Read La Bible en Malgache Daniela 6 Bible Online

Daniela 6 - La Bible en Malgache bible

Daniela 6

¹I Dariosy mediana no nandray ny fanjakana ka efa roa amby enimpolo taona izy tamin’izay.

²Sitrak’i Dariosy ny hanendry solo-mpanjaka roapolo amby zato hitondra ny fanjakana rehetra.

³Koa tamin’ireo dia nisy komandy lehibe telo lahy; i Daniela ny iray tamin’ireo, mba hitateran’ny solo-mpanjaka ny raharaha tsy hisy fahabangana ho an’ny mpanjaka.

⁴Izany Daniela izany dia nihoatra noho ny komandy lehibe sy ny solo-mpanjaka namany, satria nanana fanahy hafakely izy; ary nikasa hanandratra azy ho lehiben’ny fanjakana manontolo ny mpanjaka.

⁵Koa ny komandy lehibe sy ny solo-mpanjaka dia nitady izay hiampangany an’i Daniela ny amin’ny raharaham-panjakana, nefa tsy nahita izay hiampangany azy na izay tsininy akory izy ireo, satria marina izy ka tsy nisy kilema na tsiny hita taminy.

⁶Dia hoy ireo lehilahy ireo: Tsy ho hitantsika izay hiampangantsika io Daniela io raha tsy ny amin’ny lalànan’ny Andriamaniny no misy hitantsika hiampangana azy.

⁷Dia somaritaka nivory ho any amin’ny mpanjaka ireo komandy lehibe sy solo-mpanjaka ireo; ary izao no nolazainy taminy: Ry Dariosy mpanjaka ô, ho velona mandrakizay anie ianao!

⁸Ny komandy lehibe rehetra amin’ny fanjakana, ny manampahefana, ny solo-mpanjaka, ny mpanolotsaina ary ny governora, dia mifanara-kevitra fa tokony hanao lalàna sy didy mafy ianao, ry mpanjaka, koa na zovy na zovy no hanao fivavahana na amin’Andriamanitra na amin’olona ato anatin’ny telopolo andro, afa-tsy aminao ihany, ry mpanjaka ô, dia hatsipy ao an-davaky ny liona.

⁹Ankehitriny, ry mpanjaka ô, ataovy mafy ny lalàna ka asio sonia mba tsy hiova, araka ny lalànan’ny Mediana sy ny Persiana izay tsy azo ovana.

¹⁰Noho izany dia nasian’i Dariosy mpanjaka sonia izany lalàna sy didy izany.

¹¹Nony fantatr’i Daniela fa voaisy sonia ny didy dia nankao an-tranony izy; ary nivoha ny varavarankelin’ny tranony ambony rihana nanandrify an’i Jerosalema. Intelo isanandro no nandohalehany ka nivavaka sy nisaotra teo anatrehan’Andriamaniny, satria efa fanaony hatramin’ny taloha izany.

¹²Dia somaritaka nivory ireo lehilahy ireo rehefa nahita an’i Daniela mangataka sy mifona eo anatrehan’Andriamaniny.

¹³Ary nanatona izy ka noho ny amin’ilay lalànan’ny mpanjaka dia niteny teo anatrehan’ny mpanjaka hoe: Moa tsy misy lalàna nasianao sonia va, fa na zovy na zovy no hanao fivavahana, na amin’Andriamanitra na amin’olona, ato anatin’ny telopolo andro afa-tsy aminao ihany, ry mpanjaka ô, dia hatsipy ao an-davaky ny liona? Namaly ny mpanjaka hoe: Marina izany, araka ny lalànan’ny Mediana sy ny Persiana izay tsy azo ovana.

¹⁴Dia niteny teo anatrehan’ny mpanjaka izy ireo hoe: I Daniela, ilay isan’ny babo avy amin’ny taranak’i Joda dia tsy mba manaiky anao na ny lalàna izay nasianao sonia, ry mpanjaka ô, fa manao fivavahana intelo isanandro izy.

