Read La Bible en Malgache Hosea 11 Bible Online

Hosea 11 - La Bible en Malgache bible

Hosea 11

¹Fony mbola zaza Israely dia tiako izy ary nantsoiko hiala tany Ejipta ny zanako.

²Nony nisy niantso azy dia vao mainka izy nandositra ireny; ho an’ireo Baala* no namonoany zavatra hatao fanatitra ary ho an’ny sarin-javatra voasokitra no nandoroany ditin-kazo manitra.

³Izaho no nampianatra an’i Efraima handeha; eny, noraisiko tamin’ny tanany aza izy, nefa odiany tsy fantatra fa Izaho no nikarakara azy.

⁴Tamin’ny tady fitarihana olona no nitarihako azy, dia tamin’ny mahazakan’ny fitiavana. Toy izay manainga ny zioga eo ambonin’ny valanoranony Aho ka nanolo-kanina azy tsimoramora.

⁵Tsy hiverina ho any amin’ny tany Ejipta izy, fa i Asiria no ho mpanjakany, satria tsy nety nibebaka izy.

⁶Hisy sabatra hihodinkodina ao an-tanànany ka handrava ny manodidina ary handevona azy noho ny fikasana nananany.

⁷Minia mikomy Amiko ny oloko; ary na dia antsoina ho amin’ny Avo aza izy dia tsy misy mety mitsangana akory.

⁸Hataoko ahoana re no fahafoy anao, ry Efraima? Na ho fanolotra anao, ry Israely? Hataoko ahoana re no fitondra anao ho tahaka an’i Adma? Hataoko tahaka an’i Zeboima va ianao? Onena ny foko, mafy loatra ny alaheloko.

⁹Tsy hampirehitra ny hatezerako Aho na handringana an’i Efraima intsony satria tsy olona Aho fa Andriamanitra, dia ny Iray Masina ao aminao, ka tsy ho avy amin’ny fahatezerana mirehitra Aho.

¹⁰Hanaraka NY TOMPO ireny; hierona toy ny liona Izy; eny, Izy no hierona, dia hanatona amin-kovitra avy any andrefana ny zanaka.

¹¹Hanatona amin-kovitra avy any Ejipta toy ny voronkely izy ary avy any amin’ny tany Asiria toy ny voromailala; dia hampitoeriko ao an-tranony izy, hoy NY TOMPO.