahatanterahan’izany tamin’i Nebokadnezara, fa noroahina niala tamin’ny olona izy ka nihinana ahitra toy ny omby, ary ny tenany dia kotsan’ny andon’ny lanitra ambara-panirin’ny volony ho toy ny an’ny voromahery, ary ny hohony ho toy ny an’ny vorona.

³¹Rehefa tapitra ny fe-potoana, izaho Nebokadnezara dia nampiandrandra ny masoko tamin’ny lanitra ka nody tamiko indray ny saiko ary nisaotra ny Avo Indrindra aho ary nidera sy nankalaza Ilay velona mandrakizay. Ny fanapahany dia fanapahana mandrakizay, ary ny fanjakany dia hahatratra ny taranaka fara aman-dimby,

³²ary ny mponina rehetra etỳ an-tany dia hatao tsinontsinona. Manao izay sitrapony amin’ireo tafika any an-danitra sy amin’ny mponina etỳ an-tany Izy. Ary tsy misy mahasakana Azy na miteny Aminy hoe: Inona ity ataonao?

³³Tamin’izay dia nody tamiko ny saiko ary nody tamiko koa ny lazako sy ny fahalehibiazako ho voninahitry ny fanjakako. Ny mpanolotsaina sy ny olo-manankaja eto amiko dia nitady ahy, koa nampitoerina teo amin’ny fanjakako aho, ary vao mainka niampy ny fahalehibiazako.

³⁴Koa amin’izany, izaho Nebokadnezara dia midera sy manandratra ary mankalaza ny Mpanjakan’ny lanitra; marina avokoa ny asany rehetra ary araka ny rariny ny lalany, ary izay mandeha amin’ny fiavonavonana dia hainy aetry.