¹⁵Nalahelo mafy ny mpanjaka raha nahare izany teny izany; nefa satriny ihany ny hanafaka an’i Daniela ka nanao izay tratry ny sainy hamonjena azy izy mandra-pilentiky ny masoandro.

¹⁶Dia somaritaka nivory ho any amin’ny mpanjaka indray ireo lehilahy ireo ka niteny tamin’ny mpanjaka hoe: Aoka ho fantatrao, ry mpanjaka, fa izao no lalànan’ny Mediana sy ny Persiana: Ny lalàna sy ny didy izay navoakan’ny mpanjaka dia tsy azo ovana.

¹⁷Dia namoaka didy ny mpanjaka ary noentina i Daniela ka natsipy tao an-davaky ny liona. Ary niteny tamin’i Daniela ny mpanjaka hoe: Andriamanitrao izay tompoinao mandrakariva anie hamonjy anao.

¹⁸Nisy vato natampina ny vava lavaka; ary ny mpanjaka no nanidy izany tamin’ny fitombo-kaseny sy tamin’ny fitombo-kasen’ny olo-manankaja teo aminy, mba tsy hanovana ny teny ny amin’i Daniela.

¹⁹Dia nody tany an-dapany ny mpanjaka; tsy nihinan-kanina izy nandritra ny alina sady tsy nisy zazavavy mpandihy nampidirina teo anatrehany; eny, tsy nahita tory izy.

²⁰Dia nifoha vao maraina ny mpanjaka ka nandeha haingana ho any amin’ny lavaky ny liona.

²¹Nony tonga teo amin’ny lavaka izy dia niantso an’i Daniela tamin’ny feo malahelo; eny, niteny tamin’i Daniela ny mpanjaka hoe: Ry Daniela, mpanompon’Andriamanitra velona ô, moa Andriamanitrao izay tompoinao mandrakariva nahavonjy anao tamin’ny liona va?

²²Dia namaly ny mpanjaka i Daniela hoe: Ry mpanjaka, ho velona mandrakizay anie ianao!

²³Andriamanitro efa naniraka ny anjeliny ka nanakombona ny vavan’ny liona tsy handratra ahy, satria fahamarinana no hitany tamiko; ary teo anatrehanao koa, ry mpanjaka ô, dia tsy nanao ratsy aho.

²⁴Dia faly indrindra ny mpanjaka ka nasainy nakarina avy tao an-davaka i Daniela. Dia nakarina avy tao an-davaka i Daniela, ary hita fa tsy naninon-tsy naninona izy, satria nino an’Andriamaniny.

²⁵Ary namoaka didy ny mpanjaka ka noentina ireo lehilahy niampanga an’i Daniela ireo dia natsipy tao an-davaky ny liona izy mbamin’ny vady aman-janany; nandrombaka azy ireo ny liona ka nanapatapaka ny taolany raha tsy mbola nipaka tamin’ny fanambanin’ny lavaka akory aza izy ireo.

²⁶Taorianan’izany dia nanoratra ho amin’ny fokom-pirenena sy ny firenena sy ny samihafa fiteny rehetra izay monina ambonin’ny tany rehetra i Dariosy mpanjaka hoe: Hitombo anie ny fiadananareo!

²⁷Manao lalàna aho mba hangovitan’ny olona manerana ny fanjakako rehetra sy hatahorany eo anatrehan’ny Andriamanitr’i Daniela. Fa Izy no Andriamanitra velona sady maharitra mandrakizay; ny fanjakany dia tsy ho rava na oviana na oviana ary ny fahefany dia haharitra hatramin’ny farany.

²⁸Izy no mamonjy sy manafaka ary manao famantarana sy fahagagana any an-danitra sy etỳ an-tany, ary Izy no namonjy an’i Daniela ho afaka tamin’ny herin’ny liona.

²⁹Ary izany Daniela izany dia nambinina tamin’ny nanjakan’i Dariosy sy tamin’ny nanjakan’i Kirosy persiana.