Read La Bible en Malgache Hosea 12 Bible Online

Hosea 12 - La Bible en Malgache bible

Hosea 12

¹Manodidina Ahy amin’ny lainga i Efraima ary amin’ny fitaka ny taranak’Israely; nefa i Joda dia mbola miaraka amin’Andriamanitra izay masina sy mahatoky ihany.

²Homan-drivotra i Efraima sady manenjika ny rivotra avy any atsinanana; mandritra ny andro dia ataony betsaka ny lainga sy ny fampihorohoroana; manao fanekena amin’ny Asiriana izy ary mitondra diloilo ho any Ejipta.

³Manana ady amin’i Joda koa NY TOMPO ary tsy maintsy mamaly an’i Jakoba araka ny lalany ka hatsingeriny aminy ny nataony.

⁴Fony mbola tany am-bohoka izy dia nihazona ny voditongotry ny rahalahiny ary rehefa lehibe izy dia nitolona tamin’Andriamanitra.

⁵Eny, nitolona tamin’ilay Anjely izy ka nahery; nitomany izy sady nifona Taminy. Nahita azy tao Betela Izy ary tao no niresahany tamintsika;

⁶NY TOMPO, Andriamanitra Tompon’izao rehetra izao, NY TOMPO no hahatsiarovana Azy.

⁷Koa miverena amin’Andriamanitrao ianao, tandremo ny fahitsiana sy ny rariny, miandrasa an’Andriamanitrao mandrakariva.

⁸Misy mizana miangatra eny an-tanan’ny mpivaro-mandeha; ny manambaka no tiany.

⁹Fa hoy i Efraima: Fiharian-karena ihany no nataoko ka nahazo fananana aho; tsy misy nahatonga fahotana na heloka ho ahy ny asako rehetra.

¹⁰Izaho no TOMPO Andriamanitrao hatrany amin’ny tany Ejipta; mbola hampitoetra anao an-day indray Aho tahaka ny tamin’ny andro firavoravoana.

¹¹Niteny tamin’ny mpaminany koa Aho sady nahabetsaka ny fahitana, ary ny mpaminany dia nampilazako fanoharana.

¹²Raha tena olon-dratsy i Gileada dia ho tonga zava-poana tokoa izy. Tany Gilgala no namonoany omby betsaka ho fanatitra; koa ny alitarany dia ho toy ny korontam-bato eny am-bava asa any an-tsaha.

¹³Nandositra ho any amin’ny tany Arama i Jakoba, nanompo hahazoany vady Israely; eny, ny hahazoany vady no niandrasany ondry aman’osy.

¹⁴Mpaminany no noentin’NY TOMPO nitondra ny Israely nivoaka avy tany Ejipta, ary mpaminany koa no noentina niahy azy.

¹⁵Nanao izay nahasosotra sy nahatezitra i Efraima, ka havelan’ny Tompony ho eo aminy ny rany ary hatsingeriny aminy ny vava ratsy nataony.