Read La Bible en Malgache Daniela 7 Bible Online

Daniela 7 - La Bible en Malgache bible

Daniela 7

¹Tamin’ny taona voalohany nanjakan’i Belsazara, mpanjakan’i Babilona dia nanonofy i Daniela sady nahita fahitana tao am-pandrianany. Nosoratany ny nofy ka nambarany ny fotopototr’izany.

²Hoy i Daniela: Nahita tamin’ny fahitako tamin’ny alina aho, fa indreo ny rivotra efatry ny lanitra nampihetsika ny Ranomasina Lehibe.

³Ary nisy biby efatra lehibe samihafa niakatra avy tamin’ny ranomasina.

⁴Ny voalohany dia toy ny liona ary nanana elatry ny voromahery. Raha mbola nijery azy aho dia voahongotra ny elany ary natsangana avy tamin’ny tany izy ka najoro tamin’ny tongony roa toy ny fijoron’ny olona sady natao manana fon’olombelona.

⁵Indro ny faharoa koa dia biby hafa, tahaka ny bera nefa nisandratra tamin’ny ila tenany sady nisy taolan-tehezana telo teo am-bavany anelanelan’ny nifiny; ary toy izao no voalaza taminy: Mitsangàna, mihinàna nofo betsaka.

⁶Nony afaka izany dia nahita aho fa indro, nisy hafa koa, toy ny leoparda nefa nanana ela-borona efatra teo an-damosiny; nanana loha efatra io biby io ary nomena fanjakana izy.

⁷Nony afaka izany dia nahita tamin’ny fahitana tamin’ny alina aho, dia biby fahefatra mahatsiravina sady matanjaka sy tena mahery; nanana nify vy lehibe izy; nihinana sy nihotahota izy ary ny sisa tsy laniny dia nohosihosen’ny tongony; ary hafa noho ny biby rehetra teo alohany izy sady nanana tandroka folo.

⁸Nodinihiko ny tandroka ka indro, nisy tandroka iray kely koa nipoitra teo aminy, ary nongotana teo anoloan’io ny tandroka telo tamin’ireo taloha; ary indro, nanana maso toy ny mason’olona sy vava miteny zavatra feno avonavona izy.

⁹Raha mbola nijery aho dia nisy sezafiandrianana maro napetraka, ary nisy Lahiantitra iray nipetraka teo, ny fitafiany dia fotsy toy ny orampanala ary ny volon-dohany dia toy ny volon’ondry madio. Ny sezafiandrianany dia lelafo ary ny kodiarany dia afo mirehitra.

¹⁰Ony afo no nivoaka sy nandeha avy teo anatrehany; arivoarivo no nanompo Azy, ary alinalina no nijoro teo anatrehany. Nanomboka ny fitsarana ary novelarina ny boky.

¹¹Mbola nijery ihany aho noho ny feon’ny teny feno avonavona notenenin’ilay tandroka; raha mbola nijery aho dia novonoina ilay biby ka nolevonina ny tenany ary natao tao amin’ny afo mirehitra.

¹²Ny amin’ireo biby hafa dia nesorina taminy ny fahefany, nefa nohalavaina ihany ny andro hiainany mandra-pahalanin’ny andro sy ny fotoana.

¹³Ary mbola nahita tamin’ny fahitana tamin’ny alina ihany aho fa indro, nisy toy ny zanak’Olona avy tamin’ny rahon’ny lanitra, ary nankeo amin’Ilay Lahiantitra Izy, dia nampanatonina Azy.

¹⁴Nomena fahefana sy voninahitra ary fanjakana Izy mba hanompoan’ny fokom-pirenena sy ny firenena ary ny samihafa fiteny rehetra Azy. Ny fahefany dia fahefana mandrakizay ka tsy ho tapaka, ary ny fanjakany dia tsy ho rava.

¹⁵Izaho Daniela dia nangitakitaka tato anatiko, ary naharaiki-tahotra ahy ny fahitana hitako.

¹⁶Dia nanakaiky ny iray tamin’izay nitsangana teo aho ka nanontany azy ny fototr’izany rehetra izany. Nambarany tamiko ary ka nampahafantariny ahy ny hevitr’izany.

¹⁷Ireo biby lehibe efatra ireo dia mpanjaka efatra izay hitsangana avy amin’ny tany.

¹⁸Nefa ny olo-masin’ny Avo Indrindra no hahazo ny fanjakana ary hanana ny fanjakana mandrakizay doria.

¹⁹Dia naniry hahalala izay fototra marina ny amin’ny fahefatra aho, dia ilay biby hafa noho izy rehetra sady mahatsiravina indrindra izay nanana nify vy sy hoho varahina sady nihinana sy nihotahota, ary ny sisa tsy laniny dia nohosihosen’ny tongony;

²⁰ary ny amin’ny tandroka folo teo an-dohany sy ny iray koa izay nipoitra ka nisy telo potraka teo anoloany, dia ilay tandroka nanana maso sy vava izay niteny zavatra feno avonavona, ary ny fijery azy dia lehibe noho ny namany.

²¹Mbola nijery ihany aho, ary izany tandroka izany dia niady tamin’ny olo-masina ka naharesy azy

²²ambara-piavin’Ilay Lahiantitra izay nanome rariny ny olo-masin’ny Avo Indrindra ka tonga koa ny fotoana nandraisan’ny olo-masina ny fanjakana.

²³Izao no nolazainy: Ilay biby fahefatra dia fanjakana fahefatra etỳ ambonin’ny tany izay ho hafa noho ny fanjakana rehetra, sady handrava ny tany rehetra no hanosihosy sy hanorotoro azy.

²⁴Ny tandroka folo dia mpanjaka folo izay hitsangana avy amin’izany fanjakana izany; ary hisy iray koa hitsangana manaraka azy; hafa noho ny voalohany izy ary handresy mpanjaka telo.

²⁵Hiteny hanohitra ny Avo Indrindra izy sady hampahory ny olo-masin’ny Avo Indrindra ary hitady hanova ny fotoana sy ny lalàna. Hatolotra eny an-tanany ireo, ambara-pahatapitry ny fetrandro iray sy ny fetrandro roa ary ny antsasaky ny fetrandro.

²⁶Dia hanomboka ny fitsarana ary hesorina ny fahefany ka horavana sy hosimbana hatramin’ny farany izy.

²⁷Ary ny fanjakana sy ny fahefana ary ny fahalehibiazan’ny fanjakana eny ambanin’ny lanitra rehetra dia homena ny olo-masin’ny Avo Indrindra. Ny fanjakany dia fanjakana mandrakizay, ary ny manamboninahitra rehetra dia hanompo sy hanoa Azy.

²⁸Mifarana eo ny fitantarana izany zavatra izany. Fa izaho Daniela kosa dia naharaiki-tahotra ahy indrindra ny eritreritro ka nihahatsatra ny tarehiko ary notahiriziko tao am-poko ireo zavatra ireo.