Read La Bible en Malgache Hosea 10 Bible Online

Hosea 10 - La Bible en Malgache bible

Hosea 10

¹Voaloboka nisandrahaka Israely, namoa ho azy izy; arakaraka ny habetsahan’ny voany no nanaovany alitara betsaka; arakaraka ny hatsaran’ny taniny no nanaovany tsangambaton-tsampy tsara tarehy.

²Mamitaka ny fony, koa hovaliana izy izao noho ny helony. NY TOMPO no hanimba ny alitarany sy handrava ny tsangambaton-tsampiny.

³Ankehitriny dia hoy izy hoe: Tsy manana mpanjaka isika; fa tsy natahorantsika NY TOMPO, kanefa hahavita inona ho antsika moa izay mpanjaka?

⁴Namoaka teny maro izy, nanao fianianana mandainga, nanao fifanekena; fa nitrebona toy ny zava-mangidy eny am-bava asa eny an-tsaha ny fitsarana azy.

⁵Matahotra ny mponina any Samaria noho ny amin’ny ombivavy kely ao Bety-Avena; mitomany azy ny olony ary mangovitra noho ny aminy ny mpisorony, dia noho ny amin’ny voninahiny izay lasan-ko babo.

⁶Hoentina any Asiria koa iny ho fanomezana ho an’i Jareba[13] mpanjaka. Ho afa-baraka i Efraima; eny, hangaihay Israely noho ny zavatra nosaininy.

⁷Ho rava i Samaria, ho tonga toy ny sombin-javatra eny ambonin’ny rano ny mpanjakany.

⁸Ho rava koa ny toerana fanaovana sorona ao Avena izay anotan’ny Israely; ho rakotry ny tsilo sy songosongo ny alitarany. Hiteny amin’ny tendrombohitra izy hoe: Saròny izahay! Ary amin’ny havoana hoe: Mianjerà aminay!

⁹Hatramin’ilay tany Gibea fahiny no efa nanotanao, ry Israely! Niziriziry tamin’izany izy; tsy nahatratra azy tany Gibea ny ady namelezana ny zanaky ny faharatsiana!

¹⁰Araka ny sitrako no hamaizako azy; hovorina hamely azy ny firenena amin’ny hamatorana azy noho ny helony roa loha.

¹¹Tahaka ny ombivavy kely efa voafolaka i Efraima ka faly manosihosy vary; hasiako zioga ny vozony tsara tarehy. Horoahiko i Efraima, hiasa tany i Joda ary handravona azy i Jakoba.

¹²Mamafaza ho anareo araka ny fahamarinana, mijinjà araka ny fitiavana, miasà tany vaovao ho anareo. Fa izao no andro hitadiavana NY TOMPO ambara-piaviny sy handatsahany fahamarinana aminareo.

¹³Asa ratsy no nataonareo ka tsy fahamarinana no nojinjainareo; nihinana ny vokatry ny lainga ianareo. Koa satria nitoky tamin’ny lalanao sy ny habetsahan’ny lehilahy maherinao ianao

¹⁴dia hisy tabataba hamelezana ny olonao ka horavana ny tanànanao mimanda rehetra, toy ny nandravan’i Salamana an’i Bety-Arbela tamin’ny andro niadiana ka niara-torotoro ny reniny sy ny zanany.

¹⁵Toy izany no hanjo anareo, ry Betela noho ny haben’ny faharatsianareo; raha maraina ny andro dia ho levona tanteraka ny mpanjakan’ny Israely.