Read La Bible en Malgache Hosea 13 Bible Online

Hosea 13 - La Bible en Malgache bible

Hosea 13

¹Raha niteny i Efraima dia nampihorohoro ka nisandratra tao amin’ny Israely izy. Nefa nanota ny amin’ny Baala* izy ka maty.

²Ankehitriny dia mbola manota ihany izy, ny volafotsiny no anaovany sarin-javatra voarendrika, dia sampy araka ny fahaizany, izay asan’ny mpahay taozavatra avokoa. Ireny dia lazaina fa olona no vonoiny hatao fanatitra ary manoroka ombilahy kely izy.

³Koa ho toy ny rahona maraina izy, sy ho toy ny ando izay levona raha vao maraina ny andro ary ho toy ny akofa izay paohin’ny rivotra hiala amin’ny famoloana sy ho toy ny setroka avy amin’ny varavarankely.

⁴Izaho no TOMPO Andriamanitrao hatrany amin’ny tany Ejipta. Tsy mahalala Andriamanitra afa-tsy Izaho ianao sady tsy misy mpamonjy afa-tsy Izaho.

⁵Izaho dia nahalala anao tany an-tany efitra, dia tany amin’ny tany karankaina.

⁶Rehefa nahazo ahitra tsara izy dia voky; eny, voky izy ka niavonavona ny fony; koa izany no nanadinoany Ahy.

⁷Ho tonga toy ny liona aminy Aho; eny, toy ny leoparda amoron-dalana no hijokoako azy;

⁸hamely azy toy ny famelin’ny bera very anaka Aho ka handriatra ny saron’ny fony; eny, any no handrapahako azy toy ny fandrapaky ny liom-bavy; ny bibidia no hamiravira azy.

⁹Ringana ianao, ry Israely ô, satria nanohitra Ahy izay famonjena anao.

¹⁰Aiza ary izay mpanjakanao? Aoka izy hamonjy anao any an-tanànanao rehetra! Ary aiza ireo mpitsaranao izay nilazanao hoe: Omeo mpanjaka sy mpanapaka aho?

¹¹Nomeko mpanjaka tamin’ny fahatezerako ianao, nefa nesoriko tamin’ny fahavinirako izy.

¹²Voafehy ny helok’i Efraima, voatahiry ny fahotany.

¹³Fanaintainana tahaka ny vehivavy raha miteraka no mahazo azy; zanakalahy tsy hendry izy; kanefa amin’ny fotoana hahaterahany dia tsy ho tafavoaka avy tao amin’ny kibon’ny reniny izy.

¹⁴Hafahako avy tamin’ny fitoeran’ny maty* izy; havotako amin’ny fahafatesana izy; Ry fahafatesana ô, aiza ny areti-mandringanao? Ry fitoeran’ny maty ô, aiza ny valanaretinao? Afenina tsy ho hitan’ny masoko ny indrafo!

¹⁵Na dia hahavokatra eo afovoan’ny rahalahiny aza i Efraima dia ho avy ny rivotra avy any atsinanana, dia ny rivotry NY TOMPO miakatra avy any an-tany efitra, ka ho ritra ny loharanony ary ho tankina ny fantsakany. Hobaboina ny harena, dia ny fanaka tsara rehetra.