Read La Bible en Malgache Daniela 8 Bible Online

Daniela 8 - La Bible en Malgache bible

Daniela 8

¹Tamin’ny taona fahatelo nanjakan’i Belsazara mpanjaka dia nisy fahitana niseho tamiko, izaho Daniela, taorianan’ilay niseho tamiko tamin’ny voalohany.

²Nahita tamin’ny fahitana aho, koa raha mbola nijery aho, dia indro, tao Sosana, tanàna mimanda izay ao amin’ny fari-piadidiana Elama no nisy ahy; hitako tamin’ity fahitana ity fa teo amoron’ny ony Olay aho.

³Natopiko ny masoko ka hitako fa indro nisy ondrilahy iray nitsangana teo amoron’ny ony ary nanana tandroka roa izy; lava ireo tandroka ireo, ary ny iray dia lava noho ny iray, nefa ilay lavalava kokoa no nipoitra taoriana.

⁴Hitako ilay ondrilahy nanoto niankandrefana sy nianavaratra ary nianatsimo; ary tsy nisy biby nahajanona teo anoloany sady tsy nisy naharombaka izay tonga teny an-tanany, fa nanao izay sitrapony izy ka nihalehibe.

⁵Raha mbola nandinika aho dia indro nisy osilahy nivoaka avy tany andrefana ka nitety ny tany rehetra nefa tsy nikasika ny tany; ary ilay osilahy dia nanana tandroka lehibe teo anelanelan’ny masony.

⁶Nankeo amin’ilay ondrilahy nanana tandroka roa izy, dia ilay efa hitako nitsangana teo amoron’ny ony, ka niala vonkina teo aminy tamin’ny heriny rehetra.

⁷Eny, hitako nanatona ho eo anilan’ny ondrilahy izy, dia nisafoaka taminy ka namely ny ondrilahy ary nanapaka ny tandrony roa; vokany: Tsy nahajanona teo anoloany intsony ilay ondrilahy, fa nazerany teo amin’ny tany ka nohitsakitsahiny; ary tsy nisy nahavonjy ilay ondrilahy teny an-tanany.

⁸Dia nihanahery tokoa ilay osilahy; nefa nony nahery izy dia tapaka ilay tandrony lehibe; ary nisy tandroka efatra lehibe hafa nipoitra nisolo iny, nifanandrify tamin’ny rivotra efatry ny lanitra.

⁹Nisy tandroka kely nipoitra avy tamin’ny iray tamin’ireny ka nihalehibe dia lehibe nianatsimo sy niantsinanana ary nankany amin’ny tany mahafinaritra.

¹⁰Nihalehibe izy ka tonga hatreo amin’ireo tafika eny amin’ny lanitra; ary nisy nazerany ho amin’ny tany ny tafika sy ny kintana ka nohitsakitsahiny.

¹¹Eny, nihalehibe izy ka niady tamin’ny komandin’ny tafika; nesorina taminy ny fanatitra isanandro ary noravana ny fitoerana masina.

¹²Noho ny fahotana dia natolotra azy ny tafika mbamin’ny fanatitra isanandro ary nazeran’ny tandroka ho amin’ny tany ny fahamarinana. Ary nahomby tamin’izay nataony izy.

¹³Nandre ny masina iray niteny aho, ary hoy ny masina iray koa tamin’ilay niteny: Mandra-pahoviana no haharetan’ny fahitana ny amin’ny fanatitra isanandro sy ny fahotana mahatonga fandravana ary ny fitoerana masina sy ny tafika voatolotra sady voahitsakitsaka?

¹⁴Dia hoy izy tamiko: Afaka telonjato sy roa arivo hariva sy maraina, ary aorianan’izany vao hodiovina ny fitoerana masina.

¹⁵Nony nahita ny fahitana izaho Daniela ka nitady hahafantatra izany, dia indro, nisy toy ny lehilahy matanjaka nitsangana teo anatrehako.

¹⁶Ary nandre feon’olona tao afovoan’i Olay aho, izay niantso hoe: Ry Gabriela, ampahalalao ny fahitana ity lehilahy ity.

¹⁷Dia nankeo amin’ilay nitsanganako izy; ary nony tonga izy dia raiki-tahotra aho ka niankarapoka tamin’ny tany. Nefa hoy izy tamiko: Aoka ho fantatrao, ry zanak’olona, fa io fahitana io dia milaza ny farany.

¹⁸Ary raha niresaka tamiko izy dia renoky ny torimaso teo amin’ny tany aho; fa nanohina ahy izy ka nampitsangana ahy teo amin’izay nisy ahy.

¹⁹Dia hoy izy: Indro hampahafantariko anao izay ho tonga amin’ny fiafaran’ny fahatezerana; fa hisy farany efa voafaritra.

²⁰Ilay ondrilahy hitanao nanana tandroka roa dia ny mpanjakan’i Media sy i Persia.

²¹Ny osilahy lava volo kosa dia ny mpanjakan’i Gresy; ary ny tandroka lehibe teo anelanelan’ny masony dia ny mpanjaka voalohany.

²²Ny amin’ilay tapaka kosa ka nisy efatra nitsangana nandimby azy, ary hisy fanjakana efatra hitsangana avy amin’ny Jentilisa*, nefa tsy mitovy hery aminy.

²³Ary ny hiafaran’ny fanjakany, rehefa tanteraky ny mpanota ny asany dia hisy mpanjaka hitsangana, izay masiaka tarehy sy mahafantatra zavatra saro-pantarina.

²⁴Ho be ny heriny, nefa tsy amin’ny herin’ny tenany; mahagaga ny fanimbana hataony; hahomby amin’izay hataony izy ary handringana ny mahery sy ny olo-masina.

²⁵Ny hafetseny koa no hahatanteraka ny fitaka eny an-tanany; ary hiavonavona am-po izy ka handringana ny maro tsy manampo na inona na inona; ary hitsangana hanohitra ny Mpanjakan’ny mpanjaka izy; kanjo kosa ho torotoro, nefa tsy hisy tanana hamely azy tsinona.

²⁶Ary marina ny amin’ireo hariva sy maraina voalaza ireo, nefa tano ho tsiambaratelo ny fahitana fa mbola ho andro maro izany.

²⁷Dia torana izaho Daniela ka nandraiky narary nandritra ny andro vitsivitsy; nony afaka izany dia nitsangana aho ka nikarakara ny raharahan’ny mpanjaka. Nihoron-koditra tamin’ny fahitana aho satria tena tsy azoko ny hevitr’izany.