Read La Bible en Malgache Hosea 14 Bible Online

Hosea 14 - La Bible en Malgache bible

Hosea 14

¹Hovaliana i Samaria noho ny helony satria nikomy tamin’Andriamaniny izy. Ho lavon-tsabatra izy, ny zanany madinika dia hotorotoroina ary ny kibon’ny bevohoka eo aminy dia hotatahana.

²Ry Israely ô, miverena amin’NY TOMPO Andriamanitrao fa lavon-keloka ianao.

³Mitondrà teny ianareo, eny, miverena amin’NY TOMPO ka mitenena Aminy hoe: Mamelà ny heloka rehetra ary raiso izay tsara! Dia hatolotray ho fanatitra ny molotray ho solon’ny vantotra ombilahy.

⁴Tsy hamonjy anay i Asiria, tsy hitaingin-tsoavaly izahay sady tsy hiteny amin’ny asan’ny tananay intsony hoe: Ry andriamanitray ô! Fa ao Aminao no ahitan’ny kamboty famindrampo.

⁵Hositraniko ny fivadihany, ho tia azy amin’ny foko tokoa Aho; fa efa niala taminy ny fahatezerako.

⁶Ho tahaka ny ando Aho amin’ny Israely; hamony tahaka ny lisy izy ary hamaka tahaka an’i Libanona.

⁷Hisandrahaka ny rantsany, ho tahaka ny an’ny hazo oliva ny hatsaran-tarehiny, ary ho tahaka ny an’i Libanona ny hanitra avy aminy.

⁸Hiverina indray ireo izay nipetraka tao ambanin’ny alokalony, hampahavokatra vary indray izy, sady hamelana tahaka ny voaloboka; ho tahaka ny an’ny divay avy any Libanona ny lazany.

⁹Ry Efraima ô! Hataoko inona intsony izay sampy? Izaho dia efa nihaino ka nitsinjo anao; tahaka ny hazo kipreso maitso Aho, avy Amiko no hahazoana ny vokatrao.

¹⁰Iza no hendry ka hahafantatra izany zavatra izany? Izay manan-tsaina dia hahalala izany. Fa mahitsy ny lalan’NY TOMPO, ny marina dia mizotra eny aminy, fa ny mpanota kosa dia ho tafintohina eny aminy.